Isaías 11 - Q'eqchi Bible

Li ralal laj Jesé

¹ Taatuxmeq chaq li xxe' laj Jesé, taayo'laaq jun li ralal sa' xxe' xtoonal.

² Ut rik'in a'an taawanq li xmusiq' li Qaawa': a' li musiq'ej nak'ehok choxahil na'leb' ut seeb'al ch'oolej, nak'ehok chaab'il k'a'uxl ut kawil ch'oolej, musiq'ej re xnawb'al ut roxloq'inkil li Yos.

³ A'an sahaq xch'ool chi xpaab'ankil li Qaawa'; ink'a' taaraqoq aatin jo' chanru naril chi moko xb'aan naq yal xyehe'k re.

⁴ Taaraqoq b'an aatin sa' tiikilal chirixeb' li maak'a'eb' xwankil ut tixkoleb' li neb'a' li wankeb' sa' li tenamit. Yal rik'in li raatin tixrahob'tesi li ink'a' us xna'leb' ut rik'in li xmusiq' tixsach ru li nab'aanunk maa'usilal.

⁵ Tiqtooq junelik rik'in li yaal ut li tiikil ch'oolej.

⁶ Toja' naq laj xojb' ut li karneer te'wanq sa' tuqtuukilal, li hix ut li chib'aat wotz te'hilanq, li kaqkoj ut li saaj wakax junajaqeb' chi ichajib'k, ut jun ch'ina'al taab'eresinq reheb'.

⁷ Li ixqiwakax ut li tz'uqtz'un wotz te'tzekanq, eb' li ral te'tunlaaq sa' junajil, ut li kaqkoj taawa'oq pim jo' li wakax.

⁸ Li k'uula'al li toj natu'uk taab'atz'unq chire xjulel li k'anti', ut li toje' xmaq'e'k li xtu' tixch'ik li ruq' sa' xsok li q'anb'olay.

⁹ Sa' chixjunil linsantil tzuul maajun taab'aanunq maa'usilal malaj taarahob'tesinq ras riitz'in, xb'aan naq chixjunileb' te'xnaw chik ru li Qaawa'. Jo' naq li ha' naxtamresi li palaw, jo'kan ajwi' li xraab'al li Qaawa' tixnujob'resi chixjunil li ruuchich'och'.

Te'sutq'iiq chaq eb' li ke'k'ame'k chi preexil

¹⁰ Sa' li kutan a'an li riyajil laj Jesé taawanq jo' jun eetalil cho'q reheb' li tenamit; chixjunileb' li poyanam te'sik'oq re ut q'axal nimaq xloq'al li na'ajej wanq wi'.

¹¹ Chiru ajwi' li kutan a'an li Qaawa' tixk'ut li xnimal xwankil re xkolb'al li rela' li xtenamit: taarisiheb' chaq aran Asiria ut Ejiipt, Patros, Etiopía, Elam, Senahar, Jamat ut sa'eb' li na'ajej sutsuukeb' xb'aan li palaw.

¹² Tixtaqsi jun eetalil cho'q reheb' li poyanam, tixch'utub'eb' wi' chik eb' laj Israel li ke'isiik sa' li xtenamiteb', ut tixk'ameb' chaq eb' laj Judá li cha'cha'inb'ileb' sa' chixjunil li ruuchich'och'.

¹³ Toja' naq eb' laj Efraín ink'a' chik te'xkaqali eb' laj Judá ut eb' laj Judá ink'a' chik te'xrahob'tesi eb' laj Efraín; ink'a' chik xik' te'ril rib' li wiib' chi tenamit a'an.

¹⁴ Te'xik sa' xjayal rokeb'l saq'e chi yalok rik'ineb' laj Filistea ut toxe'xchap chi maak'a'aq sa' xch'ooleb'; chi xkab'ichaleb' te'xxok li xb'ihomaleb' li poyanam li wankeb' sa' xjayal releb'l saq'e. Toxe'awab'ejinq sa' xb'eeneb' laj Edom ut Mohab, ut eb' laj Amón te'paab'anq chiruheb'.

¹⁵ Li Qaawa' tixte xb'eheb' sa' li Kaqi Palaw ut tixk'ut li xwankilal sa' xb'een li nima' Éwfrates: tixtaqla jun tiqwal iq' li tixjach li nima' sa' wuqub' chi roqha', ut aran te'nume'q li tenamit chi chaqi ru xb'eheb'.

¹⁶ Chi jo'kan taawanq jun nimb'e cho'q reheb' xkomon li tenamit li te'sutq'iiq chaq Asiria, jo' li ke'xtaw eb' laj Israel naq ke'elk chaq Ejiipt.