Éxodo 5 - Q'eqchi Bible

Laj Moisés chiru laj Parahón

¹ Moqon chik laj Moisés ut laj Aharón ke'wulak rik'in laj Parahón ut ke'xye re: “Jo'ka'in naxye li Qaawa', xYos laj Israel: «Kanab'eb' chi elk lintenamit re naq toxe'utz'uq chaq sa' li chaqich'och'»”.

² Ab'an laj Parahón kichaq'ok: “Ani put li Qaawa' re naq tinpaab' xyaab' xkux ut tinkanab' chi elk eb' laj Israel? Ink'a' ninnaw ru li Qaawa' ut ink'a' tinkanab'eb' chi xik laj Israel”, chan.

³ Ke'xye ut eb' a'an: “Li xYoseb' laj Hebreo xk'utb'esi rib' chiqu. Jo'kan naq naqatz'aama usilal, choohaakanab' chi xik sa' li chaqich'och' oxib'aq kutan chi b'e, re naq toomayejaq chiru li Qaawa' li qaYos. Mare anchal tooxrahob'tesi rik'in rax kamk malaj ch'iich'”.

⁴ Toja' naq li awab'ej re Ejiipt kixye reheb': “At Moisés, at Aharón, k'a'ut naq nekepo'ok xch'ooleb' li tenamit sa' li xk'anjeleb'? Ayuqex chi xb'aanunkil leek'anjel!”.

⁵ Kixye ajwi' laj Parahón: “K'ehomaq reetal, anaqwan naq eb' laj Israel q'axal k'iheb', ma teeraj laa'ex naq te'xkanab' li xkawil k'anjeleb'?”.

Naab'al chik li rahilal kichalk sa' xb'eeneb' laj Israel

⁶ Sa' ajwi' li kutan a'an laj Parahón kixk'e li chaq'rab' a'in reheb' laj taqlanel sa' tenamit ut reheb' laj jolominel:

⁷ “Meek'e chik reheb' laj Israel li k'im li nak'anjelak re pak'ok xan, xikaqeb' b'an eb' a'an chi xsik'b'aleb' re.

⁸ Ab'anan tento te'xyiib' jo'k'ihal li xan neke'xyiib' chalen chaq, chi ink'a' te'xk'os xk'ihaleb', xb'aan naq aj q'emeb'. Jo'kan naq neke'xjap re chi xyeeb'al: «Xikaqo chi mayejak chiru li qaYos».

⁹ Chek'e xb'een xk'anjeleb' li winq a'an re naq laatz'aqeb' ru ut ink'a' te'xk'oxla li tik'ti'”, chan laj Parahón.

¹⁰ Ke'elk ut eb' laj taqlanel jo'wi' eb' laj jolominel, ut ke'raatinaheb' li tenamit: “Jo'ka'in xye laj Parahón: «Ink'a' chik tink'e eek'im.

¹¹ Ayuqex laa'ex chi xsik'b'al b'arwi' texruuq chi xtawb'al; ab'anan maamin taak'osmanq leek'anjel»”.

¹² Toja' naq li tenamit ke'xjek'atq rib' sa' xsutam Ejiipt chi xsik'b'al yal pim jo' reeqaj li k'im.

¹³ Ut eb' laj taqlanel yookeb' chi xseeb'ankileb', neke'xye reheb': “Choyomaq leek'anjel jo' taqlanb'ilex wi' re li junjunq chi kutan, kama'aq ajwi' naq xwank leek'im”.

¹⁴ Ut eb' laj jolominel aj Israel li ke'xaqab'aak chi rilb'al li k'anjel ke'rape'k chi tz'uum xb'aaneb' laj taqlanel ut ke'yehe'k re: “K'a' naq ewer xechoy ut anaqwan ink'a' xechoy jo'k'ihal li xan kama' leetaqlankil rajlal?”.

¹⁵ Toja' naq eb' laj jolominel aj Israel ke'wulak chi jitok chiru laj Parahón: “K'a'ut naq jo'kan yookat reheb' laamoos?

¹⁶ Ink'a' nak'eemank xk'imeb' laamoos ut: «Yiib'anqex xan», chu'uxko. K'e reetal, rahob'tesinb'ileb' laamoos ut nateneb'aak maak sa' xb'een laatenamit”, chankeb'.

¹⁷ Kichaq'ok a'an ut kixye: “Aj q'emex, tz'aqal aj q'emex. Jo'kan naq nekeye: «Xikaqo chi mayejak chiru li Qaawa'».

¹⁸ Ayuqex anaqwan chi k'anjelak. Ut us ta ink'a' taak'eemanq leek'im, tento teeq'axtesi jo'k'ihal li xan yeeb'il eere”.

¹⁹ Ch'a'aj ke'reek'a eb' laj jolominel aj Israel naq ke'rab'i li aatin a'in: “Ink'a' teek'os xk'ihaleb' li xan li tento xyiib'ankil rajlal kutan”.

²⁰ Ut naq yookeb' chi elk sa' rochoch laj Parahón, kule'tawe'q xb'aan laj Moisés ut laj Aharón chi yookeb' royb'eninkileb' aran;

²¹ ut ke'xye reheb': “Li Qaawa' taxaq chik'ehoq reetal li k'aru xeb'aanu ut chiraqoq aatin sa' eeb'een. Eemaak laa'ex naq laj Parahón ut eb' laj k'anjel chiru yookeb' xjosq'il sa' qab'een. Tz'aqal laa'ex xexk'ehok jun ch'iich' sa' ruq'eb' re naq toohe'xkamsi”.

Li xtij laj Moisés

²² Toja' naq kisutq'iik laj Moisés rik'in li Qaawa' ut kixye: “At Qaawa', k'a'ut naq nakarahob'tesi li tenamit a'in? K'a'ut naq xinaataqla chaq?

²³ Xb'aan naq chalen sa' linwulajik rik'in laj Parahón chi raatinankil sa' laak'ab'a', yo xrahob'tesinkil li tenamit a'in, ut laa'at toj maak'a' xab'aanu re xkolb'aleb'”.