Habacuc 1 - Q'eqchi Bible

¹ Li moy u li kik'utb'esiik xb'aan li Qaawa' chiru laj Habakuk, li propeet.

Li propeet nawech'ok rik'in li Qaawa'

² At Qaawa', jo' najtil chik japjo'q we chi xpatz'b'al intenq'ankil aawe chi ink'a' nikinaawab'i? Toj jo'q'e yooqin chi jitok xb'aan li raaxiik' chi ink'a' tatchalq chi qakolb'al?

³ K'a'ut naq nakak'e chiwil li maa'usilal ut li raaxiik' a'in? K'ajo' li rahilal ut li elq'ak! Yalaq b'ar wank li wech'ij ib' ut li yalok.

⁴ Ink'a' napaab'aak li chaq'rab' ut ink'a' chik na'uxmank li tiikilal. Li ink'a' us xna'leb' naxch'i'ch'i'i li tiik xch'ool ut naxjal xyaalal li k'ulub'ej.

Li xsumehom li Qaawa'

⁵ “Ilomaqeb' li tenamit ut k'ehomaq reetal eb' li yookeb' chi sutuk eere -chan li Qaawa'-. Ka'yahomaqeb' ut chisachq leech'ool. Ok we chi xb'aanunkil jun sachb'ach'oolej sa' eeyanq: wi ta taaseeraq'iiq eere, ink'a' raj teepaab'.

⁶ Ok we chi xwaklesinkil chaq eb' laj Kaldeha sa' eeb'een: a'an jun tenamit q'axal josq' ut junelik yo'oon wankeb' chi xik yalaq b'ar sa' ruuchich'och' chi reechaninkileb' li na'ajej li moko reheb' ta.

⁷ Q'axal kaweb' rib' ut xiwajel rilb'aleb', ut ka'ajwi' li xchaq'rab'eb' ut li xwankilaleb' neke'xpaab'.

⁸ Li xkawaayeb' jwal kaw neke'aanilak chiruheb' li hix, ut rajawal josq'eb' chiruheb' laj xojb' sa' li chaqich'och'. Numtajenaq xk'ihaleb' laj puub' ut toj najt ajwi' neke'xchap raanileb' chi yalok; chanchaneb' li t'iw li naxkut rib' sa' xb'een li xtzak.

⁹ Neke'xjuk' chixjunil b'arwi' neke'nume'k; q'axal xiwajel rilb'aleb' ut k'ajo' li poyanam neke'xchap jo' xk'ihaleb' li samahib' chire li palaw.

¹⁰ Neke'reetz'u eb' li awab'ej ut neke'xse'e li xninqaleb' ru winq. Maak'a' na'ok wi' eb' li kawub'resinb'il ochoch chiruheb', xb'aan naq neke'xtuub' li ch'och' cho'q xtaqleb'aaleb' ut neke'reechani eb' li tenamit.

¹¹ Neke'nume'k jo' li kaqsut-iq'; chirix chik a'an neke'sachk chi k'ojk'o xch'ooleb' rik'in li xkawilaleb': a'an tz'aqal neke'xk'e cho'q xyoseb'”.

Jun sut chik li propeet nawech'ok rik'in li Qaawa'

¹² At Qaawa', ma ink'a' tab'i' ak wankat chalen chaq q'e kutan, at inSantil Yos li ink'a' kaamel? At Qaawa' ut aj k'aak'alehomat we, laa'at xatk'ehok xkawilaleb' laj Kaldeha chi raqok aatin sa' qab'een re naq tqatoj rix li qamaak.

¹³ Li xtiikilal laach'ool xik' naril li maa'usilal; ink'a' nakakuy rilb'al li maa'usilal. K'a'ut naq maak'a' nakaye chirixeb' li neke'rahob'tesink, eb' li yookeb' chi xsachb'al ruheb' li jwal chaab'ileb' chiruheb' a'an?

¹⁴ K'a'ut naq nakakanab'eb' li poyanam xjuneseb' jo'eb' li kar sa' li palaw, jo'eb' li xul li maak'a' aj eechal reheb'?

¹⁵ Eb' laj Kaldeha neke'xchap laatenamit jo' tawi' li kar sa' ruq'eb' laj kar: neke'xnat' sa' li xyooyeb'; ut naq neke'ril a'an, k'ajo' naq nasaho'k sa' xch'ooleb'.

¹⁶ Jo'kan naq laj kar taamayejaq chiru li xyooy ut tixk'at li pom chiru li xluch b'aq, xb'aan naq sa' xk'ab'a' a'an wank xwa ruk'a' chi chaab'il ut chi numtajenaq.

¹⁷ Ma toj yooqeb' laj Kaldeha chi xchapb'aleb' li tenamit ut yooqeb' chi kamsink poyanam chi ink'a' neke'ril xtoq'ob'aal ruheb'?