Ezequiel 10 - Q'eqchi Bible

Li xloq'al li Qaawa' kixkanab' li santil ochoch

¹ Moqon chik kiwil naq sa' xb'een li kupku li wank sa' xb'eeneb' li kerubín wank kama' jun k'ojarib'aal yiib'anb'il rik'in pek safiro.

² Ut li Qaawa' kixye re li winq tiqto rik'in aq'ej liin: “Ch'ik aawib' sa' xyanqeb' li sursu li wank rub'el roqeb' li kerubín, xok chaq jun mooch'aq li ru xam li wank sa' xyanqeb' a'an, ut paji sa' xb'een li tenamit”. Laa'in kiwil li winq chi ok sa' xyanqeb' li sursu.

³ Sa' li honal a'an xaqxookeb' li kerubín sa' xseeb'al li rochoch li Yos, ut li neb'aal li wan chaq chisa' kinujak rik'in jun li choql.

⁴ Toja' naq li xloq'al li Qaawa' ki'elk sa' xb'eeneb' li kerubín ut koxkanaaq sa' li okeb'aal; li santil ochoch kinujak rik'in li choql, ut kilemtz'uno'k li xloq'al li Qaawa' chiru li neb'aal.

⁵ Toj chirix li kab'l na'ab'imank li xyaab' li xxik'eb' li kerubín naq neke'xik'ank, chanchan wi' naq li Nimajwal Yos yo chi aatinak chi kaw xyaab' xkux.

⁶ Li Qaawa' kixye re li winq tiqto rik'in aq'ej liin: “Xok li ru xam li wank sa' xyanqeb' li sursu li wank sa' xyanqeb' li kerubín”, chan. Koho li winq ut koxxaqab' rib' chi xk'atq jun li sursu.

⁷ Tikto jun reheb' li kerubín kixye' li ruq' chi xxokb'al li ru xam ut kixk'e re li winq li wank raq' liin, ut a'in kixk'ul ut koho.

⁸ Toja' naq kiwil chanchan jun ruq' winq rub'el xxik'eb' li kerubín.

⁹ Kink'e reetal kaahib' chi sursu wank chi xk'atqeb' li kerubín, junjunq li sursu wank chi xk'atq li junjunq chi kerubín, ut neke'lemtz'unk jo' li lemtz'il pek.

¹⁰ Junqtaq'eet neke'ilok li kaahib' chi sursu, chanchan ta wi' ch'ikch'o li junjunq sa' li jun chik.

¹¹ Naq neke'b'eek eb' li kerubín, neke'xik chi xkaahichaleb' ut maajun naq'ajk chirix, neke'xik b'an b'arwi' naxik li nak'amok b'e chiruheb'.

¹² Ut chixjunil li xjunxaqalileb' nalemtz'unk sa' xkaapak'alil: li xyi rix, eb' li ruq'eb' ut li xxik'eb', jo'kaneb' ajwi' li sursu.

¹³ Kiwab'i naq eb' li sursu “b'eleb'aal ch'iich'” kik'ehe'k cho'q xk'ab'a'eb'.

¹⁴ Kaapak'al ru eb' li junjunq chi kerubín: li xb'een chanchan li wakax na'ilok; li xkab' jo' jun li winq na'ilok; li rox chanchan li kaqkoj ut li xka kama' jun li t'iw na'ilok.

¹⁵ Eb' li kerubín ke'wakliik, a'aneb' ajwi' li ke'wil chaq chire li nima' Kebar.

¹⁶ Naq eb' li kerubín neke'b'eek, neke'xik ajwi' eb' li sursu; ut naq neke'taqe'k sa' iq', eb' li sursu ink'a' neke'kanaak.

¹⁷ Naq neke'xaqliik eb' li kerubín, neke'xaqliik ajwi' eb' li sursu; ut naq neke'taqe'k eb' li kerubín sa' xb'een li ruuchich'och', neke'wakliik ajwi' eb' li sursu, xb'aan naq li xmusiq' eb' li kerubín wank sa'eb' li sursu.

¹⁸ Toja' naq li xloq'al li Qaawa' ki'elk sa' xb'een li rokeb'aal li santil ochoch ut koxkanaaq sa' xb'eeneb' li kerubín.

¹⁹ Ut eb' a'in ke'xhir li xxik'eb' ut kiwil naq koheb'; koheb' ajwi' eb' li sursu rochb'eeneb'. Ke'wil naq koxe'kanaaq sa' li okeb'aal wank sa' xjayal releb'l saq'e re li rochoch li Yos; li xloq'al li xYos laj Israel, wank sa' xb'eeneb'.

²⁰ A'aneb' ajwi' a'in li ke'wil rub'el roq li xYos laj Israel chire li nima' Kebar. Toj aran kink'e reetal naq kerubineb'.

²¹ Li junjunq wank kaapak'al li ruheb' ut kaaka xxik'eb', ut wank jun ruq' poyanam rub'el xxik' li junjunq.

²² Chixjunileb', chanchaneb' li ke'wil chaq chire li nima' Kebar neke'ilok; li junjunq jun tiikaj naxik chi uub'ej.