Hechos 4 - Q'eqchi Bible

Laj Pedro ut laj Jwan chiruheb' li xninqal ru aj raqol aatin

¹ Toj yookeb' ajwi' chi raatinankileb' li tenamit naq eb' laj tij ut li najolomink reheb' laj k'aak'alenel rochoch li Yos jo'wi' eb' laj Saduseey kole'xk'ut rib' chiruheb':

² ch'a'aj ke'reek'a naq laj Pedro ut laj Jwan neke'xtzol li tenamit ut neke'xjultika li xwaklijikeb' chi yo'yo li kamenaq sa' xk'ab'a' li xwaklijik chi yo'yo li Jesus.

³ Ke'xchap laj Pedro ut laj Jwan ut ke'xk'eheb' sa' tz'alam re naq aran te'kanaaq toj sa' li kutan jun chik xb'aan naq ak x'ewuuk.

⁴ Ab'anan naab'aleb' li ke'ab'ink re li Aatin, ke'xpaab', ut kitamk li komonil: oob' mil tana li xk'ihaleb' li winq.

⁵ Sa' li kutan jun chik ke'xch'utub' rib' aran Jerusalén li xb'eenileb' li tenamit, eb' li cheekel winq ut eb' laj tz'iib',

⁶ laj Anás, li xyuwa'il aj tij, laj Kaifás, laj Jonatán, laj Alejandro ut chixjunil li xkomoneb' li xyuwa'ileb' aj tij.

⁷ Ke'xxaqab' laj Pedro ut laj Jwan sa' xyiheb' ut ke'xpatz'i reheb': —K'aru leewankil ut ani sa' aj k'ab'a' naq xeb'aanu a'in? chankeb'.

⁸ Toja' naq laj Pedro, nujenaq chi Santil Musiq'ej, kixye reheb': —Ex xb'eenilex li tenamit, ex cheekel winq,

⁹ sa' li kutan a'in neketz'il qix chirix li usilal xqab'aanu re jun li yaj ut ani sa' aj k'ab'a' xkole'k a'in.

¹⁰ Chenawaq chejunilex jo'wi' chixjunil li tenamit Israel naq sa' xk'ab'a' li Jesukriist, laj Nazaret, li xek'e laa'ex chiru krus ut xwaklesiik chi yo'yo xb'aan li Yos sa' xyanqeb' li kamenaq, sa' xk'ab'a' a'an naq xaqxo li winq a'in cheru laa'ex chi kaw chik.

¹¹ Li Jesus a'an li pek xetz'eqtaana laa'ex laj kab'lanel, ut xkanaak cho'q xnimal ru pek sa' li kab'l.

¹² Xb'aan naq maa'ani chik aj ik'in wank li kolb'a ib'; maak'a' chik junaq k'ab'a'ej rub'el choxa k'eeb'il qe cho'q aj Kolonel.

¹³ Naq ke'xk'e reetal li xkawub' xch'ooleb' laj Pedro ut laj Jwan, ke'sachk xch'ool, xb'aan naq ch'olch'o chiruheb' naq eb' li winq a'in moko tzolb'ileb' ta ut aj k'aleb'aaleb'. Neke'xnaw chi us naq xe'rochb'eeni li Jesus.

¹⁴ Yookeb' ajwi' chi rilb'al li winq li xk'irtasiik, wank chi xaqxo chi xk'atqeb': jo'kan naq ink'a' ke'ruhank chi xsumenkil.

¹⁵ Ke'xtaqlaheb' chi elk sa' li raqleb'aal aatin ut ke'ok chi k'uub'ank chirib'ileb' rib':

¹⁶ —K'aru taaqab'aanu reheb' li winq a'in? -chankeb'-. Ch'olch'o chiruheb' chixjunil laj Jerusalén naq eb' a'in xe'xb'aanu chi kutankil jun xnimal eetalil, ut laa'o ink'a' naru tqaye naq moko yaal ta.

¹⁷ Ab'anan, re naq ink'a' chik taapuktesimanq resil a'in sa'eb' li tenamit, qaxib'esihaqeb' re naq chalen anaqwan maa'ani chik aj ik'in te'aatinaq sa' xk'ab'a' li Jesus.

¹⁸ Ke'xb'oqeb' wi' chik ut ke'xchaq'rab'iheb' naq tik ink'a' chik te'aatinaq malaj te'k'utuq sa' xk'ab'a' li Jesus.

