Isaías 22 - Q'eqchi Bible

Li rahilal li tixk'ul Jerusalén

¹ Resilal li rahilal chaalel sa' xb'een li xTaq'ahil li Moy u. K'aru xek'ul chejunilex anaqwan naq xextaqje'k sa' xb'eeneb' li ochoch,

² laa'ex li tenamit q'axal sa sa' eech'ool junxil ut junes choqink ut ninq'ehik nekeb'aanu? Eb' li kamenaq sa' eeyanq ink'a' xe'kamsiik chi q'esnal ch'iich', chi moko xe'kamk sa' li yalok.

³ Chixjunileb' li neke'jolomink eere junxikikeb' naq xe'elelik chiru li simaj re xkolb'aleb' rib', ut xe'chape'k naq yookeb' chi xik us ta ak najt xe'wulak.

⁴ Jo'kan naq xinye: “Elenqex chiwu ut kanab'omaqin injunes chi yaab'ak xb'aan xrahil linch'ool; meech'i'ch'i'i eerib' chi xk'ojob'ankil li waanm xb'aan li roso'jik lintenamit”, chankin.

⁵ Xb'aan naq xwulak xkutankil li rahilal, li juk'uk ut li sachok taqlanb'il chaq xb'aan li Qaawa', li Nimajwal Yos. Sa' xTaq'ahil li Moy u yookeb' chi xjuk'b'al li suttz'ak ut li xyaab' kuxej xwulakje'k toj sa'eb' li tzuul chi xsutam.

⁶ Eb' laj Elam xe'xkawresi xna'aj li xsimajeb', eb' laj Aram xkoheb' chirix kawaay ut eb' laj Kir xe'risi chaq li xkolb'al rib'eb'.

⁷ Li xch'ina'usal laataq'a xnujak chi b'eleb'aal ch'iich', ut li wankeb' chirix kawaay xe'xtzolob' rib' chire rokeb'aal li tenamit.

⁸ Chi jo'kan xjuk'e'k chixjunil li neke'xkol wi' rib' eb' laj Judá. Sa' li kutan a'an laa'ex xeril li ochoch sa' li k'iche' li nak'uulaak wi' li k'a'aq re ru na'uxk wi' li yalok.

⁹ Xek'e ajwi' reetal naq li xtenamit laj David naab'al chik xhopolal ut xk'atzal; ut xexok li ha' sa' li kumb' li wank taq'a.

¹⁰ Toja' naq xerajla eb' li ochoch wank Jerusalén, ut naab'al li kab'l xejuk' re xkawub'resinkil li xsuttz'akil li tenamit.

¹¹ Sa' xyanqeb' li suttz'ak xeyiib' jun li kumb' re xxokb'al li ha' li wank sa' li q'eel kumb'. Ab'anan ink'a' xek'e reetal naq a' li Qaawa' kib'aanunk re chixjunil a'an, ut ink'a' xek'oxla ani kik'uub'ank re a'an chalen chaq junxilaj.

¹² Sa' li kutan a'an li Nimajwal Yos xexb'oq chi yaab'ak ut chi q'oqonk, re teejo li rismal leejolom ut xk'eeb'al cherix li q'es ruhil t'ikr.

¹³ Ab'anan laa'ex sa chik sa' leech'ool ut yookex chi ninq'ehik, yookex chi kamsink wakax ut karneer, junes tiwok tib' ut uk'ak b'iin nekeb'aanu: “Wa'aqo ut uk'aqo xb'aan naq wulaj kab'ej tookamq”, -chankex-.

¹⁴ Toja' naq li Qaawa', li Nimajwal Yos, xye we: “Li maak a'in ink'a' taakuymanq toj reetal toxexkamq”, chan li Nimajwal Yos.

Risinkil sa' xk'anjel laj Sebná

¹⁵ Jo'ka'in kixye we li Nimajwal Yos: “Ayu rik'in laj Sebná, laj ilol re li rochoch li awab'ej,

¹⁶ li yo xyiib'ankil xmuqleb'aal chi tzuul ut yo xpikb'al sa' li pek cho'q xmuheb'aal, ut ye re: «K'aru nakab'aanu arin? Ani xyehok aawe naq xayiib' aamuqleb'aal arin?

¹⁷ Li Qaawa' tatxkut chi najt, tatxchap wi' chik chi kaw

¹⁸ ut tatxtolk'osi chiru li helhookil ch'och' jo' na'uxk re li b'olotz. Aran tatkamq ut toxe'raqe'q laab'eleb'aal ch'iich' nakanima wi' aawib', ut taak'e sa' xutaan laj eechal aawe.

¹⁹ Laa'in tatwisi sa' laana'aj ut tinmaq' chawu laak'anjel.

²⁰ «Sa' li kutan a'an tinb'oq chaq laj Eliakín, laj k'anjel chiwu, a' li ralal laj Jilkías.

²¹ Tintiqib' rik'in laab'aatal, tinb'ak' li xsa' rik'in laak'aamal sa' ut tinq'axtesi sa' ruq' laawankil. A'anaq jun yuwa'b'ej cho'q reheb' laj Jerusalén ut cho'q reheb' li ralal xk'ajol laj Judá.

²² Tinq'axtesi sa' ruq' li xlaawil li xjunkab'al laj David: wi a'an natehok, maajun chik taatz'apoq; wi a'an natz'apok, maajun chik taatehoq.

²³ Tink'ojob' sa' li xwankil chi junajwa jo' junaq klawx t'ojb'il sa' kawil tz'ak, ut a'anaq li xyo'leb'aal xloq'al chixjunileb' li rech'alal.

²⁴ Rik'in a'an te'yo'oninq chixjunileb' li wankeb' sa' rochoch li xyuwa', jo' ajwi' eb' li ri xmam, jo'aq li xt'uyleb'aal eb' li sek' ut eb' li uk'al.

²⁵ «Ab'anan sa' li kutan a'an -chan li Nimajwal Yos-, taaq'unaaq li klawx a'in ut taa'isiiq sa' li kawil tz'ak, ut chixjunil li k'a'aq re ru t'uyt'uuq chiru taat'ane'q ut kok'putz' tkanaaq»”.