Isaías 10 - Q'eqchi Bible

¹ Ra chaalel sa' xb'eeneb' li neke'k'uub'ank yib' aj chaq'rab' ut neke'teneb'ank rahilal sa' xb'eeneb' li poyanam.

² Ink'a' neke'xtenq'aheb' li neb'a' sa' li raqleb'aal aatin, neke'xram b'an li xk'ulub' eb' li ra wankeb' sa' lintenamit, neke'xchoy xsa' li xjunkab'aleb' li xmalka'an ut neke'xmaq' li k'aru wank reheb' li neb'a'yox.

³ K'aru teeb'aanu naq taachalq li raqb'a aatin sa' eeb'een, naq toj chi najt taachalq chaq li raaxiik'? Ani teepatz' wi' eetenq'ankil ut b'ar teekanab' leeb'ihomal?

⁴ Wi ink'a' teekub'si eerib' sa' xyanqeb' laj preex, texkamq sa' xyanqeb' li te'kamsiiq. Ab'anan ink'a' ajwi' xch'anaak xjosq'il li Qaawa' ut toj yo chi xrahob'tesinkileb' li tenamit.

Li awab'ej re Asiria a'anaq xk'anjelob'aal li Yos

⁵ “Asiria a'an xk'anjelob'aal linjosq'il, a'an li tz'uum nawoksi naq yo injosq'il.

⁶ Nintaqla chi xsachb'al jun tenamit yib'ru xna'leb', jun tenamit li yo wi' injosq'il, re tixmaq' ut tixxok li xb'ihomaleb', ut tixyeq'iheb' sa' roq jo'eb' li xseb'ul li b'e.

⁷ Ab'an li awab'ej re Asiria ink'a' naxk'oxla a'an, chi moko nanume'k sa' xch'ool chi jo'kan. Li xk'a'uxl a'an junes xkamsinkil ut xsachb'al naab'aleb' chi tenamit.

⁸ Xb'aan naq naxye sa' xch'ool: «Ma ink'a' tab'i' awab'ejeb' chixjunileb' li wankeb' rub'el linwankil?

⁹ Juntaq'eeteb' li tenamit chiwu laa'in: Kalnó kama' ajwi' Karkemis, Jamat juntaq'eet rik'in Arpad, ut Samaria jo'kan ajwi' Damaask.

¹⁰ Xinq'axeb' ru li tenamit li naab'aleb' xjalanil yos, k'ajo'eb' chik xjalam uheb' chiru Jerusalén ut Samaria.

¹¹ Us b'i', li xinb'aanu re Samaria ut reheb' li xyos, ma ink'a' jo'kan tinb'aanu re Jerusalén ut eb' li xjalam u?»”.

¹² Naq akaq xraqe'k li Qaawa' chi xb'aanunkil li xk'anjel sa' li tzuul Sión ut Jerusalén, tixrahob'tesi li awab'ej re Asiria xb'aan li xq'etq'etil ut li xnimob'resinkil rib'.

¹³ Xyehom li awab'ej re Asiria: “Xinb'aanu a'in rik'in linkawilal ut rik'in li xwankil linna'leb', xb'aan naq jwal seeb' inch'ool. Xinsach xnub'ajlileb' li tenamit, xlajweechani li xb'ihomaleb' ut xwisiheb' li awab'ej sa' li xna'ajeb' jo' junaq winq li q'axal kaw rib'.

¹⁴ Xinxok li xb'ihomaleb' li tenamit, xinchap chixjunil li xch'och'eb', jo' naxoke'k junaq kanab'anb'il mol sa' xsuk li xik'anel xul, ut maajun x'eek'ank chi moko xjap re chinxib'esinkil”.

¹⁵ Ma nim tab'i' xwankil li maal chiru li nach'e'ok re? Ma nanumtaak tab'i' li setleb' che' chiru li na'eek'asink re? Chanchan tawi' naq li xuq' nataqlank sa' xb'een li nach'e'ok re, kama' tawi' naq li che' na'eek'asink re li winq.

¹⁶ Jo'kan naq li Nimajwal Yos tixkanab'eb' li kaweb' rib' chi maak'a'eb' chik xmetz'ew, ut tixk'e xxamlel li neke'xnimob'resi rib' jo' naq nak'ate'k li chaqi si'.

