Éxodo 36 - Q'eqchi Bible

¹ “Jo'kan naq laj Besalel, laj Oholiab ut chixjunileb' li winq seeb'eb' xch'ool, li k'eeb'ileb' xna'leb' ut xseeb'al xch'ooleb' xb'aan li Qaawa' re xb'aanunkil chi chaab'il chixjunil li k'anjel aajel ru sa' li Santil Na'ajej, ke'xb'aanu jo' tz'aqal taqlanb'ileb' wi' xb'aan li Qaawa'”.

Ke'xkanab' xyeechi'inkil xmayejeb'

² Laj Moisés kixb'oq laj Besalel, laj Oholiab ut chixjunileb' li winq seeb'eb' xch'ool li k'eeb'ileb' xna'leb' xb'aan li Qaawa', jo'k'ihal li neke'reek'a sa' xch'ooleb' okenk chi xb'aanunkil junaq k'anjel.

³ Eb' a'in ke'xk'ul sa' ruq' laj Moisés chixjunil li mayej li ke'xyeechi'i eb' laj Israel re naq taayaalo'q li xnimal k'anjel cho'q re li Santil Na'ajej. Ab'an rajlal eq'la eb' laj Israel toj yookatqeb' chi xq'axtesinkil re laj Moisés li na'alaak sa' xch'ooleb'.

⁴ Jo'kan naq eb' laj yiib'ahom re li Santil Na'ajej ke'xkanab' li xk'anjeleb' chixjunqaleb'

⁵ ut koheb' chi xyeeb'al re laj Moisés: “Li tenamit yookeb' chi xk'eeb'al naab'al chik chiru li na'ajmank ru re xyiib'ankil li kixtaqla xb'aanunkil li Qaawa'”, chankeb'.

⁶ Toja' naq laj Moisés sut kixtaqla li esil a'in sa' chixjunil li na'ajej wankeb' wi': “Maajun winq, maajun li ixq chik'amoq chaq chik mayej cho'q re li Santil Na'ajej”. Jo'kan naq li tenamit ke'xkanab' xyeechi'inkil xmayejeb',

⁷ xb'aan naq ak xtz'aqlok li k'aru taak'anjelaq re xb'aanunkil chixjunileb' li k'anjel, ut toj wank ki'ela'ank.

Li Santil Muheb'aal

⁸ Toja' naq eb' li jwal seeb'eb' xch'ool sa' xyanqeb' li yookeb' chi k'anjelak, ke'xyiib' li Santil Muheb'aal rik'in lajeeb' chi ninqi t'ikr, kemb'ileb' rik'in b'aqb'il liin li jwal chaab'il, rik'in kaqinoq' ut moraad, rik'in kaqjorinkil noq', ut wankeb' ajwi' pikb'il kerubín chiru.

⁹ Li xnimal li roq li junjunq chi t'ikr, a'an kach'in chik maa waqxaqib' moqoj, ut li xnimal li ru a'an b'eleeb' k'utub'; juntaq'eet li xb'isb'al chixjunileb' li t'ikr.

¹⁰ Ke'b'oje'k chirib'ileb' rib' oob' chi t'ikr, ut jo'kan ajwi' eb' li oob' chik.

¹¹ Ut chire li t'ikr, sa' xmaril li xb'een b'ojolal, ke'k'ehe'k li tixchap wi' rib'; jo'kan ajwi' ke'k'ehe'k sa' xmaril li jun chik xb'ojolal.

¹² Chire li xb'een t'ikr ke'k'ehe'k lajeeb' roxk'aal li tixchap wi' rib', ut lajeeb' roxk'aal chik chire li t'ikr li naraqe'k wi' li xkab' xb'ojolal; ut chixjunileb' neke'xk'ul rib' chirib'ileb' rib'.

¹³ Kixyiib' ajwi' lajeeb' roxk'aal chi chapleb' rik'in oor, ut rik'ineb' a'in kixb'ak'iheb' li t'ikr re naq junajaq ru li Santil Muheb'aal.

¹⁴ Laj Besalel kixkem ajwi' junlaju chi ninqi t'ikr rik'in rismal chib'aat re xtz'apb'al li Santil Muheb'aal.

¹⁵ Li xnimal roq li junjunq chi t'ikr, a'an numenaq waqxaqib' moqoj, ut li xnimal li ru a'an b'eleeb' k'utub'; juntaq'eet li xb'isb'al li junlaju chi ninqi t'ikr.

¹⁶ Kixjunaji ru oob' chi ninqi t'ikr, ut eb' li waqib' chik kixjunaji toj junpak'al.

¹⁷ Chire li t'ikr li wank sa' xmaril li xb'een b'ojolal kixyiib' lajeeb' roxk'aal li tixchap wi' rib', ut lajeeb' roxk'aal chik chire li t'ikr li wank sa' xmaril li xkab' b'ojolal.

