Éxodo 1 - Q'eqchi Bible

I. LI RELIKEB' LAJ ISRAEL ARAN EJIIPT (1,1—15,21) Li xnimal xrahilal eb' laj Israel aran Ejiipt

¹ A'aneb' a'in li xk'ab'a'eb' laj Israel li koxe'okaq Ejiipt rochb'eeneb' laj Jakob, li junjunq rochb'een li xjunkab'al:

² laj Rubén, laj Simehón, laj Leví, laj Judá,

³ laj Isakar, laj Sabulón, laj Benjamín,

⁴ laj Dan, laj Neftalí, laj Gad ut laj Aser.

⁵ Chixjunileb' li yo'lajenaqeb' rik'in laj Jakob lajeeb' xkaak'aaleb' (70). Laj José ak wank aran Ejiipt.

⁶ Kikamk laj José, ke'kamk eb' li ras riitz'in jo'wi' chixjunileb' li xkomon,

⁷ ab'anan eb' laj Israel ke'alank ut ke'naab'alo'k. K'ajo' naq ke'k'ihank ut ke'xtaw xwankilaleb': ke'xnujob'resi chixjunil li tenamit!

⁸ Aran Ejiipt kiwakliik jalan chik li awab'ej li maak'a' naxnaw chirix laj José.

⁹ Jo'kan naq kixye reheb' li xtenamit: “K'ehomaq reetal, li xtenamiteb' laj Israel q'axal naab'aleb' ut kaweb' rib' chiqu laa'o.

¹⁰ Chiwanq taxaq qana'leb' re naq ink'a' chik te'k'ihanq. Mare anchal taawanq xnimal yalok ut eb' a'an te'xjunaji rib' rik'ineb' li xik' neke'ilok qe, te'yaloq qik'in ut te'elq sa' li qatenamit”.

¹¹ Toja' naq ke'xxaqab'eb' aj taqlanel re xrahob'tesinkileb' laj Israel rik'in kawil k'anjel, ut eb' laj Israel ke'xyiib' cho'q re laj Parahón eb' li tenamit-k'uuleb'aal, Pitón ut Ramsés xk'ab'a'.

¹² