Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Filipenses 2 - Q'eqchi Bible


Li junajil sa' q'unil ch'oolej

1 K'ojk'o linch'ool naq li Kriist xb'oqok eere chi waklesink ch'oolej ut li xrahom nekextaqla chi xk'ojob'ankil xch'ooleb' leeras eeriitz'in; wotz nekextz'aqonk rik'in jun chi Musiq'ej, aj uxtaanex ut chaab'il leeraanm.

2 Jo'kan naq nintz'aama cheru naq chetz'aqob'resi xsahilal inch'ool, junajaq ru leek'a'uxl, leeraanm ut leemusiq' sa' li rahok.

3 Mik'a' eeb'aanu sa' q'etq'etil chi moko yal re xnimob'resinkil eerib', chekub'siiq b'an eewankil; li junjunq tixk'oxla naq eb' li xkomon q'axal ninqeb' chik xwankil chiru.

4 Maa'ani chixsik' li us ka'ajwi' cho'q re xjunes, chixsik'aq aj b'an wi' cho'q reheb' li ras riitz'in.

5 Li na'leb' kiwank rik'in li Kristo Jesus a'an ajwi' chiwanq eerik'in:

6 A'an, us ta wank xyosilal, ab'an ink'a' kixk'oxla xk'uulankil ka'ajwi' cho'q re li wank chi juntaq'eet rik'in li Yos,

7 kixmaak'a'i b'an rib' sa' xyu'am, kixk'am rib' kama' junaq moosej, kixk'am qach'och'el qasululel ut chanchan qech winqilal naq kixk'ut rib'.

8 Kixkub'si rib' ut kipaab'ank toj reetal sa' li xkamik, a' li xkamik chiru krus.

9 Jo'kan naq kitaqsiik xwankil xb'aan li Yos ut kixmaatani li k'ab'a'ej q'axal nim xloq'al chiruheb' chixjunil li k'ab'a'ej,

10 re naq sa' xk'ab'a' li Jesus te'xwiq'ib' rib' chixjunileb' li wankeb' sa' choxa, sa' ruuchich'och' ut rub'el ch'och',

11 ut li junjunq tixch'olob' rik'in xtz'uumal re naq li Jesukriist a'an li Qaawa', re li xnimal xloq'al li Yos Yuwa'b'ej.


Chexk'anjelaq chirix leekolb'al

12 Jo'kan utan, ex was wiitz'in raarookex inb'aan, jo' naq xexpaab'ank chiwu chi junelik, moko ka'aj ta wi' naq wankin chaq eerik'in, jo'kan ajwi' teeb'aanu anaqwan naq maa'anihin sa' eeyanq. Chexk'anjelaq chi kaw chirix leekolb'al chi wanq eexiw ut texsiksotq,

13 xb'aan naq a' li Yos na'eek'asink eere chi rahok ut chi k'anjelak, jo' chanru na'alaak sa' xch'ool.

14 B'aanuhomaq chixjunil chi maak'a'aq xchoqoqinkil ut xwech'inkil eerib',

15 re naq wanqex chi maak'a'aq eeq'usb'al ut saqaq ru leech'ool, ralalaqex li Yos chi maak'a' eemaak sa' xyanqeb' li tenamit a'an ink'a' useb' ut sachenaqeb' sa' li maak. Sa' xyanqeb' a'an nekexlemtz'unk jo'kex li chahim sa' ruuchich'och',

16 chi kaw chapchookex rik'in li aatin nak'ehok yu'am. Chi jo'kan truuq tintaw inloq'al sa' xkutankil li Kriist xb'aan naq ink'a' xin'aanilak chi maak'a' rajb'al, chi moko xintawasi wib' chi maak'a' aj e.

17 Us ta taa'isiiq linkik'el ut taahoye'q sa' xb'een leeloq'laj yeechi'om b'arwi' nekemayeja leepaab'aal, maak'a' naxye, taasaho'q raj sa' inch'ool ut tintz'aqonq raj sa' xsahil leeraanm.

18 Jo'kanaqex ajwi' laa'ex: chexsaho'q ut chextz'aqonq sa' li xsahil inch'ool.


Laj Timoteo ut laj Epafrodito

19 Nim li Qaawa' Jesus sa' inb'een, kaw inch'ool naq chi seeb' tintaqla laj Timoteo eerik'in, re naq taak'ojlaaq ajwi' linch'ool rik'in rab'inkil leeresil.

20 Xb'aan naq maa'ani wank wik'in jo'kan ta xna'leb', maa'ani nak'oxlak cherix laa'ex jo' a'an:

21 chixjunileb' neke'xsik' li us ka'ajwi' cho'q reheb' ut maawa' li us cho'q re li Kristo Jesus.

22 A'ut laa'ex ak nekenaw xchaab'ilal li xna'leb' laj Timoteo: kama' junaq alalb'ej chiru li xyuwa', jo'kan naq kik'anjelak wochb'een chirix li Chaab'il Esilal.

23 A'an nink'oxla xtaqlankil eerik'in chi junpaat; ka'ajwi' twil k'aru tinkanaaq wi' laa'in.

24 Ut toj kaw inch'ool rik'in li Qaawa' naq laa'in ajwi' tinxik chi seeb' eerik'in.

25 Xink'oxla ajwi' naq tento tintaqla eerik'in li wiitz'in Epafrodito, wech aj k'anjelil ut wech soldaadil, li xetaqla chaq chintenq'ankil naq wankin sa' rajb'al ru.

26 Q'axal taaraj rilb'al wi' chik eeru chejunilex ut yo xk'a'uxl cherix, xb'aan naq xerab'i resil li xyajel.

27 Relik chi yaal naq kiyajerk, kach'in chik maa kikamk. Ab'an li Yos ki'uxtaanank ru, ut moko ka'aj ta wi' a'an, kiruxtaana aj b'an wi' wu laa'in re naq ink'a' taanumtaaq xrahil inch'ool.

28 Jo'kan naq tinseeb'a wib' chi xtaqlankil eerik'in re naq taasaho'q eech'ool naq teeril wi' chik ru, ut taak'ojlaaq ajwi' b'ayaq inch'ool laa'in.

29 Chek'ulaq b'i' laj Epafrodito sa' xk'ab'a' li Qaawa' chi anchal leeraanm, ut cheroxloq'iheb' li winq jo'keb' a'an,

30 xb'aan naq kach'in chik maa kikamk naq yo chi k'anjelak chirix li Kriist: kixk'e sa' ra li xyu'am re xb'aanunkil li k'anjel li ink'a' kexruhank laa'ex xb'aanunkil chiwu.

Q'eqchi DC Bible © Bible Society in Guatemala, 2005.

Bible Society in Guatemala
ကြှနျုပျတို့နောကျလိုကျပါ:



ကြော်ငြာတွေ