Éxodo 23 - Q'eqchi Bible

Li tiikilal

¹ “Matyoob'ank aatin chi moko chatenq'a li wank xmaak, rik'in xyeeb'al tik'ti'.

² “Us ta q'axal naab'aleb' li neke'xb'aanu li ink'a' us, ab'an matxik chirixeb'. “Chiru laj raqol aatin maak'e aawib' sa' xyanqeb' li naab'aleb' li te'raj xsachb'al xwankil li yaal,

³ chi moko chatenq'a li neb'a' sa' li xpleet wi ink'a' us yo chi xb'aanunkil.

⁴ “Wi taataw li b'ooyx malaj li b'uur li xsachk chiru li xik' na'ilok aawe, tento taaq'axtesi re.

⁵ Wi xawil naq li xb'uur li natz'eqtaanank aawe xt'ane'k rub'el li iiq, mayalaawil, ayu b'an chi xtenq'ankil ut chatenq'a ajwi' laj eechal re.

⁶ “Maasach xwankil li yaal re xtenq'ankil laawechneb'a'il sa' li xpleet.

⁷ “Maaye li tik'ti' sa' raqleb'aal aatin; maak'e chi kamsiik li ani maak'a' xmaak ut tiik xch'ool, chi moko taaye naq maak'a' xmaak li ink'a' us xch'ool.

⁸ “Matk'uluk maatan, xb'aan naq li maatan naxmutz'o'b'resi li seeb'eb' xch'ool ut naxpo' ru li tiikilal.

⁹ “Maarahob'tesi li jalan xtenamit: ak nekenaw chanru li wank sa' jalan tenamit, xb'aan naq ab'lex ajwi' laa'ex naq kexwank chaq sa' li tenamit Ejiipt.

Li hilank cho'q re li Qaawa'

¹⁰ “Waqib' chihab' ajwi' tat-awq sa' laach'och' ut taaxok ru li awimq;

¹¹ ab'an sa' li xwuq taakanab' chi hilank ut chi pimo'k, re naq te'wa'aq li neb'a' li wankeb' sa' laatenamit, ut li taa'ela'anq taawa'aaq xb'aaneb' li xul li wankeb' sa' pim. Jo'kan ajwi' taab'aanu rik'in li xna'aj laa'uub' ut laa'oliiw.

¹² “Chiru waqib' kutan tatk'anjelaq, ab'an sa' li xwuq tathilanq, re naq te'hilanq laab'ooyx ut laab'uur, ut te'k'ulunq xch'ool li xyum laamoos ut li jalan xtenamit.

¹³ “Chepaab' chixjunil li xinye eere. Maayaab'asi xk'ab'a' eb' li jalanil yos, chi moko teepatz' xk'ab'a'eb'.

Xninq'eheb' laj Israel

¹⁴ “Ox sut chiru li chihab' tinaaninq'ehi.

¹⁵ Taanima ru li xninq'e li wa ink'a' yuub'il. Chiru wuqub' kutan tatwa'oq wa ink'a' yuub'il, jo' chanru laataqlankil, sa' xq'ehil, chiru li po Abib, xb'aan naq chiru li po a'an kat-elk chaq Ejiipt. Maajun taachalq wik'in chi maak'a' ta tixk'am chaq.

¹⁶ “Taanima ajwi' ru li xninq'e li q'olok, li xninq'e li xb'een ru laak'anjel ut li k'aru xawaw sa' laach'och'; jo'kan ajwi' taaninq'ehi li xokok sa' xraqik li chihab', naq taaxok sa' laach'och' chixjunil li ru laak'anjel.

¹⁷ “Ox sut chiru li chihab' te'xk'ut rib' laawech winqilal chiru li Qaawa' Yos.

¹⁸ “Maayeechi'i xkik'el linmayej rochb'een wa li wank xyu, chi moko taak'uula xxeeb'ul linninq'e toj sa' li kutan jun chik.

¹⁹ “Taak'am sa' rochoch li Qaawa' laaYos li xchaab'ilal li xb'een ru laawawimq. “Maachiq li ch'ina chib'aat sa' xya'al xtu' li xna'.

Li x'ánjel li Qaawa'

²⁰ “K'e reetal, laa'in tintaqla jun lin'ánjel chawu re naq tatril sa' b'e ut tatxb'eres toj sa' li na'ajej li xinkawresi cho'q aawe.

²¹ Wanqat sa' xyaalal chiru ut chawab'i xyaab' xkux. Maaq'et li raatin: a'an ink'a' tixkuy eemaak xb'aan naq wankin rik'in.

²² Wi taawab'i chi us xyaab' xkux ut taab'aanu chixjunil li tinye, laa'in xik' te'wil eb' li xik' neke'ilok aawe ut tintz'eqtaana eb' li neke'tz'eqtaanank aawe.

²³ K'amolb'ehaq lin'ánjel chawu ut tatroksi sa' xch'och'eb' laj Amor, laj Hit, laj Perés, laj Kanahán, laj Jib ut laj Jebús, ut teb'insach chi junajwa.

²⁴ Maahupub' aawib' chiru li xyoseb'. Maaloq'oniheb' chi moko taab'aanu jo' neke'xb'aanu eb' a'an; tento b'an naq taasacheb' chi junajwa ut taapuk'iheb' li xninqal eetalil.

²⁵ Taaloq'oni ru li Qaawa' laaYos, ut laa'in twosob'tesi laawa laawuk'a' ut ink'a' tatinkanab' chi yajerk.

²⁶ Maajun li ixq sa' laatenamit tixtz'eq xk'uula'al chi moko tkanaaq chi maak'a'eb' xkok'al. Laa'in tink'e chi najto'k ru laayu'am.

²⁷ “Tink'e naq taawanq xiw ut rahil ch'oolej chawu laa'at sa' chixjunileb' li tenamit tatwulaq wi', ut tink'eheb' chi elelik chawu chixjunileb' li xik' neke'ilok aawe.

²⁸ Tintaqlaheb' li ch'ub' chawu laa'at: eb' a'an te'xyoolesi chawu eb' laj Jib, laj Kanahán ut laj Hit.

²⁹ Ink'a' te'wisi chixjunileb' chi junpaat; ink'a' twisiheb' chawu chiru jun chihab': mare anchal tkanaaq li ch'och' chi maak'a'eb' poyanam ut te'tamq sa' eeyanq li josq' aj xul.

³⁰ Timil timil twisiheb' chawu toj reetal tatk'ihanq ut toxaaweechani li ch'och'.

³¹ Tinxaqab' aanub'ajl chalen chaq sa' li Kaqi Palaw toj sa' li palaw reheb' laj Filistea, chalen chaq sa' li chaqich'och' toj sa' li nima' Éwfrates. Tinq'axtesiheb' sa' aawuq' li wanqeb' sa' li na'ajej a'an, ut laa'at taawisiheb' sa' xnaq' aawu.

³² “Maak'e aawib' sa' sum'aatin rik'ineb' li tenamit a'an chi moko rik'in li xyoseb'.

³³ Maakanab'eb' chi wank sa' laana'aj, re naq ink'a' tate'xk'e chi maakob'k chiwu. Mare anchal tat-aaleeq ut taaloq'oniheb' li xyoseb'”.