Ezequiel 34 - Q'eqchi Bible

Ink'a' useb' xna'leb' li neke'k'aak'alenk re Israel

¹ Li Qaawa' ki'aatinak wik'in ut kixye we:

² “At kaamel winq, aatinan sa' ink'ab'a' ut ye reheb' li neke'k'aak'alenk re Israel: «Jo'ka'in xye li Qaawa': Ra chaalel sa' xb'eeneb' li neke'k'aak'alenk re Israel, xb'aan naq yal xjuneseb' rib' neke'xch'oolani rib'. Ma ink'a' tab'i' a'eb' li ketomq tento rilb'aleb'?

³ Laa'ex nekex'uk'ak re li xya'al xtu' li karneer, nekeyiib' leeb'aatal chiru li rixeb' ut li rismaleb'; nekekamsi eb' li jwal ninqeb' xtib'el, ab'anan ink'a' nekerileb' chi us leekarneer.

⁴ Ink'a' nekech'oolani eb' li karneer li ink'a' neke'xkuy b'eek, chi moko nekeb'an eb' li yaj; ink'a' nekelan xtiq'ilal li naxtiq' rib', chi moko nekesutq'isi chaq li xsachk sa' xb'e, ink'a' nekesik' chaq eb' li sachenaq, xik' b'an chik nekerileb' ut k'ajo' leejosq'il rik'ineb'.

⁵ Linketomq xkanaak chi maajun chik aj k'aak'alehom reheb': xe'xcha'cha'i rib' ut xlaje't'upiik xb'aaneb' li josq' aj xul.

⁶ Xe'sachje'k sa'eb' li k'iche' ut sa'atqeb' li tzuul, xe'xcha'cha'i rib' sa' chixjunil li ruuchich'och', chi maajun napatz'ok reheb' chi moko xkoheb' chi xsik'b'al.

⁷ «Jo'kan utan, ex k'aak'alenel, ab'ihomaq li waatin.

⁸ Sa' xk'ab'a' linloq'al, laa'in li Qaawa' ninye chi jo'ka'in: Eb' li k'iila paay chi josq' aj xul xe'xxok ut xe'xt'upi linketomq, xb'aan naq maak'a' aj ilol reheb'. Eb' laj ilol reheb' linkarneer ink'a' xoxe'xsik' chaq eb' li xe'sachk. Xb'aan naq eb' laj k'aak'alenel yal xjuneseb' rib' neke'xch'oolani rib', ut ink'a' xe'xch'oolani eb' linkarneer.

⁹ Jo'kan naq, ex k'aak'alenel, ab'ihomaq li waatin

¹⁰ li ninye laa'in, li Qaawa': Ex aj k'aak'alenel, xik' chik nekexwil ut tintitz' eere b'ar wankeb' linketomq; texwisi sa' leek'anjel chi ilok ketomq, re naq ink'a' chik te'xch'oolani rib' xjuneseb'. Tinmaq'eb' linkarneer cheru re naq ink'a' chik teetzekaheb'».

Li chaab'il aj k'aak'alenel

¹¹ “Laa'in, li Qaawa', ninye chi jo'ka'in: We'kin arin. Laa'in toxinsik'eb' chaq linkarneer ut laa'in tin'iloq reheb'.

¹² Jo' naq laj ilol ketomq naxk'e xch'ool chirixeb' li xketomq xe'xcha'cha'i rib'eb', jo'kan tinb'aanu laa'in reheb' linketomq; twisiheb' chaq sa' chixjunileb' li na'ajej xe'sachk wi' sa' jun rahil kutan ut aak'ab' ru.

¹³ Twisiheb' chaq sa'eb' li jalanil tenamit, tinch'utub'eb' ut tink'ameb' sa' li xna'ajeb'. Tinch'oolaniheb' sa' xteepal Israel, chiruheb' li tzuultaq'a, chirehatq eb' li nima' ut sa'atqeb' chixjunileb' li k'aleb'aal.

¹⁴ Tinch'oolaniheb' wan wi' li chaab'il pim, sa'atqeb' li tzuul re Israel; aran te'hilanq sa' chaab'il na'ajej ut te'ichajib'q chi us chiruheb' li tzuul re Israel.

