Ezequiel 18 - Q'eqchi Bible

Li ani namaakob'k, taakamq

¹ Li Qaawa' kinraatina ut kixye we chi jo'ka'in:

² “K'a'ut naq junelikex chi xyeeb'al li jaljookil ru aatin a'in sa' xteepal Israel: «Eb' li na'b'ej yuwa'b'ej xe'xk'ux li al uub'; ut eb' li alal k'ajolb'ej xulum aj chik li ruuch reheb'»?

³ “Laa'in, li Qaawa', ninye li waatin naq ink'a' chik taayeemanq li aatin a'in sa' xyanqeb' laj Israel.

⁴ K'ehomaq reetal: chixjunileb' li poyanam weheb' laa'in, li yuwa'b'ej jo' ajwi' li alalb'ej. Li taamaakob'q, a'an li taakamq.

⁵ “Li winq tiik xch'ool naxb'aanu li us ut li tiikilal:

⁶ ink'a' naxik chi tzekank sa'eb' li tijob'aal chiru tzuul chi moko naxk'ojob' xch'ool rik'ineb' li xjalanil yoseb' laj Israel; ink'a' naxmux li rixaqil li ras riitz'in, chi moko nawank rik'in li rixaqil naq yo sa' xpuch'unik;

⁷ maajun naxrahob'tesi, naxq'axtesi b'an li k'aru xkanab'ahom ut xyehom cho'q ruuchil li xk'as; ink'a' na'elq'ak, naxk'e b'an chi wa'ak li yo xtz'okajik ut naxk'e xb'aatal li maak'a' raq';

⁸ ink'a' naxpatz' ral li tumin li naxk'e chi to' chi moko naxsik' xb'ihomal rik'in a'an; maajun naxrahob'tesi, naraqok aatin sa' xyaalalil rik'ineb' li poyanam wankeb' xch'a'ajkilal;

⁹ naxb'aanu li naxye linchaq'rab' ut naxpaab' li waatin, jo' chanru xk'ulub' li yaal. Relik chi yaal naq li winq a'an, jwal tiik xch'ool ut taawanq xyu'am -chan li Qaawa'-.

¹⁰ “Ab'anan wi li winq a'an wank jun ralal aj raaxiik' ut aj kamsinel ras riitz'in,

¹¹ li naxb'aanu li ink'a' xb'aanuhom li xyuwa', naraj naxye: nawa'ak sa'eb' li tijob'aal chiru tzuul, naxmux li rixaqil li ras riitz'in,

¹² naxrahob'tesi li neb'a' ut li toq'ob'aal ru, narelq'a li ab'i e, ink'a' naxq'ajsi ruuchil li to', naxloq'oni ruheb' li jalanil yos ut naxb'aanu li ink'a' nawulak chiwu,

¹³ nab'ihomo'k rik'in ral li tumin naxk'e chi to', relik chi yaal naq li winq a'an taakamq xb'aan naq xb'aanu eb' a tz'i'b'eetalil a'in. Taakamq chi maak'a' chik xja'lenkil ut li xmaak taakanaaq sa' xb'een.

¹⁴ “Ab'anan wi junaq winq ink'a' us xna'leb' wank jun ralal li xril chixjunil li maa'usilal xb'aanu li xyuwa', ut ink'a' xtzol xb'aanunkil a'an, naraj naxye:

¹⁵ ink'a' nawa'ak sa'eb' li tijob'aal chiru tzuul, chi moko naxk'ojob' xch'ool rik'ineb' li xjalanil yoseb' laj Israel, ink'a' naxmux li rixaqil li ras riitz'in,

¹⁶ maajun naxrahob'tesi, maak'a' naxpatz' cho'q ruuchil li to', ink'a' na'elq'ak, naxk'e chi tzekank li neb'a' ut naxtiqib' li maak'a' raq',

¹⁷ ink'a' naxb'aanu li maa'usilal, ink'a' naxsik' xb'ihomal sa' b'alaq' malaj naxtitz' ral li to', naxpaab' linchaq'rab' ut naxk'uula sa' xch'ool li waatin, li winq a'an ink'a' taakamq xb'aan li xmaak li xyuwa', tixkol b'an li xyu'am.

