Isaías 25 - Q'eqchi Bible

B'ich re b'anyoxink

¹ At Qaawa', laa'at linYos; ninnima aawu ut ninterq'usi laak'ab'a' xb'aan naq xab'aanu xninqal sachb'ach'oolej, k'oxlanb'ileb' chi us chalen chaq junxil; q'axal paab'ajel laak'a'uxl ut k'ojk'o xwankil.

² Xakok'putz'i li tenamit, ut eb' li kawub'resinb'il na'ajej po'lem xakanab'. Xajuk' li rochocheb' li xik' neke'ilok qe ut maahoon wulaj chik taakab'laaq.

³ Jo'kan naq jun tenamit jwal kaw rib' neke'xk'e aaloq'al, ut eb' li poyanam li jwal josq'eb' neke'xxiwa aawu.

⁴ Xb'aan naq chanchanat jun saqoonak cho'q re li lub'lub', laa'at xkawub' xch'ool li neb'a' naq wank sa' rahilal, laa'at nakatkolok chiru li hab' ut nakatmuheelank chiru xtiqwal li saq'e. Eb' li josq' aj poyanam chanchaneb' li b'ut'iha' sa' li hab'alq'e

⁵ malaj kama' xtiqwal li saq'e sa' chaqich'och'. Ab'an laa'at nakakub'si xwankileb' laj ab'l tenamit jo' naq nakakotz xtiqwal li saq'e rik'in li choql, ut nakach'anab' xb'icheb' laj rahob'tesinel.

Li xninq'e li tiikeb' xch'ool

⁶ Sa' li tzuul Sión li Nimajwal Yos tixyeechi'i jun ninq'e cho'q re chixjunileb' li tenamit; tixk'uub' sahil tzekemq rik'in najter b'iin ut tixk'e chaab'il tib' ut sununkil b'iin.

⁷ Sa' li tzuul a'in taarisi li t'ikr natz'apok re chixjunileb' li poyanam, taarisi li xrahileb' xch'ool chixjunileb' li tenamit;

⁸ ut tixsach chi junajwa xwankil li kamk. Li Qaawa' tixmes li xya'al ruheb' chixjunil li poyanam ut tixsach li xxutaan li xtenamit junsut junrub'el choxa. Li Qaawa' kiyehok re a'in.

Taakub'siiq xwankil Mohab

⁹ Sa' li kutan a'an taayeemanq: “A'an a'in li qaYos li kaw wi' qach'ool re qakolb'al. A'an a'in li Qaawa' li xoo'oyb'enink wi': qanimaaq xloq'al ut chisaho'q li qach'ool xb'aan naq A'an xkolok qe”.

¹⁰ Li ruq' li Qaawa' taahilanq sa' xb'een li tzuul a'in, ab'an Mohab taayeq'iiq sa' oqej sa' li xna'aj jo' naq nayeq'iik li k'im sa' mul.

¹¹ Mohab tixye' eb' li ruq' jo' naq li nanumxik naxye'b'e eb' li ruq'; ab'anan us ta tixyal xq'e chi xkolb'al rib', li Qaawa' tixsach ru li xq'etq'etil.

¹² Tixjuk'eb' li kawub'resinb'il ochoch ut eb' li tz'ak najt xteram; tixt'aneb' ut t'ant'o te'kanaaq chiru ch'och'.