Hechos 17 - Q'eqchi Bible

Aran Tesalónika

¹ Ke'nume'k Anfípolis ut Apolonia, ut ke'wulak Tesalónika b'arwi' wank jun xch'utleb'aal kab'l eb' laj Judiiy.

² Laj Pablo ki'ok rik'ineb' jo' k'aynaq xb'aanunkil, ut chiru oxib' sábado kikanaak chi xtz'ilinkil rix li paab'aal rik'ineb': naxchap li k'aru naxye li Santil Hu,

³ naxch'olob' ut naxye xyaalal naq teneb'anb'il chaq sa' xb'een li Kriist xk'ulb'al li rahilal ut wakliik wi' chik sa' xyanqeb' li kamenaq: “Li Kriist a'in, a'an li Jesus li ninye resil eere”, chan.

⁴ Wankeb' aj Judiiy ke'xpaab' ut ke'okenk chirix laj Pablo ut laj Silas, rochb'eeneb' naab'aleb' aj Griego li neke'xiwank re li Yos jo'wi' naab'aleb' xninqaleb' ru ixq.

⁵ Ab'an eb' laj Judiiy xb'aan xkaqaleb' xch'ool ke'xch'utub' winq ink'a' useb' xch'ool ut aj b'eheb', ke'xpoqoqi li tenamit ut ke'xpo' xch'ooleb'. Ke'wulak sa' rochoch laj Jasón chi xsik'b'al laj Pablo ut laj Silas, re raj xk'amb'aleb' chiruheb' li poyanam.

⁶ Ab'anan, naq ink'a' ke'xtaw, ke'xkeleli laj Jasón ut wiib' oxib'eb' laj paab'anel, ke'xk'ameb' chiruheb' laj jolominel re li tenamit, japjookeb' re chi xyeeb'al: —Eb' li xe'xpo' xch'ool chixjunil li ruuchich'och' xe'chalk ajwi' arin,

⁷ ut laj Jasón xk'eheb' rochochnaal. Chixjunileb' a'in neke'xq'et xchaq'rab' li awab'ej xb'aan naq neke'xye naq wank jun chik awab'ej, a' li Jesus.

⁸ Naq ke'rab'i a'an, eb' li poyanam ut eb' laj jolominel ke'sachk xch'ool;

⁹ ab'anan, naq ke'xk'ul xtumineb' chi ruq' laj Jasón ut eb' li xkomon, ke'rach'ab'eb'.

Aran Berea

¹⁰ Sa' ajwi' li q'oqyink a'an, eb' laj paab'anel tikto ke'xtaqla laj Pablo ut laj Silas toj Berea. Ut eb' a'an, naq ke'wulak, koxe'okaq sa' xch'utleb'aal kab'l eb' laj Judiiy.

¹¹ Eb' a'in q'axal q'uneb' xch'ool chiruheb' li wankeb' Tesalónika: ke'xk'ulub'a li Aatin chi anchaleb' xch'ool, yookeb' chi xtz'ilinkil xsa' li Santil Hu rajlal kutan re rilb'al ma yaal li naxye laj Pablo.

¹² Naab'aleb' ke'ok chi paab'ank sa' xyanqeb' a'an. Naab'aleb' ajwi' winq ut xninqaleb' ru ixq sa' xyanqeb' laj Griego ke'xq'axtesi rib'eb'.

¹³ Naq eb' laj Judiiy li wankeb' Tesalónika ke'xnaw naq laj Pablo kixpuktesi ajwi' Raatin li Yos aran Berea, koheb' ajwi' aran ut ke'xpo' xch'ooleb' li tenamit re naq te'xpoqoqi rib'eb'.

¹⁴ Toja' naq eb' laj paab'anel ke'xtaqla chi junpaat laj Pablo toj chire li palaw; ab'an laj Silas ut laj Timoteo toj ke'kanaak Berea.

¹⁵ Eb' li ke'b'eresink re laj Pablo koxe'xkanab' toj Atenas; chirix chik a'an ke'sutq'iik Berea re xb'oqb'al laj Timoteo rochb'een laj Silas naq te'xik chi junpaat rik'in laj Pablo.

Aran Atenas

¹⁶ Naq laj Pablo yo chi royb'eninkileb' laj Timoteo ut laj Silas aran Atenas, nak'atnak sa' xch'ool chi rilb'al li tenamit nujenaq chi jalanil yos.

¹⁷ Sa' li ch'utleb'aal kab'l na'ok chi xtz'ilinkil rix li paab'aal rik'ineb' laj Judiiy ut eb' laj Griego li neke'xiwank re li Yos, ut sa' li k'ayiil rajlal kutan na'aatinak rik'ineb' li naxtaweb' aran.

