Éxodo 32 - Q'eqchi Bible

V. KE'XQ'ET RAATIN LI YOS UT KE'RAK'OB'RESI WI' CHIK LI SUMWANK (32-34) Ke'xyiib' li ch'ina wakax oor

¹ Naq eb' li tenamit ke'xk'e reetal naq laj Moisés yo chaq chi b'ayk chi kub'eek sa' li tzuul, ke'xch'utub' rib' chi xsutam laj Aharón ut ke'xye re: “Seeb'an, yiib' junaq qayos li taak'amoq b'e chiqu, xb'aan naq ink'a' naqanaw k'aru xk'ul chaq laj Moisés, li ki'isink chaq qe sa' li tenamit Ejiipt”, chankeb'.

² Kichaq'ok laj Aharón ut kixye reheb': “Isihomaqeb' li xka'xik leerixaqil, leeralal, leerab'in, a'eb' li yiib'anb'ileb' rik'in oor, ut k'amomaq chaq”.

³ Toja' naq chixjunileb' li tenamit ke'risiheb' li xka'xik oor ut ke'xq'axtesiheb' re laj Aharón.

⁴ Ut a'in kixxok sa' ruq'eb', kixyiib' jun molde, kixha'resi li oor ut kixyiib' jun ch'ina wakax. Toja' naq eb' a'an ke'xye: “A'an a'in laayos, a Israel. A'an ki'isink chaq aawe sa' li tenamit Ejiipt”, chankeb'.

⁵ Naq laj Aharón kiril a'in, kixxaqab' jun li artal chiru li ch'ina wakax ut kixye: “Wulaj taawanq ninq'e sa' xk'ab'a' li Qaawa'”.

⁶ Sa' li kutan jun chik, toj hik'ho, ke'wakliik ut ke'xyeechi'i xmayejeb' ut k'atb'il xul. Moqon eb' li tenamit ke'chunlaak chi wa'ak chi uk'ak, ut chirix a'an ke'wakliik chi xajok ut chi maakob'k.

⁷ Toja' naq li Qaawa' kiraatina laj Moisés ut kixye re: “Ayu, kub'en sa' li tzuul, xb'aan naq xe'maakob'k laatenamit, li kawisiheb' chaq aran Ejiipt.

⁸ Sa' junpaat xe'risi rib' sa' li b'e xink'ut chiruheb'. Xe'xyiib' jun saaj wakax rik'in oor ut xe'xhupub' rib' chiru; xe'xyeechi'i xmayejeb' ut xe'xye: «A'an a'in laayos, a Israel. A'an ki'isink chaq aawe sa' li tenamit Ejiipt»”.

⁹ Kixye ajwi' li Qaawa' re laj Moisés: “Nink'e reetal naq li tenamit a'in q'axal kaw xjolom.

¹⁰ Kanab'in anaqwan chi xk'eeb'al injosq'il sa' xb'eeneb' re naq teb'insach; ut laa'at tatink'e cho'q xnimal ru tenamit”.

¹¹ Ab'anan laj Moisés kixyal xq'e chi xtuulanob'resinkil li Qaawa' li xYos, ut kixye re: “At Qaawa', k'a'ut naq xchalk laajosq'il sa' xb'een laatenamit, li kawisiheb' chaq aran Ejiipt rik'in xnimal aawankil ut xkawilal laawuq'?

¹² Ma taawaj tab'i' te'xye eb' laj Ejiipt: «Xlab'al xch'ool kirisiheb' wi', re xkamsinkileb' sa'eb' li tzuul ut re xsachb'aleb' chi junajwa sa' xb'een li ruuchich'och'»? Kanab' laajosq'il ut maataqla chaq li rahilal sa' xb'eeneb' laatenamit.

¹³ Jultikaq aawe laj Abrahán, laj Isahak ut laj Israel, aj k'anjeleb' chawu, li kayeheb' wi' li jurament a'in: «Tink'e chi k'ihank leeralal eek'ajol jo' xk'ihaleb' li chahim sa' choxa. Chixjunil li ch'och' a'in li xinyeechi'i eere, tink'e reheb' leeralal eek'ajol, ut eb' a'an te'eechaninq re chi junajwa»”.

¹⁴ Li Qaawa' kiruxtaana ruheb' ut ink'a' kixtaqla li rahilal yeeb'il chaq re li xtenamit.

¹⁵ Toja' naq kisutq'iik chaq laj Moisés, kikub'e chaq sa' li tzuul ut kixk'am sa' ruq' li wiib' chi xtz'alampekil Sumwank: tz'iib'anb'ileb' li perpookil pek a'an sa' xka'pak'alil, chiru ut chirix.

¹⁶ Eb' li perpookil pek a'aneb' xb'aanuhom li Yos, ut eb' li aatin tz'iib'anb'ileb' chiru xtz'iib'ahom li Yos.

