Hechos 24 - Q'eqchi Bible

Laj Pablo chiru laj Félix, ruuchil li awab'ej

¹ Oob' kutan chik chirix a'an, laj Ananías, li xyuwa'il aj tij, kikub'eek Cesarea, wankeb' ajwi' cheekel winq rochb'een ut jun li na'aatinak chirixeb' sa' raqleb'aal aatin, aj Tértulo xk'ab'a'. Chixjunileb' a'an ke'wulak wan wi' li ruuchil li awab'ej chi xjitb'al laj Pablo,

² ut naq kib'oqe'k chaq a'an, laj Tértulo kixtikib' xjitb'al chi jo'ka'in: —B'anyox xaq aawe, at qaawa' Félix, wanko sa' nimla tuqtuukilal ut yo chi usaak li tenamit a'in xb'aan xnimal laak'a'uxl.

³ Rik'in a'in nasaho'k qach'ool junelik ut yalaq b'ar; k'ajo' naq naqab'anyoxi chawu.

⁴ Anaqwan nintz'aama chawu naq, sa' xk'ab'a' xnimal laawusilal, taawab'i taxaq li ok qe chi xyeeb'al. Junpaat ajwi' tatqach'i'ch'i'i.

⁵ Xqataw li winq a'in, q'axal yib'ru xna'leb': a'an aj yoob'anel raaxiik' sa' xyanqeb' laj Judiiy sa' chixjunil li ruuchich'och' ut aj k'amol xb'eheb' li xkomoneb' laj Nazaret.

⁶ Xraj ajwi' xmuxb'al li rochoch li Yos, ut laa'o xqachap chaq.

⁸ Patz' re ut taataw xyaalal chixjunil a k'a'aq re ru a'in li naqajit wi'.

⁹ Ke'okenk ajwi' eb' laj Judiiy chi xyeeb'al naq yaal chixjunil a'an.

¹⁰ Toja' naq li ruuchil li awab'ej kixk'e chi aatinak laj Pablo ut a'an kixye: —Laa'in ninnaw naq ak k'iila chihab' aawokik cho'q aj raqol aatin sa' li tenamit a'in; jo'kan naq chi anchal inch'ool tin'aatinaq re xkolb'al wib'.

¹¹ Toj maji' numenaq kab'laju kutan anaqwan xintaqe'k Jerusalén chi utz'uk: laa'at ajwi' tatruhanq chi xk'eeb'al reetal naq yaal li ninye.

¹² Maajun sut xine'xtaw eb' laj Judiiy chi wech'ink rik'in anihaq malaj chi xpo'b'al xch'ooleb' li tenamit sa' rochoch li Yos, chi moko sa'eb' li ch'utleb'aal kab'l malaj sa' junaq chik na'ajej sa' li tenamit.

¹³ Eb' a'in ink'a' te'ruuq chi xk'utb'al chawu naq yaal li k'aru nikine'xjit wi' anaqwan.

¹⁴ Laa'in tinye xyaalal aawe: ninloq'oni ru li xYos eb' linna' linyuwa' jo' chanru yeeb'il sa' li loq'laj B'e a'in, «jachb'il paab'aal» nayeemank re xb'aaneb' laj Judiiy. Ninpaab' chixjunil li tz'iib'anb'il sa' li Chaq'rab' ut sa' xHuheb' li Propeet,

¹⁵ ut kaw linch'ool chi royb'eninkil rik'in li Yos naq te'wakliiq wi' chik chi yo'yo li tiikeb' xch'ool ut eb' laj maak, jo' ajwi' neke'royb'eni eb' a'in.

¹⁶ Jo'kan naq laa'in ajwi' ninyal inq'e chi wank junelik chi tiik linch'ool chiru li Yos ut chiruheb' li was wiitz'in.

¹⁷ “Chirix k'iila chihab', xinchalk chi k'amok lemoox cho'q re lintenamit ut chi mayejak.

¹⁸ Xkohin sa' rochoch li Yos chi xb'aanunkil a'an. Moko k'iila tenamit ta wochb'een, chi moko nokootub'ub'nak.

¹⁹ Aran xine'xtaw eb' laj Judiiy li xe'chalk chaq sa' xsutam Asia: a'aneb' li tento raj te'xk'ut rib' chawu chinjitb'al, wi relik chi yaal wank k'aru tine'xjit wi'.

²⁰ Wi ut ink'a', xyeeqeb' a'an k'aru linmaak xe'xtaw chiwix naq xink'ame'k sa' li xraqleb'aaleb' aatin.

²¹ Mare ka'ajwi' a'in te'xtaw: wankin jun sut sa' xyanqeb' ut xinjap we chi xyeeb'al reheb': «Sa' li kutan a'in naraqmank aatin chiwix cheru laa'ex xb'aan naq ninpaab' li xwaklijikeb' chi yo'yo eb' li kamenaq»”.

Laj Pablo kik'ehe'k sa' tz'alam aran Cesarea

²² Laj Félix naxnaw chi chaab'il k'aru naxk'ut li Ak' B'e; jo'kan naq kixchaq'rab'iheb' laj jitol re laj Pablo ut kixye: —K'ulunq wan laj Lisias, li xjolomileb' laj puub', ut tinchoy xtz'ilb'al rix li nekeye.

²³ Ut kixchaq'rab'i laj k'amol xb'e eb' laj puub' chi xk'aak'alenkil laj Pablo, ab'an chixb'aanuuq sa' q'unil, ut mirame'k chiruheb' li xkomon li te'chalq chi k'anjelak chiru.

²⁴ Ink'a' ajwi' k'iila kutan chirix a'an naq kik'ulunk wi' chik laj Félix rochb'een lix Drusila li rixaqil, a'an jun li ixq aj Judiiy. Laj Félix kixb'oq chaq laj Pablo ut kirab'i chi aatinak chirix li xpaab'ankil li Kristo Jesus.

²⁵ Ab'anan, naq laj Pablo kixtikib' aatinak chirix li tiikilal, li kuyuk ib' ut li raqb'a aatin chaalel, laj Félix ki'ok xxiw ut kichaq'ok: —Tz'aqal a'in; truuq tatxik anaqwan. Jo'q'e tixk'e rib' chiwu, tintaqla wi' chik aab'oqb'al, chan.

²⁶ Laj Félix naroyb'eni ajwi' naq taak'ehe'q raj b'ayaq xtumin xb'aan laj Pablo: jo'kan naq kok'aq xsa' naxb'oq chaq ut naseeraq'ik rik'in.

²⁷ Jo'ka'in naq ke'nume'k wiib' chihab'. Chirix chik a'an ki'ok laj Porsio Festo cho'q reeqaj laj Félix; ut a'an kiraj xq'unb'esinkil xch'ooleb' laj Judiiy, jo'kan naq kixkanab' laj Pablo sa' tz'alam.