Isaías 23 - Q'eqchi Bible

Li rahilal te'xk'ul Tiro ut Sidón

¹ Resilal li rahilal tixk'ul li tenamit Tiro: Yaab'anqex, ex jukub' re Tarsis, xb'aan naq xjuk'e'k li na'ajej nekexhilank wi'. Naq yookeb' chaq chi sutq'iik Kitim, xe'rab'i resil a'in.

² Tz'uyinqex, ex aj yakonel re Sidón, laa'ex li wankex chire li palaw, nekexnume'k toj junpak'al a'an ut neketaqla laj k'anjel cheru, chiru li ha' k'ajo' xnimal.

³ Xetaw eeb'ihomal aran Ejiipt, rik'in li triiw na'elk chaq chire li nima' Nilo, ut xek'ayihatq reheb' chixjunil li tenamit.

⁴ Chatxutaanaq, a Sidón, li kawub'resinb'il tenamit chire li palaw, xb'aan naq taawulaq xq'ehil naq taaye chi jo'ka'in: “Ink'a' chik wankin sa' yu'am, maajun chik ink'uula'al xwank; ink'a' chik ninch'oolanink teelom al chi moko nink'iiresink ixqa'al”.

⁵ Naq eb' laj Ejiipt te'rab'i resil li xsachik Tiro, k'ajo' naq taamayoq xch'ooleb'.

⁶ Ut te'xye: “Ayuqex Tarsis -cha'qeb'- ut tz'uyinqex laa'ex li wankex chire li palaw”.

⁷ Ma ink'a' tab'i' a'in li tenamit li jwal najter kik'ojob'amank, li junelik sa sa' xch'ooleb' ut toj najt neke'wulak chi na'ajunk li xpoyanamil?

⁸ Ani xk'uub'ank re li rahilal a'in sa' xb'een Tiro, li xchaq'alil ut xnimal ru tenamit? Eb' laj yakonel aj araneb' junes xninqaleb' ru winq, ut k'eeb'ileb' xwankil sa' chixjunil li ruuchich'och'.

⁹ A' li Nimajwal Yos xk'uub'ank re a'in re xsachb'al li xq'etq'etil Tiro chirix li xnimal xloq'al ut re xkub'sinkileb' xwankil li neke'xnima rib' sa' ruuchich'och'.

¹⁰ K'anjela ru laach'och', a Tarsis, xb'aan naq maak'a' chik li hilob'aal jukub'.

¹¹ Li Qaawa' xye' li ruq' sa' xb'een li palaw, xjuk' xwankileb' li awab'ej ut xk'e chi sache'k eb' li kawub'resinb'il ochoch re Kanahán.

¹² Ut xye re li Tenamit Sidón: “Misaho'k chik aach'ool, at muxb'il tuq'ixq. Waklin ut ayu Kitim; ab'anan chi moko aran tatwanq sa' tuqtuukilal”.

¹³ Ilomaq chanru xkanaak Kaldeha: moko tenamit ta chik; eb' laj Asiria xe'q'axtesink re li na'ajej a'an reheb' li josq' aj xul. Xe'yiib'ank ochoch najteb' xteram re ok sa' li tenamit; xe'xjuk'i eb' li kawub'resinb'il ochoch ut po'lem chik xkanaak chixjunil.

¹⁴ Yaab'anqex, ex jukub' re Tarsis, xb'aan naq xjuk'e'k li kawub'resinb'il na'ajej kaw wi' eech'ool.

¹⁵ Toja' naq li tenamit Tiro ink'a' chik taapatz'manq chiru lajeeb' xkaak'aal chihab'. Jo' xnajtil roq xyu'am junaq awab'ej, naq taaraqe'q li lajeeb' xkaak'aal chihab' a'an, taayeemanq chirix Tiro li k'aru nab'ichamank chirix li ixq aj yumb'eet:

¹⁶ “Chap laa'aarp ut suti li tenamit, at aj yumb'eet li maajun chik napatz'ok aawe. Wajb'an chi chaab'il ut b'ichan chi us; mare anchal tatpatz'e'q wi' chik”.

¹⁷ Naq akaq xnume'k li lajeeb' xkaak'aal chihab', li Qaawa' trula'ani li tenamit Tiro, ut a'an tixtikib' wi' chik yakok ut tixk'ayi wi' chik rib' reheb' chixjunil li tenamit sa' ruuchich'och', jo' naxb'aanu laj yumb'eet.

¹⁸ Ab'an li tumin li tixtaw, taaq'axtesimanq re li Qaawa'. Ink'a' chik taak'uulaaq, taak'eemanq b'an cho'q reheb' laj k'anjel chiru li Qaawa', re naq te'tzekanq chi us ut te'xtiqib' rib' rik'in chaab'il aq'ej.