Génesis 7 - Q'eqchi Bible

Li b'ut'iha'

¹ Chirix chik a'an li Qaawa' kixye re laj Noé: “Okan sa' li jukub' kab'l laa'at ut chixjunileb' li wankeb' sa' laawochoch, xb'aan naq xwil naq ka'jat wi' laa'at tiik aach'ool sa' li tenamit a'in.

² Taak'am wuqutq sumal li xul li neke'tiwe'k, teelom ut ixq; taak'am ajwi' jun sumalaq li ink'a' chaab'il, teelom ut ixq.

³ Jo'kan ajwi' wuqutq sumal li xul li neke'rupupik chiru choxa, tzo' ut tux, re naq chikole'q riyajileb' sa' ruuchich'och'.

⁴ Sa' wuqub' li kutan chik tintaqla li hab' sa' xb'een li ruuchich'och' chiru ka'k'aal q'oqyink, ut talajinsacheb' sa' ruuchich'och' chixjunil linyoob'tesihom”, chan li Qaawa'.

⁵ Laj Noé kixb'aanu chixjunil li kitaqlaak wi' xb'aan li Qaawa'.

⁶ Lajeek'aal xkab' o'q'ob' (600) chihab' wank re laj Noé naq kichalk li hab' ut kiwank li b'ut'iha' sa' ruuchich'och'.

⁷ Laj Noé ki'ok sa' li jukub' kab'l rochb'eeneb' li ralal, li rixaqil ut li ralib'eb' re xkolb'aleb' rib' chiru li b'ut'iha'.

⁸ Chi sumalil rochb'een laj Noé ke'ok sa' li jukub' kab'l eb' li chaab'il xul ut eb' li ink'a' chaab'il, eb' li neke'rupupik ut eb' li neke'xjukuki rib' chiru ch'och',

⁹ teelom ut ixq, jo' kiyehe'k re laj Noé xb'aan li Yos.

¹⁰ Wuq'ejeraq chik a'an kichalk li b'ut'iha' sa' ruuchich'och'.

¹¹ Lajeek'aal xkab' o'q'ob' (600) chihab' wank re laj Noé naq kik'ulmank a'an: sa' li wuqlaju xb'e li xkab' po ke'puk'je'k chaq li ha' li wankeb' taq'a jo' ajwi' li wankeb' taqe'q.

¹² Kikoq'e' chaq li hab' chi q'axal kaw sa' xb'een li ruuchich'och' chiru ka'k'aal kutan ut ka'k'aal q'oqyink.

¹³ Sa' ajwi' li kutan a'an ki'ok laj Noé sa' li jukub' kab'l rochb'eeneb' li ralal, laj Sem, laj Kam ut laj Jafet. Ki'ok ajwi' li rixaqil ut chi roxichaleb' li ralib',

¹⁴ rochb'eenatqeb' li jar paay chi xulil, chixjunileb' li ketomq, li jar paay chi xul li neke'xjukuki rib' chiru ch'och' ut eb' li neke'rupupik chiru choxa, chixjunileb' li jar paay chi aj xik'anel xul.

¹⁵ Ke'ok rochb'een laj Noé sa' li jukub' kab'l junq sumal li junjunq chi xul:

¹⁶ teelom ut ixq eb' li ke'ok aran, jo' kiyehe'k re xb'aan li Yos. Ut naq ak x'ok laj Noé, li Qaawa' kixtz'ap li okeb'aal chirix.

¹⁷ Ka'k'aal kutan kiwank li b'ut'iha' sa' ruuchich'och'. Kib'ut'unk li ha' ut kixwaklesi li jukub' kab'l, ut a'in kiterq'usiik sa' xb'een li ch'och'.

¹⁸ Kihelq'uuk ut q'axal kichamo' li ha' sa' ruuchich'och', ut li jukub' kab'l napamamnak sa' xb'een li ha'.

¹⁹ Rajlal yo chi chamo'k li ha' toj reetal ke'muqunk li ninqi tzuul li wankeb' junsut junrub'el choxa.

²⁰ Numenaq kaahib' moqoj kitaqe'k xteram li ha': ke'muqunk chixjunileb' li tzuul.

²¹ Jo'kan naq kilaje'kamk chixjunileb' li wankeb' sa' ruuchich'och': eb' li xul li neke'xjukuki rib' chiru ch'och', eb' li neke'rupupik chiru choxa, li ketomq, chixjunileb' li xul ut chixjunil li na'eek'ank sa' ruuchich'och' ut chixjunileb' li tenamit.

²² Kilaje'kamk chixjunileb' li neke'musiq'an ut chixjunil li wank sa' ruuchich'och'.

²³ Li Qaawa' kixsach jo'ch'inal jo'nimal wank sa' ruuchich'och'. Ke'sache'k li tenamit jo' ajwi' li ketomq, eb' li xul li neke'xjukuki rib' chiru ch'och' ut eb' li neke'rupupik chiru choxa: chixjunileb' kilaje'sachk sa' ruuchich'och', ka'aj chik laj Noé kikanaak rochb'eeneb' li wankeb' sa' li jukub' kab'l.

²⁴ Li ha' kib'ut'unk sa' ruuchich'och' chiru lajeeb' xwaqxaqk'aal (150) kutan.