¹⁸ “Ab'an li xyuwa', li xrahob'tesiheb' li ras riitz'in, x'elq'ak ut ink'a' us xb'aanu sa' xyanqeb' li rech tenamitul, relik chi yaal naq taakamq xb'aan li xmaak.

¹⁹ Mare laa'ex teeye: «K'a'ut naq li alalb'ej ink'a' naxtoj rix xmaak li xyuwa'?». Ink'a', xb'aan naq a'an xb'aanu li us ut li tiikilal, xpaab' ut xk'anjela ru chixjunileb' linchaq'rab'; jo'kan naq ch'olch'o naq taawanq xyu'am.

²⁰ Taakamq ka'ajwi' li ani xmaakob'k. Li alalb'ej ink'a' tixtoj rix li xmaak li xyuwa' chi moko li yuwa'b'ej tixtoj rix li xmaak li ralal. Li tiik ru xyu'am tixk'ul xq'ajkamunkil xb'aan xtiikilal li xch'ool, ut li ink'a' us xch'ool taakanaaq li xmaak sa' xb'een.

Li Qaawa' a'an tiik xch'ool

²¹ “Wi ut li ink'a' us xna'leb' tixkanab' xb'aanunkil li maak ut tixpaab' chixjunileb' li waatin, wi tixb'aanu li tiikilal ut li us, relik chi yaal naq taawanq xyu'am ut ink'a' taakamq.

²² Maajun reheb' li maak xb'aanuhom chaq taajultikamanq chik, ut taawanq xyu'am xb'aan naq xwank sa' tiikilal.

²³ Ma nasaho'k tab'i' linch'ool naq nakamk laj maak? -chan li Qaawa'-. Li nawulak chiwu, a'an a'in: naq li ink'a' us xch'ool tixjal li xk'a'uxl ut wanq xyu'am.

²⁴ “Ab'anan wi li tiik xch'ool tixjal li xna'leb' ut taa'ok chi xb'aanunkil li maa'usilal ut li jo'maajo'il b'aanuhom jo' neke'xb'aanu li ink'a' useb' xna'leb', ma taakole'q tab'i' a'an? Maajun reheb' li xchaab'il b'aanuhom taajultikamanq, ut taakamq xb'aan li q'etb'a aatin ut li maa'usilal xb'aanu.

²⁵ Ut wi laa'ex teeye: «Moko us ta naxb'aanu li Qaawa'», ab'ihomaq, ex aj Israel: Ma ink'a' us li ninb'aanu? Ma ink'a' tab'i' laa'ex li ink'a' us yookex xb'aanunkil?

²⁶ Naq li tiik xch'ool naxkanab' xb'aanunkil li tiikilal ut naxtikib' maakob'k, wi taakamq, a' li maak xb'aanu taakamq wi'.

²⁷ Ab'an wi laj maak naxtz'eqtaana li reemaaruhil b'aanuhem ut na'ok chi xb'aanunkil li us ut li tiikilal, relik chi yaal naq tixkol li xyu'am.

²⁸ Wi naxk'e reetal li ink'a' us xb'aanu ut naxtz'eqtaana, relik chi yaal naq tixkol li xyu'am ut ink'a' taakamq.

²⁹ “Eb' laj Israel toj neke'xye: “Moko us ta naxb'aanu li Qaawa'”. Ma yaal naq ink'a' us ninb'aanu, ex aj Israel? Ma ink'a' tab'i' laa'ex li ink'a' us yookex xb'aanunkil?

³⁰ Ex aj Israel, laa'in tinraqoq aatin sa' eeb'een chejunjunqal jo' chanru leeyehom eeb'aanuhom. Jalomaq leek'a'uxl ut tz'eqtaanahomaq chixjunil leemaa'usilal re naq ink'a' teetoj rix leemaak -chan li Qaawa'-.

³¹ Kanab'omaq chixjunil li maa'usilal xineemajewa wi' ut ak'aq chik leech'ool, ak'aq chik leemusiq'. K'a'ut naq nekeraj kamk, ex aj Israel?

³² Laa'in maajun nawaj taakamq. Yot'omaq leech'ool jalomaq leek'a'ul, ut taawanq eeyu'am”, chan li Qaawa'.