Génesis 5 - Q'eqchi Bible

Eb' li ralal xk'ajol laj Adán

¹ A'aneb' a'in li xk'ab'a'eb' li ralal xk'ajol laj Adán. Sa' li kutan kiyoob'tesiik wi' xb'aan li Yos, laj Adán kik'ehe'k jo' xjalam u li Yos.

² Teelom ut ixq naq ke'yoob'tesiik. Li Yos kirosob'tesiheb' ut “poyanam” kixk'e cho'q xk'ab'a'eb' sa' li kutan ke'yoob'tb'esiik wi'.

³ Lajeeb' xwuqk'aal (130) chihab' wank re laj Adán naq kiwank chik jun ralal jo' tz'aqal xjalam u, jo' rilob'aal a'an; aj Set kixk'e cho'q xk'ab'a'.

⁴ Chirix xyo'lajik laj Set, laj Adán toj kiwank chik wiib' o'q'ob' (800) chihab' sa' li ruuchich'och', ut ke'wank ralal xk'ajol.

⁵ Lajeeb' xwuqka'k'aal rox o'q'ob' (930) chihab' wank re laj Adán naq kikamk.

⁶ Oob' xwaqk'aal chihab' (105) wank re laj Set naq kiyo'laak laj Enós.

⁷ Chirix xyo'lajik laj Enós, toj wuqub' rox o'q'ob' chihab' (807) kiyo'yook laj Set sa' ruuchich'och', ut ke'wank ralal xk'ajol.

⁸ Kab'laju xwaqk'aal rox o'q'ob' (912) chihab' wank re laj Set naq kikamk.

⁹ Lajeeb' ro'k'aal (90) chihab' wank re laj Enós naq kiyo'laak laj Kenán.

¹⁰ Chirix xyo'lajik laj Kenán, toj o'laju rox o'q'ob' (815) chihab' kiyo'yook laj Enós sa' ruuchich'och', ut ke'wank ralal xk'ajol.

¹¹ Oob' xwaqk'aal rox o'q'ob' (905) chihab' wank re laj Enós naq kikamk.

¹² Laj Kenán lajeeb' xkaak'aal (70) chihab' wank re naq kiyo'laak laj Mahalalel.

¹³ Chirix xyo'lajik laj Mahalalel, toj ka'k'aal rox o'q'ob' (840) chihab' chik kiyo'yook laj Kenán sa' ruuchich'och', ut ke'wank ralal xk'ajol.

¹⁴ Lajeeb' xwaqk'aal rox o'q'ob' (910) chihab' wank re laj Kenán naq kikamk.

¹⁵ Laj Mahalalel oob' xkaak'aal (65) chihab' wank re naq kiyo'laak laj Yéred.

¹⁶ Chirix xyo'lajik laj Yéred toj lajeeb' xka'k'aal rox o'q'ob' (830) chihab' chik kiyo'yook laj Mahalalel sa' ruuchich'och', ut ke'wank ralal xk'ajol.

¹⁷ O'laju ro'k'aal rox o'q'ob' (895) chihab' wank re laj Mahalalel naq kikamk.

¹⁸ Laj Yéred wiib' xb'eleek'aal (162) chihab' wank re naq kiyo'laak laj Enok.

¹⁹ Chirix xyo'lajik laj Enok, toj wiib' o'q'ob' (800) chihab' chik kiyo'yook laj Yéred sa' ruuchich'och', ut ke'wank ralal xk'ajol.

²⁰ Wiib' xb'eleek'aal rox o'q'ob' (962) chihab' wank re laj Yéred naq kikamk.

²¹ Laj Enok oob' xkaak'aal (65) chihab' wank re naq kiyo'laak laj Matusalén.

²² Laj Enok kiwank sa' sum'aatin rik'in li Yos. Chirix xyo'lajik laj Matusalén toj o'lajuk'aal (300) chihab' chik kiyo'yook laj Enok sa' ruuchich'och', ut ke'wank ralal xk'ajol.

²³ Chixjunil li xyu'am laj Enok a'an oob' xb'eleelajuk'aal (365) chihab'.

²⁴ Laj Enok kiwank sa' sum'aatin rik'in li Yos. Sa' jun kutan ink'a' chik ki'ile'k ru, xb'aan naq kolsaapuuq xb'aan li Yos.

²⁵ Oob' xlajeek'aal (187) chihab' wank re laj Matusalén naq kiyo'laak laj Lámek li ralal.

²⁶ Chirix xyo'lajik laj Lámek toj wiib' xkab' ro'q'ob' (782) chihab' chik kiyo'yook laj Matusalén sa' ruuchich'och', ut ke'wank ralal xk'ajol.

²⁷ B'eleeb' xb'eleek'aal rox o'q'ob' (969) chihab' wank re laj Matusalén naq kikamk.

²⁸ Wiib' xlajeek'aal (182) chihab' wank re laj Lámek naq kiyo'laak jun ralal,

²⁹ aj Noé kixk'e cho'q xk'ab'a', xb'aan naq kixye: “Li Qaawa' kixtz'eqtaana li ch'och'. Ab'an li k'uula'al a'in tixk'ojob' qach'ool chirix li kawil k'anjel naqab'aanu”, chan laj Lámek.

³⁰ Chirix xyo'lajik laj Noé, toj o'laju xlajeek'aal xkab' o'q'ob' (595) chihab' chik kiyo'yook laj Lámek sa' ruuchich'och', ut ke'wank ralal xk'ajol.

³¹ Wuqlaju xb'eleelajuk'aal xkab' o'q'ob' (777) chihab' wank re laj Lámek naq kikamk.

³² Laj Noé o'k'aal xkab' o'q'ob' (500) chihab' wank re naq ke'yo'laak laj Sem, laj Kam ut laj Jafet, eb' li ralal.