¹⁷ Naq laj Josué kirab'i xyaab' xkuxeb' li tenamit yookeb' chi choqink, kixye re laj Moisés: “Japjookeb' re chi yalok sa' li xmuheb'aaleb'”.

¹⁸ Kichaq'ok laj Moisés: “Li choqink nawab'i maawa' re yalok, maawa' ajwi' xyaab'eb' li sachenaqeb' xwankil; b'ichank b'an li na'ab'imank”, chan.

¹⁹ Naq laj Moisés kijilok chi xk'atq li xmuheb'aaleb' ut kiril li saaj wakax yiib'anb'il rik'in oor ut li xajok, k'ajo' naq kichalk xjosq'il! Kixkuteb' li tz'alam pek wank sa' ruq' ut kixpuk'iheb' sa' xtoon li tzuul.

²⁰ Chirix chik a'an kixchap li saaj wakax xyiib'ahomeb' a'an, kixk'at ut kixke' toj reetal kipojtz'o'k: kixtzuptzupi li xpojtz'il sa' ha' ut kixk'e chiruk'eb' laj Israel.

²¹ Ut kixye re laj Aharón: “K'aru xe'xb'aanu aawe li tenamit a'in naq xak'am chaq sa' xb'eeneb' li xnimal maak a'in?”, chan.

²² Kichaq'ok laj Aharón: “Wa', matjosq'o'k. Laa'at nakanaw naq li tenamit a'in naxik xch'ool chi xb'aanunkil li ink'a' us.

²³ Xe'xye we: «Chayiib' junaq qayos li taak'amoq b'e chiqu, xb'aan naq ink'a' naqanaw k'aru xk'ul chaq laj Moisés, li ki'isink chaq qe sa' li tenamit Ejiipt».

²⁴ Ut laa'in xinchaq'ok: «Li wanq x'oor, risiiq chaq». Eb' a'an xe'risi ut xe'xk'e we, ut laa'in xinkut sa' xam: chi jo'kan x'elk chaq li ch'ina wakax a'in”.

²⁵ Kiril laj Moisés naq ink'a' chik ch'olch'o xna'leb'eb' li tenamit (xb'aan naq laj Aharón kixkanab'eb' chi xloq'oninkil li yiib'anb'il yos, sa' xyanqeb' li xik' neke'ilok reheb');

²⁶ jo'kan naq kixxaqab' rib' sa' rokeb'aal li na'ajej b'arwi' wankeb' li xmuheb'aaleb', ut kixye: “Chalqex wik'in laa'ex li nekepaab' li Qaawa'!”, chan. Ut chixjunileb' li ralal xk'ajol laj Leví ke'xch'utub' rib' chi xsutam.

²⁷ Toja' naq kixye reheb': “Jo'ka'in naxye li Qaawa', xYos laj Israel: «B'ak'omaq leech'iich' cheesa' chejunilex, chesuti li na'ajej a'in sa' junqre kab'l, ut li junjunq chixkamsi li ras, li riitz'in, li ramiiw ut li rech'alal»”.

²⁸ Eb' li ralal xk'ajol laj Leví ke'xpaab' li xtaqlankileb' xb'aan laj Moisés, ut sa' li kutan a'an ke'kamk tana lajeek'aal xwaqxaq o'q'ob' (3,000) chi winq sa' li tenamit.

²⁹ Kixye ut laj Moisés: “Sa' li kutan a'in laa'ex xexxaqab'aak chi k'anjelak cho'q aj tij chiru li Qaawa', xb'aan naq li junjunq xkamsi li ralal, li ras malaj li riitz'in. Jo'kan naq li Qaawa' tixk'e eere li rosob'tesihom sa' li kutan a'in”.

³⁰ Sa' li kutan jun chik kixye laj Moisés reheb' li tenamit: “Makach'in xnimal li maak xeb'aanu. Anaqwan tintaqe'q wi' chik rik'in li Qaawa': mare chan naq tixkuy eemaak”.

³¹ Naq laj Moisés kisutq'iik wan wi' li Qaawa', kixye re: “Eb' li tenamit a'in k'ajo' xnimal li maak xe'xb'aanu: xe'xyiib' jun xyoseb' rik'in oor.

³² Ab'anan, us raj taakuyeb' xmaak. Wi ut ink'a', sach ink'ab'a' sa' li hu tz'iib'anb'il aab'aan”.

³³ Kichaq'ok li Qaawa' ut kixye re laj Moisés: “Ink'a'. Li xmaakob'k chiwu, a'an li tinsach xk'ab'a' sa' linhu.

³⁴ Ayu ut k'ameb' li tenamit b'arwi' xinye aawe; k'amolb'ehaq chawu lin'ánjel. Ab'an naq taawulaq xq'ehil, tinrahob'tesiheb' xb'aan naq xe'maakob'k”.

³⁵ Ut li Qaawa' kixrahob'tesiheb' li tenamit xmaak li ch'ina wakax yiib'anb'il chaq xb'aan laj Aharón.