¹⁷ Li Yos, li xsaqenk laj Israel, taachalq jo' li xam ut li Qaawa', li q'axal Sant, taasutq'iiq cho'q raq'xam; yal chiru jun kutan tolxsacheb' li k'ix ut li pim sa' li tenamit.

¹⁸ Tixsacheb' xchaq'alil ru li k'iche', ut li chaab'il ch'och' taa'oso'q chi junwaakaj; taakanaaq jo' junaq yaj li yo chi kamk timil timil.

¹⁹ Yal ajlanb'ilaqeb' aj chik eb' li che' li te'kanaaq chiruheb' li tzuultaq'a, li naru ajwi' naq junaq ch'ina'al taa'ajlanq reheb'.

Jun ch'ina ch'uutaqeb' aj chik

²⁰ Sa' li kutan a'an eb' laj Israel li te'kole'q, eb' li ralal xk'ajol laj Jakob li te'kanaaq ink'a' chik te'xkawub'resi xch'ool chirixeb' li xe'rahob'tesink reheb', chi anchaleb' b'an chik xch'ool te'xtz'aama xtenq'ankileb' chiru li Qaawa', li xSant laj Israel.

²¹ Yal ajlanb'ilaqeb' aj chik li ralal xk'ajol laj Jakob li te'sutq'iiq rik'in li Nimajwal Yos.

²² Us ta laatenamit, a Israel, q'axal naab'aleb' jo' xk'ihaleb' li xsamahi'ul li palaw, ab'an yal jun ch'ina ch'uut aj chik te'sutq'iiq chaq. Ak xaqxo xkutankil li xsachb'aleb' re naq wanq li tiikilal chi junwaakaj.

²³ Ak teneb'anb'il li xsachikeb' xb'aan li Nimajwal Yos, ut jo'kan tixb'aanu sa' chixjunil li ruuchich'och'.

²⁴ Jo'ka'in xyehom li Nimajwal Yos: “Mexxiwak, ex intenamit li wankex Sión. Meexiwa ruheb' laj Asiria, us ta tate'xrahob'tesi rik'in che' ut tz'uum jo' ke'xb'aanu eb' laj Ejiipt.

²⁵ Yal jun k'amok aj chik maa naraqe'k linjosq'il sa' eeb'een, ut sa' xb'eeneb' chik laj Asiria taaq'apliiq.

²⁶ Li Nimajwal Yos tixk'e reeqaj li rahilal xe'xb'aanu eere, jo' naq kixsacheb' ru laj Madián sa' li tzuul Horeb malaj jo' naq kixte li b'e sa' li palaw rik'in li xxuq' aran Ejiipt.

²⁷ Sa' li kutan a'an texwisi rub'el xwankileb' laj Asiria ut ink'a' chik texrahob'tesiiq xb'aaneb', tex'ach'ab'aaq b'an chi junajwa”.

Li xchalikeb' laj Asiria

²⁸ Eb' laj Asiria ke'nume'k sa' li tenamit Mikrón naq ke'chalk sa' xb'eeneb' laj Ayat ut aran Mikmás ke'rajlaheb' laj puub'.

²⁹ Ke'q'axonk junpak'al li nima' ut koxe'hilanq Keba; eb' laj Ramá ke'xiwak ut ke'elelik eb' laj Kibehá, xtenamit laj Saúl.

³⁰ Japomaq eere chi kaw li wankex Bat-Kalín! Ab'ihomaq, laa'ex aj Layis, chaq'onqex chaq, ex aj Anatot!

³¹ Eb' laj Madmená ke'elelik ut li wankeb' Kebín koxe'xmuq rib'eb'.

³² Hoon ajwi' eb' laj Asiria te'hilanq aran Nob; te'xk'ut li reetalil li yalok aran Sión, sa' xtzuulil Jerusalén.

³³ Ilomaq li Nimajwal Yos, ak yo chi sachok rik'in xnimal xwankil: yo chi xmich'b'al eb' li che' najteb' xteram, jiljookeb' chiru ch'och' eb' li che' ninq xsa'.

³⁴ Rik'in maal yo xsajb'aleb' li k'iche' ut li xch'ina'usal Líbano yo chi oso'k.