Isaías 27 - Q'eqchi Bible

Li xkolb'aleb' laj Israel

¹ Sa' li kutan a'an li Qaawa' tixrahob'tesi li xk'anti'il li palaw li jwal xiwajel ru ut aj eelel, rik'in li xq'esnal ch'iich' li jwal kaw ut nim roq; tixkamsi ajwi' li mama' xul wank sa' li ha'.

² Sa' li kutan a'an li Qaawa' tixye: “B'ichanqex sa' xk'ab'a' li awimq uub' li q'axal chaab'il.

³ Laa'in, li Qaawa', nin'ilok re ut kok'aq xsa' nint'aqresi. Nink'aak'ale chi q'eq ut chi kutan re naq maajun taach'e'oq re.

⁴ Ink'a' chik yo injosq'il rik'in. Wi ta wank li k'ix jo'wi' li pim sa' xyanq, laa'in teb'insach raj ut teb'ink'at chi junpaat jo' na'uxk re li k'im.

⁵ Ab'an wi eb' li xik' neke'ilok re lintenamit te'xpatz' xtenq'ankileb' we, xk'amaqeb' wan rib' sa' usilal wik'in; wik'in tento naq te'xk'am rib' sa' usilal!”.

⁶ Chiruheb' li kutan chaalel laj Jakob tixchap xxe'; laj Israel taa'atz'umaq ut taak'ihanq, tixnujob'resi li ruuchich'och' rik'ineb' li ralal xk'ajol.

⁷ Li Yos ink'a' xrahob'tesiheb' laj Israel jo' kixb'aanu reheb' li ke'tawasink reheb'; chi moko xsacheb' ru jo' kixkamsiheb' li ke'kamsink reheb' a'an.

⁸ Kixrahob'tesi li xtenamit naq kirisi sa' li xna'ajeb' ut kixtaqlaheb' sa' jalanil tenamit; kiraanilasiheb' chi najt xb'aan li xxiwajel josq'il, jo' naq na'apunk li kawil iq' nachalk sa' xjayal releb'l saq'e.

⁹ Ab'anan taakuymanq taasachmanq li xmaak laj Jakob, wi a'an tixputz'i chixjunileb' li artal jo' na'uxk re li xpekul li chun, ut maajunaq chik li pek, li che' malaj tijob'aal neke'loq'oniik wi' eb' li jalanil yos.

¹⁰ Li kawub'resinb'il tenamit xkanaak chi po'lemil, ut nakirirnak aj chik kama' li chaqich'och' b'arwi' eb' li wakax neke'ichajib'k ut neke'hilank chi xwa'b'al li xxaq li che'.

¹¹ Naq eb' li ruq' che' neke'chaqik, neke'toqiik; toja' naq neke'chalk eb' li ixq ut neke'xtz'ab' xxameb' chiru. Li tenamit a'an maak'a' xna'leb', jo'kan naq Li kiyoob'tesink re, laj Winqob'resihom re, ink'a' taaril xtoq'ob'aal ru.

¹² Naq taawulaq li kutan a'an, li Qaawa' tixsik'eb' chaq li poyanam chalen chaq chire li nima' Éwfrates toj chire li nima' re Ejiipt, jo' naq na'isiik rix li triiw; a'ut laa'ex aj Israel texxoke'q chejunjunqalil.

¹³ Sa' li kutan a'an taayaab'asiiq jun nimla pur, ut eb' li ke'xcha'cha'i rib' Asiria jo' ajwi' li ke'k'ame'k Ejiipt te'chalq chi xloq'oninkil ru li Qaawa', arin Jerusalén, sa' li santil tzuul.