Ezequiel 7 - Q'eqchi Bible

Nach' chik wank li xhonalil li rahilal

¹ Li Qaawa' ki'aatinak wi' chik wik'in ut kixye we:

² “At kaamel winq, jo'ka'in xye li Qaawa' reheb' li ralal xk'ajol laj Israel: Xwulak xkutankil li oso'k, ak xwulak xhonalil li roso'jik chixjunil li na'ajej a'in.

³ Xwulak xhonalil laasachik, a Israel. Ok we chi risinkil linjosq'il sa' aab'een; tinraqoq aatin chirix laayehom laab'aanuhom ut taatoj rix laatz'i'b'eetalil na'leb'.

⁴ Ink'a' twil xtoq'ob'aal aawu chi moko tinkuy laamaak, tatink'e b'an chi xtojb'al rix laamaa'usilal; tinjultika chawu laajo'maajo'il b'aanuhom, ut aran teenaw naq laa'in li Qaawa'.

⁵ “Laa'in li Qaawa' ninye chi jo'ka'in: Chalk re jun nimla rahilal, naab'al li rahilal taachalq sa' aab'een.

⁶ Chalk re laasachik; ak yo'oon wan chaq li roso'jik sa' aab'een, chi maak'a' taaramoq chaq re.

⁷ Xtaw xq'ehil cho'q eere, ex poyanam. Xwulak li xhonalil, nach' chik wank li xkutankil li Qaawa' naq junes poqoqij ib' taawanq sa'eb' li tzuultaq'a, ut maak'a'aq chik li sahil ch'oolejil.

⁸ Tikto twisi linjosq'il sa' aab'een, toj reetal taak'ojlaaq linch'ool; tinraq aatin sa' xb'een laamaa'usilal ut tatink'e chi xtojb'al rix chixjunil laajo'maajo'il b'aanuhom.

⁹ Ink'a' twil xtoq'ob'aal aawu chi moko tinkuy laamaak, tatink'e b'an chi xtojb'al rix laamaa'usilal; tinjultika chawu laajo'maajo'il b'aanuhom, ut aran teenaw naq laa'in li Qaawa', li yookin chi rahob'tesink eere.

¹⁰ “K'e reetal, a'an a'in li kutan! Li maa'usilal yo chi numtaak yalaq b'ar ut k'ajo' li nimank wankilal.

¹¹ Yo chi pukank li raaxiik' yalaq b'ar ut k'ajo' li maa'usilal naxk'am chaq!

¹² Xtaw xq'ehil ut xwulak li xkutankil. Ink'a' chisaho'q xch'ool li naloq'ok chi moko chiyaab'aq li nak'ayink, xb'aan naq tinsach ru chixjunileb' li poyanam xb'aan linjosq'il.

¹³ Laj k'ay ink'a' chik tixxok li k'aru xk'ayi, chiru chixjunil li xyu'am. Xb'aan naq maak'a' chik xramb'al li raaxiik' chaalel, ut maajun chik taaruhanq chi xkolb'al rib' xb'aan li xmaak.

¹⁴ “Yaab'asihomaq li pur ut kawresihomaq chixjunil; ab'anan maajun taaxik chi yalok, xb'aan naq yo injosq'il sa' xb'eeneb' chixjunil li poyanam.

¹⁵ Chirix li tenamit yo li raaxiik', ut chisa' wank li yajel ut li we'ej. Li ani wanq chaq sa' k'aleb'aal, taakamsiiq chi ch'iich', ut li ani wanq sa' li tenamit taakamq xb'aan li we'ej ut li yajel.

¹⁶ Eb' li te'ruhanq chi elelik, te'xb'eeni rib' sa'atqeb' li k'iche', tz'uyuynaqeb' xb'aan li xmaakeb', jo'qeb' li mukuy xib'esinb'ileb'.

¹⁷ Chixjunileb' te'ch'inanq xch'ool ut siksootqeb' xb'aaneb' xxiw.

¹⁸ Te'xk'e q'es ruhil t'ikr chirixeb' chi k'ajo'aqeb' xxiw; numtajenaqaq xxutaan ut joob'ilaq chik li xjolomeb'.

¹⁹ Te'xpaji li plaat sa'eb' li b'e ut te'xkuti li oor jo' tawi' li mul. Li oor ut li plaat li wank rik'ineb', ink'a' te'kole'q xb'aan sa' xkutankil xjosq'il li Qaawa'. Ink'a' tixkotz li xtz'okajikeb' chi moko tixk'ojob' li xch'ooleb', xb'aan naq li b'ihomal xk'amok reheb' chi maakob'k.

²⁰ Xe'q'etq'eto'k xb'aan li xchaq'alil ru eb' li xlemtz'il q'ol, ut rik'in a'an xe'xyiib'atq li xreemaaru aj yoseb'. Jo'kan naq tinkanab' cho'q mul chixjunil a'an.

²¹ Tinq'axtesi sa' ruq'eb' li jalan xtenamiteb', jo' xq'ajkamunkileb' li reemaaru aj poyanam li wankeb' sa' ruuchich'och', re naq te'xmux ru.

²² Tinkanab' xjunes li tenamit a'in ut tink'e chi muxe'k xloq'al linsantil ochoch: te'chalq laj elq', te'ok sa' li wochoch ut te'xmux xloq'al.

²³ “Kawresi junaq kareen, xb'aan naq xiikil li kamsij ib' ut k'ajo' li rahilal sa' li tenamit.

²⁴ Laa'in tink'ameb' chaq maa'us aj tenamit sa' xb'een, re naq tole'reechani eb' li ochoch. Tinsach li k'aru neke'xq'etq'eti wi' rib' li ninqeb' xwankil ut taamuxmanq ru li xtijob'aaleb'.

²⁵ K'ajo'aq li xiw taachalq sa' xb'eeneb': te'xsik' raj li tuqtuukilal, ab'anan maab'ar te'xtaw.

²⁶ Junes raaxiik' ut resil li rahilal taachalq. Te'patz'oq moy u re li propeet, ab'anan yal maak'a'aq rajb'al; li chaq'rab' taasachq sa' xch'ooleb' laj tij, ut eb' li cheekel winq maak'a'aq chik xna'leb'eb'.

²⁷ Li awab'ej wanq sa' rahil ch'oolej, li xnimal ru winq sachsooq xna'leb', ut taach'inanq xch'ooleb' li tenamit. Tinraqoq aatin sa' xb'eeneb' jo' chanru li xyehom xb'aanuhomeb', ut te'xk'ul li k'aru xk'ulub'eb' wi'. Chi jo'kan te'xnaw naq laa'in li Qaawa'”.