Éxodo 27 - Q'eqchi Bible

Li artal reheb' li k'atb'il mayej

¹ “Taayiib' li artal rik'in akasya, lajeeb' k'utub' xnimal li roq ut lajeeb' k'utub' xnimal li ru; kaaxukuutaq li xq'e'am ut wan xwaq k'utub' li xteram.

² Sa' li xkaaxukuutil li artal taak'e kaahib' chi xukub' li te'elq chi xk'atq, junajaqeb' ru rik'in a'an, ut taaletziheb' rix rik'in q'anch'iich'.

³ Taayiib' xna'aj li cha; taayiib' ajwi' eb' li xokleb', li k'uuleb'aal kik', li chapleb' ut xna'aj ru xam: chixjunileb' li k'anjelob'aal a'in taayiib' rik'in q'anch'iich'.

⁴ Taayiib' ajwi' rik'in q'anch'iich' jun reex cho'q re li artal hopoxaq ru, ut sa' xkaahichal li xxuk taak'e kaahib'aq argoya yiib'anb'ilaqeb' rik'in q'anch'iich'.

⁵ Taak'e a'an rub'el xsahob' ru li artal, toj taq'a, re naq taawulaq toj sa' xyiitoq li artal.

⁶ Taayiib' ajwi' rik'in akasya wiib'aq che' re xpaqonkil li artal, ut taaletziheb' rix rik'in q'anch'iich';

⁷ taach'ikeb' li che' a'in sa'eb' li argoya li wankeb' chi xka'pak'alil li artal re xpaqonkil;

⁸ ut hophooq xsa' taayiib' li artal, rik'in tz'alamche'. Kama' xk'ute'k chawu sa' li tzuul, jo'kan naq taab'aanu.

Li neb'aal

⁹ “Taayiib' ajwi' xneb'aal li Loq'laj Muheb'aal. Sa' xjayal Nejeb, sa' rokeb'l li iq', taawanq xt'ilkem li neb'aal yiib'anb'ilaq rik'in b'aqb'il liin li jwal chaab'il, kach'in chik maa waqxaqib' xka'k'aal moqoj xnimal li roq.

¹⁰ Li xjunmay chi roqechal te'hilanq sa' xb'een junmay chi xna'ajeb' te'ok wi', yiib'anb'ilaqeb' rik'in q'anch'iich'; eb' li xchapleb' ut eb' li xt'uyleb' yiib'anb'ilaqeb' rik'in plaat.

¹¹ Sa' xjayal releb'l iq' taawanq ajwi' t'ilkem, kach'in chik maa waqxaqib' xka'k'aal moqoj xnimal li roq. Chiwanq xjunmayaq roqechal li te'hilanq sa' xb'een junmay chi xna'ajeb', yiib'anb'ilaqeb' rik'in q'anch'iich'; eb' li xchapleb' li oqech ut eb' li xt'uyleb' yiib'anb'ilaqeb' rik'in plaat.

¹² Sa' li xq'e'am li neb'aal, sa' xjayal rokeb'l li saq'e, taawanq t'ilkem kach'in chik maa kaalaju moqoj xnimal li roq; taawanq lajeeb'aq roqechal ut lajeeb'aq li xna'ajeb' te'ok wi'.

¹³ Li xnimal ru li neb'aal sa' xjayal releb'l saq'e, kach'in chik maa kaalajuhaq moqoj.

¹⁴ Taak'e numenaq kaahib' moqoj chi t'ilkem chi nim; jo'kan ajwi' taak'e oxib'aq roqechal ut oxib'aq xna'ajeb' te'ok wi'.

¹⁵ Sa' li junpak'al chik taak'e ajwi' li t'ilkem, numenaq kaahib' moqoj xnimal li roq, ut oxib'aq roqechal ut oxib'aq xna'ajeb' te'ok wi'.

¹⁶ Li rokeb'aal li neb'aal taawanq xt'ikrul wan xwaq moqoj xnimal li roq, pik'b'ilaq rik'in kaqinoq' ut moraad, rik'in kaqjorinkil noq' ut b'aqb'il liin li jwal chaab'il; taawanq kaahib'aq roqechal ut kaahib'aq xna'ajeb' te'ok wi'.

¹⁷ Chixjunileb' li oqech li te'wanq chi xsutam li neb'aal, te'wanq xt'uyleb' yiib'anb'ileb' rik'in plaat. Eb' li xchapleb' yiib'anb'ilaqeb' rik'in plaat, ut eb' li xna'ajeb' te'ok wi' yiib'anb'ilaqeb' rik'in q'anch'iich'.

¹⁸ Kach'in chik maa waqxaqib' xka'k'aal moqoj li xnimal roq li neb'aal, kach'in chik maa kaalaju moqoj li xnimal li ru ut lajeeb'aq k'utub' xteram; yiib'anb'ilaqeb' li xt'ikrul rik'in b'aqb'il liin li jwal chaab'il, ut rik'in q'anch'iich' li junjunq chi na'ajej te'ok wi' li oqech.

¹⁹ Chixjunil li k'a'aq re ru li taak'anjelaq sa' li Loq'laj Muheb'aal yiib'anb'ilaq rik'in q'anch'iich'; jo'kanaq ajwi' chixjunileb' li xch'iich'ul li te'lapeeq sa' ch'och' ut li xsutb'al li neb'aal.

Li aseeyt

²⁰ “Ye reheb' laj Israel naq te'xk'am chaq aawe tz'aqal aseeyt re oliiw, re naq junelik lochlooq xxamlel li saqenk.

²¹ Laj Aharón rochb'eeneb' li ralal te'iloq re chiru li Qaawa', sa' xMuheb'aal li ch'utam, junpak'al li t'ilkem li wank chi xk'atq li xLoq'laj Kaaxil li Sumwank, chalen ewu toj eq'la. A'in jun chaq'rab' xaqxooq xwankil chi junelik cho'q reheb' li ralal xk'ajol laj Israel.