Isaías 13 - Q'eqchi Bible

Li rahilal sa' xb'een Babilonia

¹ A'an a'in li kik'utb'esiik chiru laj Isaías, ralal laj Amós, chirix li rahilal tixk'ul li tenamit Babilonia:

² “Taqsihomaq li reetalil li yalok sa' xb'een li t'ojoch aj tzuul, japomaq eere ut k'utomaq leeruq' chiruheb' laj puub' re naq te'ok sa' li rokeb'aaleb' li ninqeb' xwankil.

³ Laa'in xintaqla xb'oqb'aleb' li xq'axtesihomeb' rib' chiwu, xinb'oqeb' li jwal kaweb' rib' chi yalok, eb' li neke'saho'k rik'in linwankilal, re naq te'yaloq sa' ink'ab'a' re risinkil linjosq'il”.

⁴ Na'ab'imank li choqink sa'atqeb' li tzuul, chanchan wi' xyaab' xkuxeb' li k'iila poyanam. Tz'aapixik tz'aqal rab'inkileb' li tenamit, eb' li k'iila poyanam li xe'xch'utub' rib' aran. Li Nimajwal Yos yo xtzolob'ankileb' laj puub' li te'xik chi yalok.

⁵ Najt xe'chalk chaq, chalen junsut junrub'el choxa. Li Qaawa' rochb'eeneb' li neke'okenk sa' li xjosq'il te'xsach chixjunil li ruuchich'och'.

⁶ Japomaq eere chi yaab'ak xb'aan naq nach' chik wank li xkutankil li Qaawa', jo' jun aj sachonel naq tol'elq li Nimajwal Yos.

⁷ Jo'kan naq chixjunileb' maak'a'aq chik xmetz'eweb' ut te'ch'inanq xch'ool eb' li poyanam.

⁸ Q'axal te'siksotq xb'aaneb' xxiw, te'ayaynaq ut te'eek'anq jo' junaq ixq ok re chi alank. Yal te'xka'yahatq aj chik rib' ut kaqmoqinkaqeb' xb'aaneb' xxutaan.

⁹ We' chaq xkutankil li Qaawa', xiwajelaq li xxamlel li xjosq'il, re xkanab'ankil li ruuchich'och' chi nakirirnak aj chik, jo' ajwi' re xsachb'aleb' laj maak li wankeb' chisa'.

¹⁰ Eb' li chahim chiru choxa ink'a' chik te'saqeno'q ru, li saq'e taaq'oqyino'q ru chi junpaat ut li po ink'a' chik tixkutanob'resi li ruuchich'och'.

¹¹ “Tinraqoq aatin sa' xb'een li ruuchich'och' xb'aan li xmaak -chan li Yos- ut tink'ajtesi ruheb' li ink'a' useb' xna'leb' xmaak li xmaa'usilaleb'. Twisi li xwankil eb' li neke'xnima rib' ut tinkub'siheb' xwankil li q'etq'et.

¹² Ink'a' chik k'ihaqeb' li winq sa' ruuchich'och' chiru li chaab'il oor; ink'a' chik naab'alaqeb' li poyanam chiru li oor re Ofir.

¹³ Toja' naq li choxa taa'eek'anq sa' xna'aj ut li ruuchich'och' taahich'hich'iiq li rub'elankil xb'aan xxamlel linjosq'il sa' li kutan a'an.

¹⁴ “Toja' naq eb' li poyanam jo'kaqeb' li yuk chi elelik malaj kama'aqeb' li karneer li neke'cha'chotk chi maajun chik nach'utub'ank reheb'. Li junjunq tixchap raanil sa' li xtenamit ut taa'eleliq toj sa' li xk'aleb'aal.

¹⁵ Chixjunil li taatawe'q, taapaynumiiq chi simaj, ut jo'k'ihaleb' li te'chape'q, te'kamsiiq chi ch'iich'.

¹⁶ Chiruheb' ajwi' a'an te'sumsak'iiq chiru pek li ralaleb'; taa'elq'aaq xsa' chixjunileb' li ochoch ut te'maakoniiq li rixaqileb'.

¹⁷ Tinchiq' xjosq'ileb' laj Media chi yalok rik'ineb'; eb' a'an ink'a' naxik xch'ooleb' chirix li tumin chi moko neke'xrahi ru li oor.

¹⁸ Chi simaj te'xkamsi eb' li saaj al, ink'a' te'ril xtoq'ob'aal ruheb' li k'uula'al, chi moko te'xkuy xmaakeb' li kok'al.

¹⁹ Ut Babilonia, li ch'ina'us sa' xyanqeb' li tenamit, li xloq'al eb' laj Kaldeha ut li tenamit neke'xnimob'resi wi' rib', taakanaaq jo' Sodoom ut Gomoor li kinsacheb' ru.

²⁰ Maajoq'e chik toxtenamito'q a'an, maajun chik tixtaw xch'ool kanaak aran. Ink'a' chik toxe'hilanq eb' laj Arabia sa' li na'ajej a'an, chi moko eb' laj ilol ketomq te'xk'eheb' li xkarneer chi ichajib'k aran.

²¹ A'eb' chik li josq' aj xul te'wanq aran, ut eb' li warom te'xch'ik rib' sa'eb' li ochoch; aran ajwi' wanqeb' laj tak' ra' ut te'pisk'oqje'q eb' li yuk.

²² Eb' li sakol jaapaq reheb' sa'eb' li ochoch najteb' xteram, ut eb' li ch'ina'usil kab'l wanqeb' laj xojb' chisa'. Li xhonalil li xsachik Babilonia ak xnach'ok chaq, yal ajlanb'il kutan aj chik taa'oso'q wi' li tenamit”.