Ezequiel 9 - Q'eqchi Bible

Eb' laj Jerusalén te'xtoj rix li xmaakeb'

¹ Chirix chik a'an li Qaawa' ki'aatinak sa' linxik chi kaw xyaab' li xkux, ut kixye we: “Kimqex laa'ex li texsachoq re li tenamit, ut wankaq chaq leech'iich' re sachok sa' leeruq'”.

² Toja' naq ke'wil waqib' chi winq yookeb' chi ok sa' li Nimla Okeb'aal li wank sa' xjayal releb'l iq', ut li junjunq wan chaq xch'iich' re kamsink sa' ruq'. Sa' xyanqeb' a'an wan chaq jun li winq tiqto rik'in saqi aq'ej liin, ut b'ak'b'o chaq chi xsa' jun tz'iib'leb'. Naq ke'ok sa' li rochoch li Yos, koxe'xxaqab' rib' chi xk'atq li artal q'anch'iich'.

³ Tikto li xloq'al li xYos laj Israel ki'elk sa' xb'eeneb' li kaahib' chi kerubín b'arwi' xwank xb'enwa, ut koho chire li okeb'aal. Li Qaawa' kixb'oq li winq tiqto rik'in saqi aq'ej liin ut b'ak'b'o li xtz'iib'leb' chi xsa',

⁴ ut kixye re: “B'eeni li tenamit Jerusalén ut k'e reetalileb' chi xpeekem eb' li yookeb' chi yaab'ak ut tz'uyink xb'aan li k'iila maa'usilal na'uxmank aran”.

⁵ Chirix chik a'an kiwab'i naq li Qaawa' kixye reheb' li oob' chik winq: “B'eeniiq li tenamit chirix laj tz'iib' ut kamsinqex, chi maajun teeril xtoq'ob'aal ru chi moko teekuy xmaakeb'.

⁶ Kamsihomaqeb' li cheekel winq, eb' li saaj al, eb' li tuq'ixq, eb' li kok'al ut eb' li ixq, toj reetal naq maajun chik taakanaaq. Ab'anan meekamsiheb' li wankeb' reetalil chi xpeekemeb', ut tikib'omaq wan wi' linsantil ochoch”. Toja' naq eb' li winq ke'xtikib' xkamsinkileb' li cheekel winq li wankeb' chiru li rochoch li Yos.

⁷ Moqon kiyeemank reheb': “Ayuqex sa' li wochoch ut sachomaq li xloq'al; tuub'omaq eb' li kamenaq chiru li xneb'aalil”. Sa' junpaat koheb' ut ke'ok chi kamsink poyanam sa' li tenamit.

⁸ Naq yookeb' chi kamsink, laa'in kinkanaak injunes. Kinwiq'laak ut kinhupub' wib' chiru ch'och', ut kinjap we chi xyeeb'al xb'aan xrahil linch'ool: “At Qaawa', ma taawisi laajosq'il sa' xb'eeneb' laj Jerusalén toj reetal taasach ru li rela' laj Israel?”.

⁹ Li Qaawa' kichaq'ok ut kixye we: “Q'axal numtajenaq li xmaakeb' laj Israel ut eb' laj Judá. Nujenaq chi kamenaq chixjunil li tenamit; maak'a' chik tiikilal aran Jerusalén. Sa' xch'ooleb' a'an naq xinkanab' xjunes li tenamit ut ink'a' nawil li k'aru yookeb' chi xb'aanunkil.

¹⁰ Jo'kan naq laa'in ink'a' twil xtoq'ob'aal ruheb' chi moko tinkuy li xmaakeb'; anaqwan tinraq aatin sa' xb'eeneb' jo' chanru li xyehom ut xb'aanuhomeb'”, chan li Qaawa'.

¹¹ Sa' li honal a'an kisutq'iik chaq li winq li tiqib'anb'il rik'in saqi aq'ej liin ut b'ak'b'o li xtz'iib'leb' chi xsa', ut kixye: “Ak xinb'aanu chixjunil li k'aru xinaataqla wi'”, chan re li Qaawa'.