Ezequiel 30 - Q'eqchi Bible

Xsachik Ejiipt

¹ Li Qaawa' kinraatina ut kixye we chi jo'ka'in:

² “At kaamel winq, aatinan sa' ink'ab'a' ut ye reheb': «Jo'ka'in xye li Qaawa': Yaab'anqex chirix li kutan chaalel,

³ xb'aan naq ak xnach'ok chaq xkutankil li Qaawa'. Jwal aak'ab'aq ru li kutan a'an, xkutankil li raqb'a aatin sa' xb'eeneb' li tenamit.

⁴ Taachalq li raaxiik' sa' xb'een Ejiipt. K'ajo' naq te'xiwaq eb' laj Etiopía, naq naab'aleb' aj Ejiipt te'kamsiiq, naq taa'elq'aaq chixjunil li xb'ihomal li tenamit a'an ut taajuk'manq ajwi' li rub'elankil.

⁵ Te'kamsiiq rik'in q'esnal ch'iich' eb' laj puub' aj Etiopía, aj Put, aj Lut, chixjunileb' laj Arabia ut eb' laj Kub, jo' ajwi' jo'k'ihaleb' li neke'okenk chirix Ejiipt.

⁶ «Jo'ka'in xye li Qaawa': Eb' li te'tenq'anq re Ejiipt te'kamq ajwi', ut taa'oso'q li xwankil Ejiipt li naxq'etq'eti wi' rib' chalen chaq Mikdol toj Asuán. Laa'in, li Qaawa', xinyehok re a'in».

⁷ “Jwal joxk' taakanaaq li xch'och'el Ejiipt sa' xyanqeb' chixjunileb' li na'ajej, ut po'lem te'kanaaq eb' li tenamit wankeb' sa' xteepal.

⁸ Naq tink'e xxamlel Ejiipt ut te'oso'q chixjunileb' li neke'tenq'ank re, te'xtaw xyaalal naq laa'in li Qaawa'.

⁹ “Sa' li kutan a'an tintaqlaheb' lintaql li te'xik sa' jukub', re xxib'enkileb' laj Etiopía li toj k'ojk'ookeb' xch'ool. K'ajo'aqeb' xxiw chi rab'inkil resil li xsachik Ejiipt: nach' chik wank li kutan a'an.

¹⁰ “Laa'in, li Qaawa', ninye chi jo'ka'in: Tinsach ruheb' laj Ejiipt, chi ruq' laj Nabukodonosor, awab'ej re Babilonia.

¹¹ Tink'am chaq a'an rochb'eeneb' li xsoldaad, li q'axal josq'eb' chiruheb' chixjunil li wankeb' sa' ruuchich'och', chi xsachb'al Ejiipt. Te'yaloq rik'in ch'iich' ut k'ajo' naq taanujaq li tenamit chi kamenaq.

¹² Tink'eheb' chi chaqik li nima' Nilo ut tinq'axtesi Ejiipt sa' ruq'eb' li jalanil tenamit li ink'a' useb' xna'leb', re naq taasache'q a'an ut chixjunil li k'a'aq re ru wank chisa'. Laa'in, li Qaawa', xinyehok re a'in.

¹³ “Laa'in, li Qaawa', ninye chi jo'ka'in: Tinjuk'i eb' li xjalam u li jalanil yos ut tinsach ruheb' li b'alaq'il yos re Menfis. Maajoq'e chik taawanq junaq li taa'awab'ejinq re Ejiipt, ut xiwajel tinkanab' li tenamit a'an.

¹⁴ Tinjuk' Patros, tink'e xxamlel Sohán ut tinraqoq aatin sa' xb'een Tebas.

¹⁵ “Sa' xb'een Sin twisi linjosq'il, li naxkawu wi' xch'ool Ejiipt, ut tinsach ruheb' laj Tebas.

¹⁶ Tink'e xxamlel Ejiipt, ut Sin tixtolk'osi rib' xb'aan li rahilal; taahope'q li xsuttz'akil li tenamit Tebas ut Menfis rahaq sa' xch'ool chi junelik.

¹⁷ Eb' li saaj al aj On ut aj Bubastis te'kamsiiq chi ch'iich' ut chixjunileb' li poyanam te'k'ame'q chi preexil.

¹⁸ Sa' li tenamit Tafnis taaq'oqyino'q ru li kutan, naq tinjuk' xwankil Ejiipt ut taa'oso'q li naxnima wi' rib'; li tenamit taatz'ape'q xb'aaneb' li choql ut eb' li ixq te'k'ame'q chi preexil.

¹⁹ Jo'ka'in naq tin'eeqajunq sa' xb'een Ejiipt, ut aran taanawmanq naq laa'in li Qaawa'”.

²⁰ Ak wuqub' kutan xb'e li xb'een po re li xjunlaju chihab' qak'amb'al aran Babilonia, li Qaawa' kinraatina ut kixye we chi jo'ka'in:

²¹ “At kaamel winq, laa'in xinjuk' xwankilal laj Parahón, li awab'ej re Ejiipt; xintoq li ruq' ut maajun xb'anok chiru chi moko xe'xlan re ta naq tkawuuq ut tixchap wi' chik li xch'iich'.

²² Jo'kan naq laa'in, li Qaawa', ninye chi jo'ka'in: Xik' chik twil laj Parahón, li awab'ej re Ejiipt. Tintoq chi xkab'ichal li ruq': li toj kaw ut li ak toqolk, re naq taat'ane'q li q'esnal ch'iich' sa' ruq'.

²³ Ok we chi xcha'cha'inkileb' laj Ejiipt sa' ruuchich'och', ut tintaqlaheb' sa' xyanqeb' jalan jalanq chi tenamit.

²⁴ A' chik li awab'ej re Babilonia tink'e xkawub' xch'ool, ut sa' ruq' a'an tink'e linch'iich'. Tintoqiheb' li ruq' laj Parahón, ut k'ajo' naq taayaab'aq chiru laj Nabukodonosor.

²⁵ Relik chi yaal naq tink'e xkawub' xch'ool li awab'ej re Babilonia, ut taa'oso'q li xwankil laj Parahón. Aran taanawmanq naq laa'in li Qaawa', naq tink'e linq'esnal ch'iich' sa' ruq' li awab'ej re Babilonia ut a'an taaxik chi xrahob'tesinkileb' laj Ejiipt.

²⁶ Tincha'cha'iheb' laj Ejiipt sa' ruuchich'och', sa' xyanqeb' chixjunileb' li tenamit. Toja' naq te'xnaw naq laa'in li Qaawa'”.