Ezequiel 11 - Q'eqchi Bible

Taaraqmanq aatin sa' xb'eeneb' laj k'amolb'e

¹ Chirix chik a'an li xmusiq' li Yos kinxwaklesi ut kinxk'am toj sa' li okeb'aal li wank sa' xjayal releb'l saq'e re li rochoch li Qaawa'. Sa' li okeb'aal wankeb' oob' xka'k'aal chi winq. Sa' xyanqeb' a'an kiwil ru laj Jasanías, ralal laj Asur, ut laj Pelatías, ralal laj Benaías, xjolomileb' li tenamit.

² Li Qaawa' kixye we: “At kaamel winq, a'aneb' a'in li winq neke'k'uub'ank re li maa'usilal ut neke'xpo' xna'leb' li tenamit.

³ Eb' a'an neke'xye: «Moko q'axal aajel ta ru naq tookab'laq. Sa' li tenamit a'in taaqakol qib', kama' li tib' sa nareek'a sa' li uk'al».

⁴ Jo'kan naq aatinan sa' ink'ab'a', at kaamel winq, ye resil li rahilal chaalel”.

⁵ Sa' li honal a'an li xmusiq' li Yos kinreechani ut kinxtaqla chi xyeeb'al reheb' laj Israel: “Jo'ka'in xye li Qaawa': «A'an a'in li nekek'oxla, ex aj Israel. Ninnaw chi us leek'a'uxl.

⁶ K'ajo'eb' li poyanam xekamsi sa' li tenamit a'in ut xnujak chi kamenaq sa'eb' li b'e.

⁷ Jo'kan naq laa'in, li Qaawa', ninye eere chi jo'ka'in: Eb' li kamenaq li xekuti sa' b'e sa' li tenamit Jerusalén, a'aneb' li tib'; ut Jerusalén a'an li uk'al. Ab'an laa'in texwisi sa' li tenamit a'in.

⁸ Laa'ex nekexiwa li kamk chi ch'iich', ut a'an li tink'am chaq sa' eeb'een, chan li Qaawa'.

⁹ Tinraqoq aatin sa' eeb'een: texwisi Jerusalén ut texinq'axtesi sa' ruq'eb' laj ab'l tenamit.

¹⁰ Chi ch'iich' texkamq. Tinraqoq aatin sa' eeb'een sa' xteepal Israel, ut teenaw naq laa'in li Qaawa' Yos.

¹¹ Li tenamit moko a'anaq ta li uk'al cho'q eere, chi moko laa'exaq li tib'. Tinraqoq aatin sa' eeb'een sa' xteepal Israel,

¹² ut teenaw naq laa'in li Qaawa'. Laa'ex ink'a' xexwank jo' xexinchaq'rab'i wi' chi moko xepaab' li waatin, xeb'aanu b'an chik li k'aru k'aynaqeb' xb'aanunkil eb' li tenamit neke'sutuk eere»”.

¹³ Toj yookin ajwi' chi xyeeb'al li aatin a'in naq kikamk laj Pelatías, ralal laj Benaías. Kinwiq'laak, kinhupub' wib' chiru ch'och' ut kinjap we chi xyeeb'al: “At Qaawa', ma taachoy xsachb'al ru li rela' laj Israel?”.

Li ak' sumwank rik'ineb' laj Israel li ke'isiik sa' li xtenamiteb'

¹⁴ Toja' naq li Qaawa' kixye we:

¹⁵ “At kaamel winq, eb' li wankeb' Jerusalén yookeb' chi xyeeb'al chi jo'ka'in chirixeb' laawas aawiitz'in, laakomoneb' ut chixjunileb' laawech Israelil: «Jwal najt wankeb' rik'in li Qaawa'. Ut laa'o xooxk'e chi wank sa' li ch'och' a'in, re taaqeechani ut arin toowanq», chankeb'.

¹⁶ Jo'kan naq ye reheb': «Jo'ka'in naxye li Qaawa': Us ta xe'wisi sa' li xna'ajeb' ut xeb'incha'cha'i sa' xyanqeb' li jalanil tenamit, ab'anan yal jun k'amok ajwi'. Anaqwan laa'inaq chik li santil ochoch cho'q reheb' a'an sa'eb' li tenamit b'arwi' xoxe'kanaaq».

¹⁷ Ye ajwi' reheb': «Jo'ka'in naxye li Qaawa': Laa'in tinxokoq chaq eere sa'atqeb' li tenamit; texinch'utub' chaq sa'atqeb' li na'ajej xexincha'cha'i wi' ut tink'e chereechani li tenamit Israel.

¹⁸ Naq te'sutq'iiq chaq, tole'risi chixjunileb' li jalanil yos ut ink'a' chik te'xb'aanu li tz'i'b'eetalil b'aanuhom.

¹⁹ Tink'e reheb' jun ak' ch'oolej ut jun ak' musiq'ej; twisi li xpekil ch'ooleb' ut tink'e reheb' jun q'unil ch'oolej,

²⁰ re naq te'wanq jo' naxye linchaq'rab', te'xpaab' li waatin ut te'xyu'ami. Chi jo'kan a'anaqeb' lintenamit ut laa'inaq li xYoseb'.

²¹ Ab'anan eb' li toj yookeb' chi xik xch'ooleb' chi xb'aanunkil li tz'i'b'eetalil b'aanuhom chirixeb' li jalanil yos, laa'in teb'ink'e chi kamk sa' li xmaa'usilaleb'. Laa'in li Qaawa', ut ninb'aanu li ninye»”.

Li xloq'al li Qaawa' ki'elk Jerusalén

²² Chirix chik a'an eb' li kerubín ke'rupupik ut eb' li sursu koheb' ajwi' chirixeb', ut li xloq'al li xYos laj Israel wank sa' xb'eeneb'.

²³ Li xloq'al li Qaawa' ki'elk sa' li tenamit, kitaqe'k ut koxkanaaq sa' xb'een li tzuul li wank sa' xjayal releb'l saq'e.

²⁴ Ut li xmusiq' li Yos kinxtaqsi ut kinxk'am wi' chik Babilonia, b'arwi' wankeb' laj Israel li ke'k'ame'k chi preexil. Chixjunil a'in kik'ulmank sa' moy u, sa' xk'ab'a' li xmusiq' li Yos. Moqon chik kisachk chiwu li moy u,

²⁵ ut laa'in kinseeraq'i reheb' laj Israel li wankeb' aran chixjunil li k'aru xk'utb'esi chiwu li Qaawa'.