Hebreos 7 - Q'eqchi Bible

Laj Melkisedek ut li Jesus

¹ Laj Melkisedek a'an awab'ej re Salem ut aj tij chiru li Nimajwal Yos. Ki'elk chi xk'ulb'al laj Abrahán, ut kirosob'tesi naq a'in yo chaq chi sutq'iik chi ak xsacheb' chaq eb' li awab'ej.

² A'an kik'uluk li xlajeetqil chixjunil sa' ruq' laj Abrahán. Li xk'ab'a' naraj naxye xb'enwa: “awab'ej re li tiikilal”; jo' ajwi' “awab'ej re Salem” (naraj naxye: “awab'ej re li tuqtuukilal”).

³ Sa' li Santil Hu maak'a' nayeemank chirix xna' xyuwa', chirixeb' li xxe' xtoon chi moko chirix xtiklajik malaj roso'jik li xyu'am; jo'kan naq juntaq'eetanb'il rik'in li Ralal li Yos, ut wank cho'q aj tij chi junajwa.

⁴ K'ehomaq reetal li xnimal xwankil laj Melkisedek, xb'aan naq li qaxe'toonil yuwa' Abrahán kixk'e li xlajeetqil li q'axal chaab'il kireechani chaq.

⁵ Relik chi yaal naq eb' li ralal xk'ajol laj Leví li neke'ok cho'q aj tij tento sa' xb'eeneb', jo' naxye li Chaq'rab', xpatz'b'al li xlajeetqil li xmayej li tenamit, us ta eb' a'an rech'alaleb' ut xkomoneb' ajwi' laj Abrahán.

⁶ Ut laj Melkisedek moko xkomoneb' ta li ralal xk'ajol laj Leví, ab'an kixk'ul li xlajeetqil chixjunil li wank re laj Abrahán; chirix chik a'an kirosob'tesi laj Abrahán, li kiyeechi'iik wi' li rosob'tesihom li Yos.

⁷ Ch'olch'o naq li kach'in xwankil na'osob'tesiik xb'aan li nim xwankil.

⁸ Arin, sa' qayanq, eb' li neke'xk'ul li xlajeetqil chixjunil, a'aneb' winq yal reheb' kamk; a'ut aran jun li toj yo'yo, jo' naxye li Santil Hu.

⁹ Naru ajwi' xyeeb'al naq laj Leví, li nak'uluk li xlajeetqil chixjunil, kitojok li xlajeetqil rik'in laj Abrahán,

¹⁰ xb'aan naq laj Leví ak wan chaq rik'in laj Abrahán li xyuwa' naq laj Melkisedek ki'elk chaq chi xk'ulb'al.

¹¹ Us b'i', wi xwank ta li kolb'a ib' sa' xk'ab'a' xk'anjeleb' laj tij aj Leví (xb'aan naq sa' xb'eeneb' k'ojk'o chaq li Chaq'rab' k'eeb'il re li tenamit), k'a' raj chik aj e naq taawakliiq jalan chik aj tij jo' chanru xk'anjel laj Melkisedek, ut ink'a' jo' laj Aharón?

¹² Xb'aan naq wi najalaak ru xyaalalil li xk'anjel laj tij, tento ajwi' naq taajalaaq ru li Chaq'rab'.

¹³ Ut li Jesus, li nayeemank wi' chixjunil a'in, jalan chik xteepalil: maajun sa' xyanqeb' li teep a'an kik'anjelak chiru li artal.

¹⁴ Ch'olch'o naq li Qaawa' yo'lajenaq chaq rik'in laj Judá; ut chirix li teepal a'in maak'a' kixye laj Moisés naq ki'aatinak chirix xk'anjeleb' laj tij.

¹⁵ Chixjunil a'in q'axal chik ch'olch'o ru wi nawakliik chaq jun chik aj tij kama' laj Melkisedek,

¹⁶ maawa' aj tij yal sa' xk'ab'a' xchaq'rab' li winq, sa' xk'ab'a' b'an xwankil jun li yu'am li ink'a' nalajk na'oso'k.

¹⁷ Jo'ka'in tz'iib'anb'il sa' li Santil Hu: “Laa'at aj tij chi junelik, jo' chanru xk'anjel laj Melkisedek”.

¹⁸ Chi jo'kan nasache'k xwankil li najteril chaq'rab' xb'aan naq maak'a' chik xwankil ut maak'a' chik na'ok wi'

¹⁹ (xb'aan naq maak'a' k'aru kitz'aqlok re ru xb'aan li Chaq'rab'), ut na'oksimank jun chik chaab'il oyb'enink li nokoojilok wi' chi xk'atq li Yos.

²⁰ Jun chik tento tinye. Moko xk'ulmank ta a'in chi maak'a' jurament. Eb' li junch'ol ke'xaqab'aak cho'q aj tij chi maak'a' jurament,

²¹ a'ut li Jesus kixaqab'aak rik'in jurament xb'aan li Yos li kixye: “Kixye li Qaawa' rik'in xjurament ut ink'a' taach'inanq xch'ool: «Laa'at aj tij chi junelik»”.

²² A'an reetalil naq li Jesus kik'ehe'k chi xkuutunkil jun ak' Sumwank, q'axal chik chaab'il chiru li xb'een.

²³ Jo'kan ajwi' eb' aj tij a'an, naab'aleb' naq ke'wank chaq xb'aan naq li kamk ink'a' kixkanab'eb' chi wank chi junelik.

²⁴ A'ut li Jesus wank cho'q aj tij chi junajwa xb'aan naq yo'yo chi junelik.

²⁵ Chi jo'kan naru ajwi' tixkoleb' chi tz'aqal re ru eb' li neke'jilok chi xk'atq li Yos sa' li xk'ab'a', xb'aan naq yo'yo chi junelik re aatinak chirixeb'.

²⁶ A'an a'in li xyuwa'il aj tij li tz'aqal aajel ru cho'q qe: sant, maak'a' xmaak, maak'a' xmuxul, jek'b'il rik'ineb' laj maak, kitaqsiik toj sa xb'een li choxa.

²⁷ Ink'a' aajel ru naq taamayejaq rajlal kutan xb'enwa chirixeb' li xmaak xjunes rib' jo' neke'xb'aanu eb' li xyuwa'il aj tij, ut moqon chik chirix li xmaakeb' li tenamit. Xb'aan naq jun sut ajwi' kimayejak li Jesus ut chi junwaakaj, naq kixyeechi'i rib'.

²⁸ Eb' li neke'xaqab'aak cho'q xyuwa'ileb' aj tij xb'aan li xChaq'rab' laj Moisés a'aneb' winq li wankeb' sa' xtoq'ob'aal ru; a'ut li raatin li jurament li kichalk moqon toj chirix li Chaq'rab', naxxaqab' li K'ajolb'ej cho'q xyuwa'il aj tij, a'an tz'aqal re ru chi junajwa.