¹⁹ A'ut laj Pedro ut laj Jwan ke'chaq'ok ut ke'xye: —K'oxlahomaq laa'ex k'aru us chiru li Yos: ma eepaab'ankil laa'ex malaj xpaab'ankil li Yos?

²⁰ Laa'o ink'a' naru tqakanab' aatinak chirix li qilom ut qab'ihom.

²¹ Li xb'eenileb' li tenamit ke'xxib'esi wi' chik laj Pedro ut laj Jwan ut ke'rach'ab'eb', xb'aan naq ink'a' neke'xtaw chan ta ru xrahob'tesinkileb'; neke'xxiwa ajwi' ruheb' li tenamit, xb'aan naq chixjunileb' neke'xnima ru li Yos chirix li xk'ulmank.

²² Ut yaal ajwi': li winq li xk'irtasiik rik'in li sachb'ach'oolej, a'an numenaq ka'k'aal chihab' wank re.

Xtijeb' laj paab'anel

²³ Naq laj Pedro ut laj Jwan ke'ach'ab'aak, koheb' rik'ineb' li xkomon ut ke'xseeraq'i reheb' chixjunil li kiyehe'k reheb' xb'aaneb' li xb'eenil aj tij ut eb' li cheekel winq.

²⁴ Naq ke'rab'i a'an, chixjunileb' ke'xtaqsi xyaab' xkuxeb' chiru li Yos sa' junajil ut ke'xye: “At Qaawa', laa'at kayiib' li choxach'och', li palaw ut chixjunil li wank chisa';

²⁵ laa'at kaye rik'in Santil Musiq'ej chi xtz'uumal re li qanajteril yuwa' laj David laamoos: «K'a'ut naq xe'xmululi rib' li poyanam? K'a'ut naq eb' li tenamit xe'xk'uub' li maak'a' rajb'al?

²⁶ Xe'xk'amchi'i rib'eb' li awab'ej ut eb' laj jolominel re li ruuchich'och'; wotz neke'k'uub'ank raaxiik' chirix li Qaawa' ut li Sik'b'il ru xb'aan».

²⁷ “Xb'aan naq relik chi yaal, sa' li tenamit a'in, laj Herodes ut laj Poncio Pilaat, rochb'eeneb' laj Israel jo'keb' ajwi' li jalaneb' xpaab'aal, xe'xk'am rib' sa' aatin chi xxikb'al rilb'al li Jesus, laasantil moos sik'b'il ru aab'aan cho'q Kriist.

²⁸ Chi jo'kan xe'xb'aanu li ak k'uub'k'u chaq aab'aan rik'in xnimal aawankil ut aana'leb'.

²⁹ Ut anaqwan, at Qaawa', k'e reetal chanru nokoohe'xxib'esi, ut chak'e taxaq reheb' laj k'anjel chawu xpuktesinkil laawaatin chi kaweb' xch'ool.

³⁰ Chak'ut xnimal aawankil re naq chi'uxmanq li k'irtasink, xninqal ru eetalil ut sachb'ach'oolej sa' xk'ab'a' li Jesus, laasantil moos”.

³¹ Naq ke'raqe'k chi tijok, ki'eek'ank li na'ajej ch'utch'uukeb' wi', ut chixjunileb' ke'nujak chi Santil Musiq'ej ut ke'ok chi xyeeb'al li Raatin li Yos chi maak'a'eb' xxiw.

Li xb'een komonil

³² Li xk'ihaleb' laj paab'anel junajeb' li xch'ool, junajeb' li raanm naq wankeb' chirib'ileb' rib'. Maa'ani naxye naq re li k'aru wank re, chixjunil b'an komon e cho'q reheb'.

³³ Ut eb' li apóstol neke'xpuktesi resil li xwaklijik chi yo'yo li Qaawa' Jesus rik'in xnimal wankil, ut q'axal sa ilb'ileb' chixjunileb'.

³⁴ Maajun sa' xyanqeb' wank sa' rajb'al ru, xb'aan naq chixjunileb' li wankeb' xch'och' malaj rochocheb', neke'xk'ayi

³⁵ ut nokoxe'xk'e chi roqeb' li apóstol, ut najek'imank reheb' chixjunil, a' yaal chanru li rajb'al ru wan wi' li junjunq.

³⁶ Laj José (aj Bernabé nayeemank re xb'aaneb' li apóstol; chi jalb'il ru naraj naxye: “aj k'ehol kawil ch'oolej”), xkomoneb' laj Leví, Chipre xtenamit,

³⁷ wank jun xch'och': kixk'ayi, ut kixk'am chaq li tumin, kolxk'e chi roqeb' li apóstol.