Isaías 19 - Q'eqchi Bible

Li rahilal li te'xk'ul eb' laj Ejiipt

¹ Xyehom li Qaawa' chirix Ejiipt: Ilomaq li Qaawa' naq xchalk sa' aanil sa' li tenamit Ejiipt, k'ojk'o chaq sa' xb'een jun li choql. Eb' li xyoseb' laj Ejiipt yo xxiweb' chiru li Qaawa', ut eb' laj Ejiipt neke'siksotk ajwi' chiru A'an.

² “Tinchiq' xjosq'ileb' laj Ejiipt chirib'ileb' rib' -chan li Yos- ut li junjunq taayaloq rik'in li ras riitz'in: li wank ramiiw taayaloq rik'in li ramiiw, tenamit rik'in tenamit, ut awab'ejilal rik'in awab'ejilal.

³ Tinpo' xna'leb'eb' laj Ejiipt, ut ink'a' chik taach'olaaq li xk'uub'ahomeb'. Toja' naq te'xik chi patz'ok rik'in li xyoseb', rik'inatqeb' laj tuul, eb' laj q'e ut eb' li neke'tz'ilok rix chahim.

⁴ Tinq'axtesi Ejiipt sa' ruq' jun josq' aj winq; jun reemaaru aj awab'ej taanumtaaq sa' xb'eeneb'”, chan li Nimajwal Yos.

⁵ Taachaqiq li palaw ut taasachq li ha' re li nima' Nilo;

⁶ te'chaqiq ut te'chuho'q eb' li roqha' wankeb' Ejiipt, te'tz'umaje'q eb' li kaxlan'aj ut eb' li say.

⁷ Li pim ut li awimq li wankeb' chire li nima' talaje'chaqiq, te'kutiiq chi najt xb'aan li iq' ut maak'a' chik tkanaaq.

⁸ Eb' li neke'karab'k rik'in luchb'aq sa' li nima' Nilo te'raho'q xch'ool ut te'ok chi yaab'ak, ut eb' li neke'xkut li xyooyeb' taalajq li xmetz'eweb'.

⁹ Sachsooq xch'ooleb' li neke'q'inok liin, ut eb' laj tz'ulunel jo'wi' eb' laj kemonel te'mayoq li raanmeb';

¹⁰ te'lub'je'q eb' laj kemonel ut eb' li neke'kutanib'k tkab'roxinq xch'ooleb'.

¹¹ Relik chi yaal naq maak'a' xna'leb'eb' laj k'amol b'e re Sohán, ut eb' laj k'ehol xna'leb' laj Parahón maak'a' neke'ok wi'. Chan put ru naq nekeye re laj Parahón: “Ralal xk'ajolo eb' li wankeb' xna'leb', ralal xk'ajolo eb' li awab'ej ke'wank chaq najter”?

¹² At Parahón, b'ar wankeb' laj k'ehol aana'leb', re naq te'xk'ut ut te'xch'olob' chawu li xk'uub'ahom li Nimajwal Yos chirix Ejiipt?

¹³ Xe'kaano' ruheb' li neke'jolomink re Sohán, xe'xb'alaq'i rib' li xninqaleb' ru winq re Nof, ut a'aneb' ajwi' laj k'amol b'e xe'sachb'esink re Ejiipt.

¹⁴ Li Qaawa' xpo'ok xna'leb'eb' re naq ink'a' us te'elq sa' li xk'anjeleb', jo'eb' li kalajenaq li nataktotk ut yo chi xxa'wankil rib'.

¹⁵ Ut maak'a' naru te'xb'aanu eb' laj Ejiipt, a' yaal ma li wankeb' xwankil malaj li kub'enaqeb' xwankil, eb' li b'ihom malaj eb' li neb'a'.

Eb' laj Ejiipt te'xyot' xch'ool

¹⁶ Sa' li kutan a'an eb' laj Ejiipt chanchanaqeb' chik li ixq; siksootqeb' chiru li Nimajwal Yos naq A'an taaraj xtaqlankil chaq li rahilal sa' xb'eeneb'.

¹⁷ K'ajo'aq xxiweb' laj Ejiipt chiruheb' laj Judá! Rajlal naq taapatz'manq li xk'ab'a'eb' laj Judá, te'ok xxiw xb'aan naq taajultiko'q reheb' li xk'uub'ahom li Nimajwal Yos sa' xb'een Ejiipt.

¹⁸ Sa' ajwi' li kutan a'an oob' reheb' li tenamit sa' xteepal Ejiipt te'aatinaq jo'eb' laj Kanahán ut te'xye xjurament sa' xk'ab'a' li Qaawa', li Nimajwal Yos; ut jun reheb' li tenamit a'an tixk'ab'a'in: “Xtenamit li Saq'e”.

¹⁹ Sa' li kutan a'an taawanq jun x'artal li Qaawa' aran Ejiipt ut, sa' xnub'ajlil li tenamit, taaxaqab'aaq jun li loq'laj pek re xk'eeb'al xloq'al li Qaawa'.

²⁰ A'anaq jun reetalil ut xpatz'b'al li Nimajwal Yos sa' xyanqeb' laj Ejiipt. Naq te'xpatz' xkolb'aleb' sa' ruq'eb' li neke'rahob'tesink reheb', li Qaawa' tixtaqla chaq jun aj kolonel li taatenq'anq reheb' ut tixkoleb'.

²¹ Nawnooq ru li Qaawa' Yos xb'aaneb' laj Ejiipt ut eb' a'an te'xnaw ru li Qaawa' sa' li kutan a'an. Te'xloq'oni ru ut te'mayejaq chiru; ut wi wank k'aru te'xyeechi'i re li Yos, te'xb'aanu ajwi'.

²² Li Qaawa' tixrahob'tesiheb' laj Ejiipt, ab'an tixk'irtasiheb' wi' chik. Eb' a'an te'xyot' xch'ool ut te'xjal xk'a'uxl chiru li Yos, ut A'an taaruxtaana ruheb' ut tixk'irtasiheb'.

²³ Sa' li kutan a'an taawanq jun nimb'e taa'elq Ejiipt toj Asiria: eb' laj Asiria te'ruuq chi xik Ejiipt, jo'kaneb' ajwi' eb' laj Ejiipt te'xik Asiria; xkab'ichaleb' li tenamit a'an te'k'anjelaq chiru li Yos.

²⁴ Sa' li kutan a'an li tenamit Israel, Ejiipt ut Asiria junajaqeb' aj chik, re naq osob'tesinb'ilaq li ruuchich'och' sa' xk'ab'a'eb'.

²⁵ Ut te'osob'tesiiq xb'aan li Nimajwal Yos chi jo'ka'in: “Osob'tesinb'il taxaq Ejiipt lintenamit, jo' ajwi' Asiria li kink'uub' rik'in wuq'; osob'tesinb'ilat taxaq Israel, li tz'aqal intenamit”, cha'aq li Yos.