¹⁸ Kixyiib' lajeeb' roxk'aal xchapleb' rik'in q'anch'iich', li tixk'ul wi' rib' li Muheb'aal re naq junajaq ru xsa'.

¹⁹ Kixyiib' ajwi' xb'een li Muheb'aal rik'in xtz'uumaleb' karneer kaq xb'onoleb', ut sa' xb'een a'in kixk'e jun chik li xb'een yiib'anb'il rik'in chaab'il tz'uum.

²⁰ Kixyiib' ajwi' tz'alamche' rik'in akasya re li Santil Muheb'aal, ut kixxaqab'eb':

²¹ kach'in chik maa oxib' moqoj li xnimal roq li junjunq chi tz'alamche' ut oxib' k'utub' li xnimal ru.

²² Wankeb' ajwi' ka'kab' xhopolal li junjunq chi tz'alamche' li te'xk'ul wi' rib'. Jo'kan ajwi' kixb'aanu laj Besalel re chixjunileb' li xtz'alamche' li Santil Muheb'aal.

²³ Kixk'e junmay chi tz'alamche' sa' rokeb'l li iq', sa' xjayal Nejeb,

²⁴ ut kixyiib' ka'k'aal xna'ajeb' li roq li tz'alamche' rik'in plaat: ka'kab' xna'ajeb' li junjunq chi tz'alamche' re li wiib' xhopolal.

²⁵ Kixyiib' junmay chik chi tz'alamche' re li xjunpak'alil li Santil Muheb'aal, a' li wank sa' xjayal releb'l li iq',

²⁶ rochb'eeneb' ka'k'aal xna'ajeb' li roq li tz'alamche' yiib'anb'ileb' rik'in plaat: ka'kab' xna'ajeb' li junjunq chi tz'alamche'.

²⁷ Kixyiib' ajwi' waqib' chi tz'alamche' ut kixk'eheb' chirix li Santil Muheb'aal, sa' rokeb'l li saq'e,

²⁸ ut wiib' chik reheb' li xxuk li Santil Muheb'aal, toj chirix,

²⁹ chapchookeb' chirib'ileb' rib' chalen taq'a toj taqe'q, toj sa' li xb'een argoya. Jo'kan kixb'aanu rik'in li wiib' chi tz'alamche' li neke'wank sa' xkab'ichaleb' li xuk.

³⁰ Waqxaqib' b'i' li tz'alamche' li ke'k'anjelak rochb'eeneb' waqlaju xna'ajeb' li roq: ka'kab' xna'ajeb' li roq li junjunq chi tz'alamche'.

³¹ Chirix chik a'an laj Besalel kixyiib' oob' chi che' rik'in akasya, ut ke'q'e'b'aak chiruheb' li tz'alamche' chi xk'atq li Santil Muheb'aal.

³² Kixyiib' oob' chik reheb' li tz'alamche' li wankeb' junpak'al li Santil Muheb'aal ut oob' chik reheb' li tz'alamche' li wankeb' chirix li Santil Muheb'aal, sa' rokeb'l li saq'e.

³³ Kixyiib' ajwi' li che' li kik'eemank chi q'eq'o sa' xyi li Santil Muheb'aal re naq taanume'q sa' xyiitoq xteram li tz'alamche', taa'elq chi nim ut taawulaq chi tz'e.

³⁴ Kixletziheb' rix li tz'alamche' rik'in oor, ut kixyiib' ajwi' x'argoyil rik'in oor li te'nume'q wi' li che' chi q'eq'o. Jo'kan ajwi' kixletziheb' rix rik'in oor.

³⁵ Laj Besalel kixyiib' jun t'ikr rik'in kaqinoq' ut moraad, rik'in kaqjorinkil noq' ut b'aqb'il liin li jwal chaab'il; ut kixyiib' chi pikb'il kerubín li te'wanq chiru.

³⁶ Kixyiib' ajwi' cho'q re a'an kaahib' chi oqech rik'in akasya, kixletziheb' rix rik'in oor ut kixk'eheb' xchapleb' yiib'anb'ileb' rik'in oor, jo'wi' kixyiib' kaahib' xna'ajeb' li oqech rik'in plaat.

³⁷ Kixyiib' ajwi' chi pikb'il jun li t'ikr rik'in kaqinoq' ut moraad, rik'in kaqjorinkil noq' ut b'aqb'il liin li jwal chaab'il, cho'q re rokeb'aal li Muheb'aal,

³⁸ ut kixk'e oob' chi oqech jo'wi' eb' li xchapleb'. Rik'in oor kixletzi chirixeb' li xsahob' ru ut eb' li t'uyleb', ut rik'in q'anch'iich' kixyiib' eb' li oob' xna'ajeb' li oqech.