Isaías 31 - Q'eqchi Bible

Eb' laj Ejiipt yal winqeb' ut ink'a' yoseb'

¹ Ra chaalel sa' xb'eeneb' li neke'xik Ejiipt chi xpatz'b'al xtenq'ankileb', eb' li neke'xk'ojob' xch'ooleb' chirix li xk'iila kawaayeb' ut b'eleb'aal ch'iich'eb', eb' li kaweb' xch'ool xb'aan naq naab'aleb' naq neke'b'eek chirix kawaay, ab'anan ink'a' neke'xsik' li Qaawa' ut maak'a' royb'enihomeb' rik'in li xSant laj Israel.

² Ab'an li Qaawa' seeb' ajwi' xch'ool ut naxnaw rahob'tesink; naq naxye junaq li raatin, ink'a' chik naxjal li xk'a'uxl. A'an taaraqoq aatin sa' xb'eeneb' li ink'a' useb' xna'leb' jo'wi' sa' xb'eeneb' li neke'tenq'ank reheb' laj b'aanuhom maa'usilal.

³ Eb' laj Ejiipt a'an yal winqeb' ut moko yoseb' ta; ut li xkawaayeb' a'an yal tib'elejeb', moko musiq'ejeb' ta. Naq li Qaawa' tixye' li ruq', taatichk'oq laj tenq'anel ut taat'ane'q li natenq'aak; wotz te'oso'q chi junajwa.

⁴ Jo'ka'in kixye we li Qaawa': “Jo' naq li kaqkoj malaj li ral naxjap re sa' xb'een li xtzak ut ink'a' naxxiwa ruheb' laj ilol ketomq us ta te'xch'utub' rib' re raanilasinkil ut japjo'q reheb' chirix, jo'kan ajwi' naq taachalq li Nimajwal Yos chi yalok sa' li tzuul Sión.

⁵ Tixmuheela li tenamit Jerusalén jo' naxb'aanu li xik'anel xul naq naxkupu li xsuk: tixmuheela ut tixkol, taanume'q sa' xb'een ut tixkanab' chi ach'ab'anb'il”.

⁶ Ex ralal xk'ajol laj Israel, sutq'inqex chaq rik'in li q'axal xexnajto'k wi' naq xeq'et li raatin.

Li xsachik Asiria

⁷ Sa' li kutan a'an chejunilex teetz'eqtaanaheb' li jalanil yos yiib'anb'il rik'in plaat jo'wi' eb' li jalam u oor li xeyiib' rik'in leeruq' xb'aan leemaa'usilal.

⁸ Toja' naq taa'oso'q Asiria chi q'esnal ch'iich', ab'an maawa' xb'aan xwankilal junaq winq. Ut wi eb' laj Asiria te'eleliq chiru li q'esnal ch'iich', te'chape'q ut te'k'ehe'q cho'q mun.

⁹ Taa'eleliq ajwi' li xyoseb' chi k'ajo'aq xxiw, ut eb' laj jolominel te'sachq xch'ool ut te'xkanab' li yalok. A'an a'in raatin li Qaawa' li wank xxam ak kawresinb'il aran Jerusalén re xrahob'tesinkileb' li xik' neke'ilok re.