Filemón 1 - Q'eqchi Bible

Xk'eeb'al sahil ch'oolej

¹ Laa'in laj Pablo li wankin sa' tz'alam sa' xk'ab'a' li Kristo Jesus, wochb'een laj Timoteo li qiitz'in, nintz'iib'ak rik'in laj Filemón li raaro qab'aan ut qochb'een chi k'anjelak,

² jo' ajwi' rik'in li Iklees li nach'utlaak sa' li rochoch. Nintz'iib'ak ajwi' rik'in lix Apfia li qanab' ut rik'in laj Arkipo li xooxtenq'a chi kaw sa' xk'anjel li Yos.

³ Chiwanq taxaq eerik'in li usilal ut li tuqtuukilal nachalk rik'in li Yos li qaYuwa' ut rik'in li Qaawa' Jesukriist.

Laj Pablo nayoxink chiru li Yos

⁴ Junelik ninyoxink chiru linYos naq yookin chajultikankil sa'eb' lintij,

⁵ xb'aan naq nawab'i resil chanru nakara ut nakapaab' li Qaawa' Jesus, re rusilankil chixjunileb' laj santil paab'anel.

⁶ Juntaq'eet laapaab'aal rik'in li qe laa'o. Nintz'aama b'i' naq chik'utunq a'an rik'in xnawb'al chixjunil li us li naru xb'aanunkil cho'q re li Kriist.

⁷ At wiitz'in, k'ajo' naq xsaho'k ut xk'ojlaak linch'ool xb'aan laarahom, xb'aan naq nasaanak sa' xch'ooleb' laj santil paab'anel sa' aak'ab'a'.

Laj Pablo na'okenk chirix laj Onésimo

⁸ Jo'kan utan, us ta wank inwankil sa' xk'ab'a' li Kriist re aataqlankil chi xb'aanunkil li uxk taaraj,

⁹ ab'an nawaj relajinkil aawu sa' xk'ab'a' li rahok, laa'in laj Pablo, ak xikenaq linchihab' ut anaqwan wankin sa' tz'alam sa' xk'ab'a' li Kristo Jesus.

¹⁰ Nintz'aama usilal chawu chirix laj Onésimo li walal li xinsiya sa' tz'alam.

¹¹ Junxil laj Onésimo maak'a' na'ok wi' chawu, a'ut anaqwan chaab'il aj k'anjel chik chawu jo'wi' chiwu laa'in.

¹² A'in tz'aqal ralal xk'ajol linch'ool, ut anaqwan nintaqla wi' chik aawik'in.

¹³ Laa'in toj xwaj raj xkanaak wik'in re taak'anjelaq chiwu jo' aawuuchil naq toj wankin sa' tz'alam xb'aan li Chaab'il Esilal;

¹⁴ ab'anan maak'a' xwaj xb'aanunkil chi ink'a' xb'enwa xwab'i k'aru nakak'oxla chirix, re naq ink'a' minb'ilaq aawu chi xb'aanunkil li usilal a'in, chi anchalaq b'an aach'ool.

¹⁵ Mare a'in aj e naq xatxkanab' chaq laj Onésimo chiru jarub'aq kutan: re naq anaqwan taakanaaq chi junajwa aawik'in.

¹⁶ Ut ink'a' chik jo' loq'b'il aj k'anjel, jo' b'an chik li naq'axok ru li loq'b'il aj k'anjel, jo' jun li qiitz'in q'axal raaro. Jo'kan ninra laj Onésimo laa'in. Ma toja' ta chik laa'at sa' xk'ab'a' naq aawiitz'in ut aj paab'anel.

¹⁷ Jo'kan utan, wi nakaweek'a naq wankin sa' komonil aawik'in, chak'ulaq a'an kama' tz'aqal laa'in.

¹⁸ Ut wi xmaakob'k chawu malaj wank xk'as aawik'in, k'e cho'q ink'as laa'in.

¹⁹ Laa'in laj Pablo yookin chi tz'iib'ak rik'in wuq'. Laa'in tintojoq re. Nawaj ajwi' xyeeb'al aawe naq laa'at wank aak'as chiwu: a'an laajunxaqalil yu'am.

²⁰ Yaal, at wiitz'in, b'aanu we li usilal a'in sa' xk'ab'a' li Qaawa'. Chak'ojob' taxaq inch'ool sa' xk'ab'a' li Kriist.

²¹ Xintz'iib'ak aawik'in chi k'ojk'o li waanm naq taab'aanu li usilal a'in; ut ninnaw naq q'axal naab'al chik taab'aanu chiru li nintz'aama aawe.

Xchaq'rab'inkileb' laj paab'anel

²² Jo'kan ajwi' chakawresi wochochnaal, xb'aan naq yookin chi xyo'oninkil naq sa' xk'ab'a' leetij chi'usilaaq taxaq eeru re tinwulaq eerik'in.

²³ Naxtaqla xsahil aach'ool laj Epafras, li wech preexil sa' xk'ab'a' li Kristo Jesus.

²⁴ Jo'kaneb' ajwi' li wochb'eeneb' chi k'anjelak: laj Markos, laj Aristarko, laj Demas ut laj Lukas.

²⁵ Chiwanq taxaq eerik'in li rusilal li Qaawa' Jesukriist!