¹⁵ Laa'in ajwi' tinb'eresinq reheb' linkarneer ut teb'ink'am chi hilank -chan li Qaawa'-.

¹⁶ Tinsik' chaq li karneer sachenaq, tinsutq'isi chaq li xcha'cha'iik, tinb'an li xtiq' rib', tink'irtasi li yaj ut twileb' ajwi' li ninqeb' xtib'el ut kaweb' rib'. Tinb'eresiheb' sa' tiikilal.

¹⁷ “Laa'in, li Qaawa', ninye chi jo'ka'in: Ab'ihomaq, ex inkarneer. Laa'in tinraq aatin sa' eeb'een chejunjunqal, ut twisiheb' linkarneer sa' xyanqeb' li chib'aat.

¹⁸ Ma ink'a' tz'aqal cho'q eere ichajib'k sa' li chaab'il pim naq xeyeq'i sa' leeroq li na'ela'ank? Nekeruk' li ha' saq ru, ut neketz'ajni ru li rela' rik'in leeroq.

¹⁹ Chi jo'kan eb' linkarneer tento te'xtzeka li ak xeyeq'i sa' leeroq ut te'ruk' li ha' ak xetz'ajni ru laa'ex.

²⁰ Jo'kan naq laa'in, li Qaawa', ninye chi jo'ka'in: Tinraq aatin sa' xyanqeb' li karneer ninqeb' xtib'el ut li b'aqeb'.

²¹ Laa'ex xetiikisihatq li ink'a' neke'xkuy b'eek ut xetiq'eb' chiru leexukub', toj reetal xeraanilasiheb' chi najt.

²² Ab'an laa'in tinkoleb' linkarneer re naq maajun wa chik te'elq'aaq; ut tinraqoq aatin sa' xyanqeb' linkarneer.

²³ “Tinxaqab' jun ajwi' aj k'aak'alehom reheb', a' laj David aj k'anjel chiwu. A'an taa'iloq ut taab'eresinq reheb'.

²⁴ Laa'in, li Qaawa', laa'inaq li xYoseb' ut laj David, laj k'anjel chiwu, a'an taajolominq reheb'. Laa'in, li Qaawa', xin'aatinak.

²⁵ Tink'ojob' jun li sumwank rik'ineb' a'an, re naq sa te'wanq, ut twisiheb' li josq' aj xul sa' li xna'ajeb', re naq eb' linkarneer te'wanq sa' tuqtuukilal sa'eb' li k'aleb'aal ut te'hilanq sa'eb' li k'iche'.

²⁶ “Tink'ojob'eb' chi xsutam linsantil tzuul ut twosob'tesiheb'; tintaqla chaq li hab' sa' xq'ehil, ut a'an jo' junaq rosob'tesinkileb'.

²⁷ Te'uuchinq eb' li che', li loq'laj ch'och' tixk'e li awimq; ut eb' a'an te'wanq sa' li xna'ajeb' sa' tuqtuukilal. Naq laa'in tinkol lintenamit sa' ruq'eb' li xe'tawasink ut xe'munink reheb', aran te'xnaw naq laa'in li Qaawa'.

²⁸ Ink'a' chik te'chape'q xb'aaneb' li jalanil tenamit, chi moko te't'upiiq xb'aaneb' li josq' aj xul. Sa' xyaalal chik te'wanq ut maajun chik taaxib'esinq reheb'.

²⁹ Chaab'il ch'och' tink'e reheb' re naq wanq naab'al li awimq; maajoq'e chik te'xkuy li we'ej, chi moko te'se'eeq chik xb'aaneb' laj ab'l tenamit.

³⁰ Aran taanawmanq naq laa'in, li Qaawa', li xYoseb', wankin rik'ineb', ut eb' li ralal xk'ajol laj Israel a'aneb' lintenamit. Raatin li Qaawa'.

³¹ Laa'ex linkarneer; laa'ex li walal ink'ajol b'eresinb'ilex inb'aan ut laa'in leeYos”, chan li Qaawa'.