Isaías 17 - Q'eqchi Bible

Li raqb'a aatin chirixeb' laj Damaask ut eb' laj Israel

¹ Xyehom li Qaawa' chirix Damaask: “Damaask moko tenamitaq ta chik, xb'aan naq tkanaaq chi tub'tuukil pek.

² Eb' li tenamit sa' xteepal Siria te'kanab'aaq chi junajwa ut te'sutq'iiq cho'q xna'ajeb' li ketomq; aran te'hilanq eb' li xul ut maajun taaxib'esinq reheb'.

³ Taajuk'manq xwankil laj Efraín, ut li x'awab'ejihom Damaask taa'oso'q; eb' laj Siria li te'kole'q, maak'a'aqeb' chik xloq'al jo'keb' laj Israel -chan li Nimajwal Yos-.

⁴ “Sa' li kutan a'an taasache'q xloq'al laj Jakob ut maak'a'aq chik li xb'ihomal.

⁵ Taak'ulmanq kama' naq laj setonel naxxok chi joob' li awimq, naxch'ot li ru malaj naxxok li triiw sa' xtaq'ahil Refaín:

⁶ aran junes roq awimq aj chik taakanaaq. Taak'ulmanq jo' naq najiliik li ru eb' li oliiw chi che': wiib' oxib' aj chik nakanaak chiru li xmisik', kaahib' malaj oob'aq li ru natawmank chiru li xche'el”, chan li Qaawa', li xYos laj Israel.

⁷ Sa' li kutan a'an li winq tixtaqsi li rilob'aal chiru Li kiyoob'tesink re ut taaril ru li xSant laj Israel.

⁸ Ink'a' chik te'iloq wan wi' li xyiib'ahomeb', chi moko te'xka'ya chik li k'aru ke'xyiib' rik'in ruq'eb': a'eb' li xtoon che' ut eb' li artal nak'atmank wi' li pom chiru li xyoseb'.

⁹ Sa' li kutan a'an te'kanab'aaq li tenamit jo' naq ke'kanab'aak li xtenamiteb' laj Amor ut laj Jib chiruheb' laj Israel: nakirirnak ut chaqich'och' te'kanaaq wi'.

¹⁰ Xb'aan naq xatz'eqtaana li Yos, laj kolol aawe, ut xsachk sa' laach'ool naq A'an li nak'ehok aakawilal. Jo'kan naq xawaw eb' li ch'ina'usil awimq rik'in jalanil iyaj li chalenaq sa' ab'l tenamit.

¹¹ Chiru jun kutan xawil chi moqk li awimq, sa' xkab' li kutan xawil chi atz'umak, ab'anan naq taachalq li yajel, taa'tz'umaaq ut q'axal nimaq chik li rahilal taak'ulmanq.

¹² Japeb' chaq re eb' li k'iila poyanam chi chalk, chanchan xyaab' li xkaw oq li palaw naq neke'xjap chaq reheb'. Neke'tenlok chaq chi chalk eb' li poyanam, jo' naq nakilinb'ak xyaab' li b'ut'iha'.

¹³ Ab'anan naq li Yos tixq'useb' chi kaw, eelel te'xik chi najt ut te'aanilasiiq jo' naq na'apuuk li mul xb'aan li iq' toj sa'eb' li tzuultaq'a, chanchanaqeb' xmuqyax li kaqsut-iq'.

¹⁴ Xiwajelaq rilb'aleb' naq taa'ewuuq, ab'anan naq taahik'e'q, maajunaqeb' chik. Jo'ka'in naq te'oso'q eb' li neke'rahob'tesink qe; a'in toxe'raqe'q wi' li neke'elq'ank li k'aru qe.