¹⁸ Wankeb' ajwi' aj nahonel xninqal ru k'a'uxl, xkomoneb' laj Epikuro ut eb' laj Estoiko, ke'ok chi wech'ink rik'in. Wan ke'yehok: —K'a' anchal taaraj xyeeb'al laj b'ayol rib' a'an? Wankeb' wi' chik neke'yehok: —Mare a'an jun li na'aatinak chirixeb' jalanil yos. Ke'xye chi jo'kan xb'aan naq laj Pablo naxye resil li Jesus jo' ajwi' resil li xwaklijik wi' chik chi yo'yo.

¹⁹ Ke'xchap ut ke'xk'am sa' li na'ajej Areópago xk'ab'a', ut ke'xye re: —Ma truuq tqanaw k'aru li ak' na'leb' a'in li yookat chi xk'utb'al?

²⁰ Xb'aan naq nakatqab'i chi xyeeb'al ak' na'leb' ut tqaj xnawb'al k'aru xyaalal a'in.

²¹ Chixjunileb' laj Atenas ut eb' laj ab'l tenamit li wankeb' aran maak'a' k'a'aq re ru naxik wi' xch'ooleb', ka'aj b'an wi' chirix xyeeb'al malaj rab'inkil yalaq k'aru chi ak' na'leb'.

²² Toja' naq laj Pablo, xaqxo sa' xyi li Areópago, kixye: “Ex aj Atenas, nink'e reetal naq laa'ex tz'aqal aj loq'oninelex.

²³ Naq yookin chi b'eek ut chi xka'yankil li b'arwan nekeloq'oni, xintaw ajwi' jun li artal b'arwi' tz'iib'anb'il: «Re li Yos li ink'a' nawb'il ru». Jo'kan utan, li nekeloq'oni chi ink'a' nekenaw ru, a'an li xinchalk chi xyeeb'al resil eere.

²⁴ “Li Yos li kiyiib'ank re li ruuchich'och' ut chixjunil li wank chisa', a'an ajwi' laj eechal re li choxach'och'. Ut a'an ink'a' nahilank sa' ochoch yiib'anb'il rik'in uq'ej,

²⁵ chi moko nak'anjelaak ru rik'in ruq'eb' li winq chanchan tawi' junaq li wank sa' rajb'al ru: a'an b'an li nak'ehok re li qayu'am chiqajunilo, li qamusiq' ut chixjunil li k'a'aq re ru.

²⁶ “Rik'in jun chi winq kixyoob'tesi chixjunileb' li tenamit re naq te'wanq junsut junrub'el choxa. Kixxaqab' li saq'ehil ut li hab'alq'e, jo'wi' li xnub'ajlil li xna'ajeb' li tenamit b'arwi' te'hilanq,

²⁷ re naq te'xsik' li Yos: mare anchal te'xtaw chi maayunb'il. Relik chi yaal naq moko najt ta wank qik'in chiqajunjunqal,

²⁸ xb'aan naq rik'in li Yos yo'yooko, nokoo'eek'ank ut wanko, jo' ajwi' wank xe'yehok sa' eeyanq: «Relik chi yaal naq ralal xk'ajolo li Yos».

²⁹ Wi laa'o elenaqo chaq rik'in li Yos, ink'a' truuq taaqak'oxla naq li Yos chanchan ta li oor, li plaat malaj li pek, yiib'anb'ileb' rik'in xseeb'al ruq' ut xk'a'uxl li winq.

³⁰ Anaqwan li Yos xtz'eq chirix xch'ool eb' li kutan xe'numje'k, naq eb' li tenamit xe'wank sa' xmajelal xna'leb'eb', ut naxye resil naq yalaq b'ar tento naq chixjunileb' te'xyot' xch'ool te'xjal xk'a'uxl.

³¹ Xb'aan naq li Yos ak kixxaqab' li kutan tixraq wi' aatin sa' tiikilal sa' xb'een li ruuchich'och', sa' xk'ab'a' jun li winq xaqab'anb'il xb'aan. Kixk'ut ajwi' chiruheb' chixjunil naq tz'aqal yaal a'an, rik'in xwaklesinkil chi yo'yo li Jesus sa' xyanqeb' li kamenaq”.

³² Naq ke'rab'i chi aatinak chirix li xwaklijikeb' li kamenaq, wankeb' ke'ok chi xse'enkil laj Pablo; wankeb' chik ke'yehok: —Toj sa' jun sut chik tatqab'ihaq chi aatinak chirix a'an.

³³ Jo'kan naq ki'elk laj Pablo sa' xyanqeb'.

³⁴ Ab'anan wankeb' ajwi' ke'xtaaqe laj Pablo ut ke'ok chi paab'ank: sa' xyanqeb' a'an wank laj Dionisio, xkomoneb' laj Areópago, wank jun li ixq xDámaris xk'ab'a', jo' ajwi' jalan chik rochb'eeneb'.