Ezequiel 12 - Q'eqchi Bible

Li relik laj Esekiel a'an reetalil li isiik sa' li na'ajej

¹ Li Qaawa' kinraatina ut kixye we chi jo'ka'in:

² “At kaamel winq, wankat sa' xyanqeb' jun q'etq'etil tenamit: wank xsa' ruheb' ut ink'a' neke'ilok, wank xxikeb' ut ink'a' neke'ab'ink, xb'aan naq q'axal aj q'etoleb' aatin.

³ Jo'kan utan, at kaamel winq, xok li k'a'aq re ru aawe ut elen sa' xyanqeb', chi kutan ut chiruheb' chixjunileb'. Taakanab' laana'aj ut tatxik sa' jalan chik na'ajej. Mare chi jo'kan te'xtaw ru naq aj q'etoleb' aatin.

⁴ Chi kutan ut chiruheb' chixjunileb' taaxok li k'a'aq re ru aawe, jo' tawi' xik aawe sa' jalanil na'ajej; ut ewu taachap aab'e chiruheb', jo' li naxik chi najt chi preexil.

⁵ Moqon chik hop junaq numleb'aal sa' li tz'ak ut aran tat-elq.

⁶ Chiruheb' ajwi' a'an, naq taa'ok li q'oqyink, taajelo li k'a'aq re ru aawe ut ayu. Taatz'ap chi t'ikr laawu re naq ink'a' taawil li na'ajej, xb'aan naq laa'ataq jun eetalil cho'q reheb' laj Israel”.

⁷ Laa'in kinb'aanu li kiyeemank we. Chiru li kutan a'an kinyiib' li wiiq, jo' li nak'ame'k chi preexil sa' najtil tenamit; ewu kinhop jun li numleb'aal sa' li tz'ak rik'in wuq'; ut chiru chik li q'oqyink, chiruheb' chixjunileb', kinjelo li k'a'aq re ru we ut kin'elk aran.

⁸ Eq'la, sa' li kutan jun chik, li Qaawa' kinraatina wi' chik ut kixye we chi jo'ka'in:

⁹ “At kaamel winq, ma ink'a' xe'xpatz' aawe eb' laj Israel, li q'etq'et aj tenamit, k'aru xab'aanu?

¹⁰ Ye b'i' reheb' sa' ink'ab'a': «A'in a'an reetalil cho'q re li x'awab'ej Jerusalén jo' ajwi' cho'q reheb' laj Israel li wankeb' aran.

¹¹ Laa'in jun eetalil cho'q eere. Jo' xinb'aanu laa'in, jo'kan ajwi' taa'uxmanq eere laa'ex: texk'ame'q chi preexil sa' najtil tenamit.

¹² Li awab'ej li najolomink eere, taariiqa li k'a'aq re ru re ut, chiru li q'oqyink, taa'elq sa' xhopolal li tz'ak li teeyiib' laa'ex. Tixtz'ap li ru re naq ink'a' taaril li na'ajej naq taa'elq.

¹³ Laa'in tinkut link'aam sa' xb'een ut tinchap; tink'e chi k'ame'k Babilonia, xtenamiteb' laj Kaldeha, ab'an moko taaril ta li na'ajej a'an, ut aran taakamq.

¹⁴ Tincha'cha'i yalaq b'ar chixjunileb' laj k'aak'alehom re, eb' laj k'anjel chiru ut eb' laj puub', ut twaanilasiheb' rik'in ch'iich'.

¹⁵ Ut te'xnaw naq laa'in li Qaawa', naq twaanilasiheb' ut tincha'cha'iheb' sa' xyanqeb' li jalanil tenamit sa' ruuchich'och'.

¹⁶ Ab'an wanqeb' teb'inkol chiru li raaxiik', li we'ej ut li yajel, re naq, sa'eb' li tenamit te'wulaq wi', toxe'xseeraq'i chixjunil li xjo'maajo'il b'aanuhomeb', ut te'xnaw naq laa'in li Qaawa'»”.

¹⁷ Li Qaawa' kinraatina wi' chik ut kixye we:

¹⁸ “At kaamel winq, chatwa'aq chi yooq aaxiw ut chat-uk'aq chi yooq aak'a'uxl ut chi rahaq sa' laach'ool.

¹⁹ Aatinaheb' li poyanam ut eb' laj Jerusalén, jo' ajwi' chixjunileb' laj Israel; ye reheb' chi jo'ka'in: «Li Qaawa' naxye chi jo'ka'in: Texwa'aq chi rahaq sa' leech'ool ut tex'uk'aq chi k'ajo'aq eexiw, xb'aan naq leena'aj taasache'q ru ut nakirirnak taakanaaq, xb'aan li xmaa'usilal chixjunileb' li wankeb' aran.

²⁰ Te'juk'manq chixjunileb' li tenamit, ut joxk' taakanaaq li na'ajej. Toja' naq teenaw naq laa'in li Qaawa'»”.

Li raatin li Yos taatz'aqloq ru

²¹ Li Qaawa' ki'aatinak wi' chik wik'in ut kixye we:

²² “At kaamel winq, k'aru naraj naxye li aatin yookex chi xyeeb'al laa'ex aj Israel: «Yo chi nume'k li kutan ut ink'a' nak'ulmank li k'utb'esinb'il chiru li propeet sa' moy u»?

²³ Ye ut reheb': «Li Qaawa' naxye chi jo'ka'in: Laa'in ink'a' chik tinkanab' chi yehe'k li aatin a'an sa' li tenamit Israel». Ye ajwi' reheb' naq ak xwulak xkutankil naq taatz'aqloq ru li rilomeb' li propeet sa' moy u.

²⁴ Sa' xyanqeb' laj Israel ink'a' chik taa'ilmanq moy u chi maak'a' rajb'al, chi moko taa'uxq ta chik xyeeb'al li tik'ti' sa' li q'ehink.

²⁵ Xb'aan naq laa'in, li Qaawa', tin'aatinaq, ut li k'aru tinye taak'ulmanq chi junpaat. Ex q'etq'etil tenamit, laa'ex teeril a'in rik'in leeru: tinye jun t'orolaq li waatin ut relik chi yaal naq taatz'aqloq ru”, chan li Qaawa'.

²⁶ Li Qaawa' ki'aatinak wi' chik wik'in ut kixye we:

²⁷ “At kaamel winq, eb' laj Israel yookeb' chi xyeeb'al naq toj maji' taak'ulmanq li k'aru xk'utb'esiik chawu sa' moy u; toj sa'eb' li kutan chaalel taak'ulmanq.

²⁸ Jo'kan naq yeheb' re chi jo'ka'in: «Jo'ka'in xye li Qaawa': Li k'aru ninye, taak'ulmanq. Li waatin taatz'aqloq ru chi junpaat», chan li Qaawa' Yos”.