Éxodo 34 - Q'eqchi Bible

Laj Moisés kiwulak wi' chik sa' li tzuul Sinaí

¹ Kixye li Qaawa' re laj Moisés: “Tuqub' ru wiib' perpookil pek kama'eb' li xe'wank xb'enwa, ut chiruheb' a'an laa'in tintz'iib'a eb' li aatin tz'iib'anb'ileb' xb'enwa chiruheb' li xajor.

² Kawresi aawib' re naq tattaqe'q wulaj eq'la sa' li tzuul Sinaí; aran, sa' xb'een li tzuul, toxaak'ut aawib' chiwu.

³ Ab'an maajunaq aawochb'een naq tattaqe'q, ut maajun chiwanq chiru chixjunil li tzuul. Chi moko karneer chi moko b'ooyx chi'ichajib'q chiru li tzuul”.

⁴ Laj Moisés kixtuqub' ru wiib' perpookil pek kama'eb' li xe'wank xb'enwa; kiwakliik toj eq'la ut kitaqe'k sa' li tzuul Sinaí jo' chanru kitaqlaak wi' xb'aan li Qaawa', yo chi xk'amb'al sa' ruq' li wiib' chi perpookil pek.

⁵ Toja' naq li Qaawa' kama' li choql naq kikub'e chaq ut kolkanaaq aran, chi xk'atq laj Moisés, ut a'in kixyaab'a xk'ab'a' li Qaawa'.

⁶ Li Qaawa' kinume'k chiru, yo chi xyeeb'al: “Laa'in li Qaawa', li Qaawa', Yos aj uxtaan ut tuulan, li nab'ayk chi josq'o'k ut makach'in li xrahom ut li xtiikilal xch'ool!

⁷ Xaqxo linrahom chiru k'iila o'q'ob' chihab' ut ninkuy li maa'usilal, li q'etq'etil ut li maak; ab'an ink'a' ninkanab'eb' laj maak chi maak'a' ta xtojb'aleb' rix li xb'aanuhom, ut ninteneb' li xmaak li na'b'ej yuwa'b'ej sa' xb'eeneb' li ralal xk'ajol, sa' xb'eeneb' li ri xmam ut li xxikin i”.

⁸ Sa' junpaat laj Moisés kit'ane'k chi wiq'wo ut kixhupub' rib':

⁹ “At Qaawa', at inYos, wi relik chi yaal naq usilal xintaw chawu, chalqat qik'in, us ta laa'o jun tenamit kaw qajolom -chan laj Moisés-. Chakuy chasach li qamaak ut li qamaa'usilal, ut choohaak'ul cho'q tz'aqal aaweechanihom”.

Li Sumwank

¹⁰ Kichaq'ok li Qaawa' ut kixye: “K'e reetal, ok we chi xk'ojob'ankil jun Sumwank eerik'in. Tinb'aanu xninqal sachb'ach'oolej chiru chixjunil li tenamit: maajun sut ki'uxk a'in sa' chixjunil li ruuchich'och' chi moko sa' junaq tenamit. Chixjunileb' li poyanam li wankat wi' te'ril xnimal xb'aanuhom li Qaawa', xb'aan naq q'axal xiwajel li k'aru tqab'aanu wochb'eenat.

¹¹ “K'e reetal li k'aru tatintaqla wi' anaqwan. Twisiheb' chawu laj Amor, laj Kanahán, laj Hit, laj Perés, laj Jib ut laj Jebús.

¹² “Maak'e aawib' sa' sumwank rik'ineb' li wankeb' sa' li na'ajej toxat-okaq wi', re naq ink'a' tate'xra'le.

¹³ Taajuk'i li x'artaleb', taapuk'iheb' li xxaqab'anb'il pek ut taayok'i eb' li xloq'laj toon che'.

¹⁴ “Maahupub' aawib' chiru jalan chik yos xb'aan naq «aj sowen» naxk'ab'a'in li Qaawa': a'an jun Yos aj sowen.

¹⁵ “Maak'e aawib' sa' sumwank rik'ineb' li wankeb' sa' li na'ajej a'an: mare anchal, naq te'xmux rib' chi xloq'oninkil li xyoseb' ut chi mayejak chiruheb', tate'xb'oq ut laa'at taatzeka li xmayejeb'.

¹⁶ Jo'kan ajwi', mare anchal taak'e li xrab'ineb' cho'q rixaqileb' laawalal ut, naq te'xmux rib' li ixaqilb'ej chi xloq'oninkil li xyoseb', te'xk'am ajwi' eb' laawalal chi xb'aanunkil maa'usilal chirix li xyoseb'.

¹⁷ “Maayiib' aapak'b'il yos.

