Isaías 32 - Q'eqchi Bible

Li x'awab'ejihom li tiikil ch'oolej

¹ K'ehomaq reetal: taawanq junaq awab'ej li taa'awab'ejinq sa' tiikilal, ut eb' laj k'amol b'e te'raqoq aatin jo' chanru li k'ulub'ej.

² Li junjunq sa' xyanqeb' jo'kaq li na'ajej nakolok chiru li kawil iq' ut li hab'; kama'aq li roq nima' sa' li chaqich'och', chanchanaq jun nimla saqoonak chi muheelank sa' tiqwal ch'och'.

³ Q'esaq chik xsa' ru chi ilok ut q'esaq chik li xxik chi ab'ink.

⁴ Li ink'a' naxb'aanu li xk'anjel sa' xyaalal taak'anjelaq chi wank xna'leb', ut tz'aqal chik re ru taa'aatinaq li tat re.

⁵ Ink'a' chik taayehe'q “chaab'il winq” re li maak'a' xna'leb' chi moko taak'ehe'q xloq'al li eet aj winq.

⁶ Xb'aan naq li maak'a' xna'leb' junes memil naxseeraq'i ut junes xb'aanunkil li maa'usilal naxk'oxla. Naxb'aanu li ink'a' us ut naxmajewa li Qaawa'; ink'a' naxk'e chi tzekank li yo xtz'okajik chi moko naxk'e ruk'a' li taachaqiq re.

⁷ Li ink'a' us xna'leb' junes b'alaq'ik naxk'oxla ut naxyal xq'e chi xb'aanunkil li yib'eetal ru aj na'leb'; naxlab'ale li kub'enaq xwankil rik'in tik'ti' ut ink'a' naxkol rix li neb'a' sa' li raqleb'aal aatin.

⁸ A'ut li chaab'il xch'ool junes li chaab'ilal naxk'oxla, ut kaw xch'ool chi xb'aanunkil li us.

Reheb' li ixq li maak'a'eb' xk'a'uxl

⁹ Ex ixq li maak'a' nekek'oxla, xaqlinqex ut ab'ihomaq li ok we chi xyeeb'al eere. Ex ixq li k'ojk'o eech'ool anaqwan, ab'ihomaq li waatin.

¹⁰ Anaqwan maak'a' nekek'oxla, ab'anan sa' wan xkab' chihab' k'ajo' naq texxiwaq, xb'aan naq maak'a' teexok sa' xq'ehil xsik'b'al ru li uub'.

¹¹ Laa'ex li maak'a' nekek'oxla, okaq b'ayaq eexiw, t'urub'omaq eerib', isihomaq leeraq' cherix ut tiqib'omaq eerib' rik'in q'es ruhil t'ikr, reetalil li xrahil leech'ool;

¹² cheteni re leech'ool sa' xk'ab'a' li q'emal ch'och' ut eb' li chaab'il awimq.

¹³ Junes k'ix ut pajl aj chik taak'iiq sa' lintenamit; jo'kanaq ajwi' sa' chixjunileb' li ochoch neke'ninq'ehik wi' lintenamit chi saheb' sa' xch'ool.

¹⁴ Pojpo taakanaaq li rochochil li awab'ej ut maajun chik wanq sa' li tenamit; eb' li kawub'resinb'il kab'l li najt xterameb' te'kanaaq chi po'lemil chi junajwa: aran te'wanq chi ichajib'k eb' li k'iche'il b'uur ut eb' li wakax chi saheb' sa' xch'ool.

Taahoye'q chaq li Musiq'ej sa' qab'een

¹⁵ Ab'anan taqe'q taahoye'q chaq li Musiq'ej sa' qab'een. Toja' naq li chaqich'och' tkanaaq cho'q xna'aj awimq ut li xna'aj awimq taak'iche'o'q wi' chik.

¹⁶ Li tiikilal taa'uuchinq sa' li chaqich'och' ut li k'ulub'ej taawanq sa' li xna'aj li awimq;

¹⁷ Li xk'anjel li tiikilal a'an li wank sa' tuqtuukilal, ut li naruuchin li k'ulub'ej a'an li sahil wank ut li kawil ch'oolej chi junajwa.

¹⁸ Lintenamit taahilanq sa' tuqtuukilal ut maak'a' taach'i'ch'i'inq reheb' sa'eb' li ochoch wanqeb' wi',

¹⁹ us ta sajb'ilaqeb' li k'iche' ut juk'b'ilaq li tenamit.

²⁰ Us xaq eere laa'ex li tex'awq chi junqre li nima' ut teek'e chi ichajib'k leeketomq chi hitho.