Isaías 33 - Q'eqchi Bible

Aawik'in yooko chi oyb'enink

¹ Rahilal chaalel sa' aab'een, at aj rahob'tesinel toj maji' rahob'tesinb'ilat; aj elq'at chi toj maak'a' na'elq'aak aawe! Naq tatraqe'q chi rahob'tesink ut chi elq'ak, tatrahob'tesiiq ajwi' laa'at ut taa'elq'aaq li k'aru aawe.

² At Qaawa', chawuxtaana taxaq qu, aawik'in yooko chi oyb'enink. Laa'ataq xkawub' qach'ool rajlal eq'la, laa'ataq laj kolol qe sa' xq'ehil li rahilal.

³ Naq nakat-aatinak chaq chi kaw xyaab' laakux, neke'elelik eb' li poyanam, neke'xcha'cha'i rib' li tenamit chi rilb'al laawankil;

⁴ naxokmank li b'ihomal jo' naq neke'xokok laj saak', ut chixjunileb' neke'xkut rib' sa' xb'een jo'eb' laj saak'.

⁵ Li Qaawa' q'axal nim xwankil xb'aan naq sa' choxa wank; xnujob'resi Sión rik'in li tiikilal ut li k'ulub'ej,

⁶ ut junelik nak'ehok chi wank sa' sahilal. Li choxahil na'leb' ut li chaab'il k'a'uxl a'an tz'aqal li sahil eechej nakolok; li roxloq'inkil ru li Qaawa' a'anaq laab'ihomal.

⁷ Ab'ihomaq! Eb' li kaweb' rib' yookeb' chi yaab'ak sa'atqeb' li b'e, ut eb' laj yehol resil li tuqtuukilal namayok li xch'ooleb' chi yaab'ak.

⁸ Neke'kirirnak aj chik li b'e ut maajun chik nanume'k aran. Xe'xsach xwankil li sumwank ut xe'xq'et li aatin xe'xye; maajun chik na'oxloq'ink li ras riitz'in.

⁹ Ra rilb'al li ruuchich'och' naq yo chi oso'k ut chi tz'uyink. Xtz'umaak li tzuul Líbano ut xchaqik chi junajwa. Jo' chaqich'och' xkanaak li xtaq'ahil Sarón; Basán ut li tzuul Karmeel xe'chaqik ru.

¹⁰ “Anaqwan tinwakliiq -chan li Qaawa'-; anaqwan tink'ut linloq'al ut linwankil.

¹¹ Leek'uub'ahom laa'ex a'an yal mul ut k'im; linmusiq' taasachoq re jo' naq li mul na'oso'k xb'aan li xam.

¹² Cha aj chik te'kanaaq eb' li tenamit, kama'aqeb' li k'ix naq nayok'mank ut na'ok xxamlel.

¹³ Laa'ex li wankex chaq chi najt, ab'ihomaq resil li xinb'aanu; ut laa'ex li wankex chi nach', k'ehomaq reetal linwankil”.

¹⁴ Xsachk xch'ooleb' laj maak li wankeb' Sión, k'ajo' naq kichalk xxiweb' li ink'a' useb' xna'leb': “Ani qe tixkuy wank sa' li xam nasachok? Ani taaruuq chi wank sa' li xam li ink'a' nachupk?”, chankeb'.

¹⁵ A' li nawank sa' tiikilal ut naxye li yaal, li ink'a' nab'ihomo'k rik'in b'alaq' chi moko natuminaak ru; li ink'a' naraj rab'inkil li k'aru naxye laj kamsinel ras riitz'in, chi moko naraj chi ril li maa'usilal.

¹⁶ A'an taawanq sa' jun na'ajej najt xteram, taahilanq sa' jun kawub'resinb'il ochoch, ut taawanq xwa ruk'a' chi junelik.

¹⁷ Laa'at taaka'ya jun awab'ej sa' li xloq'al ut taawil jun tenamit maak'a' chik xnub'ajlil.

¹⁸ Naqaamilaq sa' laach'ool laaxiw li xatwank wi', ut taaye: “B'ar xkoho laj titz'ol toj? B'ar wank li nayalok rix li tumin? K'aru xk'ul li na'ajlank re eb' li ninqi ochoch?”, cha'qat sa' laach'ool.

¹⁹ Ink'a' chik taawileb' ru li q'etq'et aj tenamit, a'eb' li ch'ol winq li jalanil aatin neke'aatinak wi' ut ink'a' natawmank ru li neke'xye.

²⁰ Il Sión, li tenamit nokooninq'ehik wi'. Ka'ya Jerusalén, li tuqtuukil tenamit; chanchanaq jun muheb'aal kaw xaqxo sa' li xna'aj: maajoq'e taa'eek'anq li roqechal sa' li ch'och' chi moko taat'upe'q li k'aam b'ak'b'o wi'.

²¹ Aran li Qaawa' tixk'ut chiqu li xnimal xloq'al. K'ajo'aq xk'ihal li nima' ut xninqal roq li ha' sa' li na'ajej, ab'an ink'a' te'nume'q aran eb' li ninqi jukub' b'eresinb'ileb' xb'aaneb' li xik' neke'ilok qe.

^22-23 Xhite'k li xk'aamaleb' li jukub', ink'a' chik xaqxo chi kaw li roqechal sa' xna'aj ut ink'a' chik naru xhelb'al li xnimal xt'ikrul li jukub'. Naab'al xb'ihomaleb' li xik' neke'ilok qe taaqeechani: te'tz'aqonq ajwi' eb' li mutz', ut eb' li yeq roqeb' te'xkut rib' sa' xb'een chi relq'ankil. Xb'aan naq li Qaawa' a'an laj raqol aatin sa' qab'een, a'an laj k'amol qab'e; li Qaawa' a'an li qaRey. A'an ajwi' taakoloq qe.

²⁴ Maajun chik sa' qayanq tixye: “Yajin”, ut li Qaawa' tixkuy xmaakeb' li wankeb' sa' li tenamit Sión.