Eb' li xninq'eheb' laj Israel

¹⁸ “Chawoxloq'i li xNinq'e li Wa ink'a' yuub'il. Chiru wuqub' kutan tatwa'oq wa ink'a' yuub'il jo' chanru xatintaqla wi', sa' xq'ehil, sa' li po Abib, xb'aan naq chiru li po Abib kat-elk chaq Ejiipt.

¹⁹ “Chixjunil li xb'een alalb'ej wehaq laa'in; jo'kan ajwi' chixjunileb' li xb'een ral li wakax malaj li karneer, a'eb' li kok' teelom, wehaqeb' laa'in.

²⁰ Li xb'een ral li b'uur taak'e junaq karneer cho'q reeqaj ut, wi ink'a' taak'e reeqaj, tik taatoq xb'aqel xkux. Taak'e reeqaj chixjunileb' li xb'een ralaleb' laawalal ut maajun taak'ulunq wik'in chi maak'a' ta tixk'am chaq.

²¹ “Waqib' kutan tatk'anjelaq, ab'an sa' li xwuq tathilanq; tathilanq sa' xq'ehil li awk ut li q'olok.

²² “Taaninq'ehi li xNinq'eheb' li Xamaan, naraj naxye li xninq'e li xb'een ru laawawimq; jo'kan ajwi' li xNinq'e li Q'olok sa' xraqik li chihab'.

²³ “Ox sut chiru li chihab' te'xk'ut chaq rib' chixjunileb' li winq chiru li Qaawa', xYos laj Israel.

²⁴ Naq twisiheb' li tenamit chawu ut tinnimob'resi laana'aj, wi tattaqe'q ox sut chiru li chihab' chi xk'utb'al aawib' chiru li Qaawa' laaYos, maajun tixrahi laach'och'.

²⁵ “Maayeechi'i xkik'el linmayej rochb'een li wa li wank xyu, chi moko taakanaaq toj sa' li kutan jun chik li xul kamsinb'il sa' xninq'e li Paswa.

²⁶ “Taak'am sa' rochoch li Qaawa' laaYos li xchaab'ilal li xb'een ru laawawimq li na'elk sa' laach'och'. “Maachiq li ch'ina chib'aat sa' xya'al xtu' li xna'”.

²⁷ Chirix chik a'an kixye li Qaawa' re laj Moisés: “Chatz'iib'a eb' li aatin a'in, xb'aan naq rik'ineb' a'an nink'ojob' li Sumwank aawik'in jo' ajwi' rik'ineb' laj Israel”.

²⁸ Chiru ka'k'aal kutan ut ka'k'aal q'oqyink laj Moisés kikanaak chaq aran rik'in li Qaawa', ut ink'a' kiwa'ak chi moko ki'uk'ak; ut kixtz'iib'a chiruheb' li perpookil pek li raatineb' li Sumwank, a'eb' li lajeeb' chi aatin.

Laj Moisés kikub'e chaq sa' li tzuul Sinaí

²⁹ Moqon chik laj Moisés kikub'e chaq sa' li tzuul Sinaí, wan chaq sa' ruq' li wiib' chi perpookil pek re li Sumwank. Ut naq kikub'e chaq sa' li tzuul, ink'a' naxnaw naq nalemtz'unk chik li xnaq' ru xb'aan raatinankil li Qaawa'.

³⁰ Laj Aharón ut chixjunileb' laj Israel ke'xka'ya laj Moisés ut, naq ke'xk'e reetal naq nalemtz'unk li xnaq' ru, ke'xiwak chi jilok chi xk'atq.

³¹ Toja' naq laj Moisés kixb'oqeb', ut laj Aharón rochb'eeneb' chixjunileb' li xb'eenil li komonil ke'nach'ok rik'in; ut laj Moisés ki'ok chi raatinankileb'.

³² Chirix chik a'an ke'jilok chaq chixjunileb' laj Israel, ut laj Moisés kixye reheb' chi kaw chixjunil li yeeb'il chaq re xb'aan li Qaawa' sa' li tzuul Sinaí.

³³ Naq kiraqe'k laj Moisés chi aatinak rik'ineb', kixk'e jun li t'ikr sa' xnaq' ru.

³⁴ Ut rajlal naq nawulak rik'in li Qaawa' chi raatinankil, laj Moisés narisi li t'ikr, tojo' re naq na'elk chaq; ut sa' relik chaq naxye reheb' laj Israel li k'aru chaq'rab'inb'il wi' xb'aan li Yos,

³⁵ ut eb' laj Israel neke'ril naq nalemtz'unk li xnaq' ru. Chirix chik a'an laj Moisés naxmuq wi' chik li xnaq' ru, tojo' re naq na'ok wi' chik chi raatinankil li Qaawa'.