Éxodo 11 - Q'eqchi Bible

Kiyehe'k chi junxilaj resil li xlaje xnimal rahilal

¹ Kixye li Qaawa' re laj Moisés: “Toj jun chik li rahilal tintaqla sa' xb'een laj Parahón ut sa' xb'eeneb' laj Ejiipt. Chirix chik a'an texxkanab' chi elk arin ut, naq texxkanab' chi xik, texrisi chi junwaakaj arin.

² Aatinan b'i' rik'in li tenamit re naq li junjunq chi winq, li junjunq chi ixq chixtz'aama re li rechkab'al li k'aru plaat ut oor wank reheb'”.

³ Li Qaawa' kixtenq'aheb' li xtenamit chi xtawb'al usilal chiruheb' laj Ejiipt. Laj Moisés a'an xnimal ru winq sa' xsutam Ejiipt, jo' chiruheb' laj tenq' re laj Parahón jo' chiruheb' li tenamit.

⁴ Toja' naq laj Moisés kixye re laj Parahón: “Jo'ka'in naxye li Qaawa': «Tuqtu q'oqyink tinnume'q Ejiipt,

⁵ ut te'kamq chixjunileb' li xb'een alalb'ej sa' li tenamit a'in, chalen li xb'een ralal laj Parahón li taak'ojlaaq sa' xna'aj, toj rik'in li xb'een ralal li moosej aj ke'nel; talaje'kamq ajwi' chixjunileb' li xb'een ral li xul.

⁶ Ut sa' chixjunil xsutam Ejiipt taawanq jun xnimal rahil japok-e jo' maajun wa kiwank chi moko taawanq chik».

⁷ Ab'an sa' xyanqeb' laj Israel chi moko junaq tz'i' taawoob'anq re junaq poyanam malaj ut xul, re teenaw naq tiitookeb' ru eb' laj Israel chiruheb' laj Ejiipt.

⁸ Toja' naq talaje'chalq wik'in chixjunileb' laj k'anjel a'in, te'xwiq'ib' rib' chiwu ut te'xye: «Elen laa'at aawochb'een chixjunileb' laatenamit». Toja' naq tin'elq”. K'ajo' xjosq'il laj Moisés naq ki'elk rik'in laj Parahón.

⁹ Toja' naq li Qaawa' kixye re laj Moisés: “Laj Parahón ink'a' texrab'i, ut chi jo'kan tinnaab'alob'resi linsachb'ach'oolej sa' li tenamit Ejiipt”, chan.

¹⁰ Laj Moisés ut laj Aharón ke'xb'aanu chixjunileb' li sachb'ach'oolej a'in chiru laj Parahón; ab'an li Qaawa' kixkawub'resi xch'ool laj Parahón ut a'in ink'a' kixkanab'eb' laj Israel chi elk sa' li xtenamit.