Isaías 26 - Q'eqchi Bible

B'ich

¹ Sa' li kutan a'an taab'ichamanq li b'ich a'in sa' xteepal Judá: “Kaw rib' li qatenamit; li Qaawa' xk'ehok re wiib' xtzol li xsuttz'akil re naq tookole'q.

² Tehomaq eb' li okeb'aal chire li tenamit re naq te'ok jun teep chi tenamit tiikeb' xch'ool li neke'xb'aanu li neke'xye.

³ Kaw xaqxo li xpaab'aaleb', ut laa'at, at Qaawa', nakak'e reheb' li wank sa' tuqtuukilal xb'aan naq k'ojk'o xch'ooleb' aawik'in.

⁴ K'ojob'omaq leech'ool rik'in li Qaawa' chi junelik, xb'aan naq A'an tz'aqal li Saqoonak nakolok qe.

⁵ Li Qaawa' xkub'si xwankileb' li q'etq'et; xt'an li tenamit q'axal kaw rib', xjuk' ut xkub'si chaq chi ch'och'el,

⁶ re naq taayeq'iiq sa' roqeb' li neb'a' jo' ajwi' xb'aaneb' li lub'lub'eb'”.

Saalm

⁷ Li xyu'am li tiik xch'ool a'an li tiikilal; laa'at, at Qaawa', nakattuqub'ank ru li xb'e.

⁸ Rik'in xpaab'ankil laachaq'rab', at Qaawa', kaw qach'ool chawoyb'eninkil; li k'aru naxrahi li qaanm a'an laaraab'al ut aajultikankil.

⁹ Chiru li q'oqyink nawataw wank aawik'in ut toj eq'la nakatinsik' chi anchal inch'ool. Naq nakatraqok aatin sa' ruuchich'och', eb' li poyanam neke'xtzol wank sa' tiikilal.

¹⁰ Us ta taakuymanq xmaak li ink'a' us xna'leb', ab'an ink'a' tixtzol wank sa' tiikilal; toj yooq xb'aanunkil li maa'usilal sa' xyanqeb' li tiikeb' ru xyu'am ut ink'a' tixk'e reetal li xwankilal li Qaawa'.

¹¹ At Qaawa', ak teneb'anb'il li tojb'amaak sa' xb'eeneb', ab'anan ink'a' neke'raj xk'eeb'al reetal; ut naq te'ril li xnimal aarahom rik'in laatenamit, te'kanaaq sa' xutaan. A' taxaq li xxamlel laajosq'il chisachoq reheb' li xik' neke'ilok aawe.

¹² At Qaawa', laa'at toohaak'e chi wank sa' tuqtuukilal, xb'aan naq ka'ajwi' laa'at nakatk'ehok naq us too'elq rik'in li nalajqab'aanu.

¹³ At Qaawa', at qaYos, yaal naq jalaneb' chik xe'numtaak sa' qab'een, ab'an anaqwan maajun chik k'ab'a'ej wank sa' qach'ool: ka'ajwi' laa'at, at Qaawa'.

¹⁴ Eb' li kamenaq ink'a' chik te'yo'laaq, eb' li mu ink'a' chik te'wakliiq chaq, xb'aan naq xatraqok aatin sa' xb'eeneb' ut xasacheb' ru, ut maajun chik taapatz'oq li xk'ab'a'eb'.

¹⁵ At Qaawa', laa'at xak'e chi k'ihank laatenamit: xak'ihob'resiheb' re naq taanawmanq ru laawankilal ut xatiq ru li xnub'ajlil li qana'aj.

¹⁶ At Qaawa', xatqasik' naq yooko chi k'uluk rahilal ut ink'a' chik naqakuy li qarahob'tesinkil aab'aan.

¹⁷ Jo' naq li ixq wank sa' yu'am ut xwulak xhonalil li alank, japjo re xb'aan li rahilal, jo'kan ajwi' naq xoowank chawu, at Qaawa'.

¹⁸ Xoosiyank, xook'uluk rahilal jo' li ixq, ab'anan maak'a' xoo'ok wi', kama' wi' alank iq'. Ink'a' xqakol li qatenamit ut maajun junaq xyo'laak sa' ruuchich'och'.

¹⁹ Eb' laakamenaq te'wanq xyu'am, te'yo'laaq wi' chik li xb'aqel rismaleb'; te'ajq ruheb' ut te'b'ichanq xb'aan xsahil xch'ooleb' jo'k'ihaleb' li wankeb' sa' pojtz'. Xb'aan naq laak'ajob' a'an jun k'ajob' nalemtz'unk ru, ut li xna'ajeb' li kamenaq taa'alanq.

²⁰ At intenamit, okan sa' laamuheb'aal ut tz'ap li okeb'aal chawix. Chamuq aawib' jun k'amokaq toja' re naq taanume'q xjosq'il li Qaawa'.

²¹ Xb'aan naq elk re li Qaawa' sa' li xmuheb'aal re eeqajunk chirix li maa'usilal li xe'xb'aanu chixjunileb' li poyanam sa' ruuchich'och'; li ch'och' taarisi chaq chi kutankil li xkik'eleb' li xe'kamsiik, ut ink'a' chik tixmuq li kamsink xb'aanuhatq.