Gálatas 6 - Q'eqchi Bible

Li xchaq'rab' li Kriist

¹ Ex was wiitz'in, wi wank junaq taat'ane'q sa' junaq maak, laa'ex li nujenaqex chi musiq'ej chetenq'a re naq tixyiib' li xyu'am; ab'an chetenq'a sa' tuulanil, ut chak'e reetal chi us laayu'am, mat-aaleek ajwi' laa'at.

² Chetenq'a eerib' cherib'il eerib' chi xk'amb'al leeriiq, ut teepaab' chi jo'kan li xchaq'rab' li Kriist.

³ Wi wank junaq li naxk'oxla rib' naq nim xwankil, chi maak'a' xwankil, a'an yo chi xb'alaq'inkil rib' xjunes.

⁴ Li junjunq chixk'ehaq reetal chanru li xb'aanuhom; chi jo'kan wank k'aru tixnima wi' rib' xjunes ut ink'a' yal chirix jalan chik,

⁵ xb'aan naq li junjunq tento tixk'am li riiq.

⁶ Li natzole'k rik'in li Aatin chixwotzaq chixjunil li k'aru wank re rik'in li natzolok re.

⁷ Meeb'alaq'i eerib', li Yos ink'a' naru xb'atz'unenkil: li k'aru naraw li winq, a'an ajwi' li tixq'ol.

⁸ Ani na'awk cho'q re li xtz'ejwal, a' li q'aak tixq'ol rik'in li tz'ejwalej; ani na'awk cho'q re li musiq'ej, rik'in li Musiq'ej tixq'ol li junelik yu'am.

⁹ Moolub'k chi xb'aanunkil li us xb'aan naq sa' xq'ehil tooq'oloq, wi ink'a' nach'inank qach'ool.

¹⁰ Jo'kan utan, naq toj naxk'e rib' chiqu, qab'aanuhaq li usilal reheb' chixjunil, ab'anan q'axal chik tqab'aanu reheb' li qech aj paab'anelil.

Xraqik li hu

¹¹ Ilomaq xninqal li tz'iib' yookin chi xtz'iib'ankil cho'q eere rik'in wuq'.

¹² Eb' li neke'minok eeru chi xk'ulb'al li sirkunsisyon, a'aneb' li neke'raj naq sa ilb'ilaqeb' xb'aaneb' li tenamit, yal re naq ink'a' te'rahob'tesiiq sa' xk'ab'a' li xkrus li Kriist.

¹³ Eb' a'an ak xk'ulumeb' li sirkunsisyon, ab'an ink'a' neke'xpaab' xChaq'rab' laj Moisés; ka'ajwi' neke'raj naq teek'ul li sirkunsisyon re te'xnimob'resi rib' rik'in naq setb'il xtz'uumal leetz'ejwal.

¹⁴ A'ut laa'in maajaruj tinnimob'resi wib' injunes, wi ta ink'a' sa' xk'ab'a' li xkrus li Qaawa' Jesukriist. Sa' xk'ab'a' a'an, li ruuchich'och' nakanaak chi tz'eqtaananb'il cho'q we, jo' li k'eeb'il chiru krus; ut jo'kan ajwi' laa'in cho'q re li ruuchich'och'.

¹⁵ Maak'a' na'ok wi' xk'ulb'al li sirkunsisyon malaj ut ink'a'; li tz'aqal aajel ru a'an li wank chi ak' xyoob'tesihom li Yos.

¹⁶ Tuqtuukilal ut uxtaanal chiwanq taxaq rik'in chixjunileb' li te'paab'anq re li chaq'rab' a'in; jo'kanaq ajwi' rik'in chixjunil li x'Israel li Yos.

¹⁷ Ut chalen anaqwan maa'ani chik chich'i'ch'i'inq we, xb'aan naq wankeb' sa' linjunxaqalil li reetalil li Jesus.

¹⁸ Ex was wiitz'in, li rusilal li Qaawa' Jesukriist chiwanq taxaq eerik'in. Jo'kan taxaq.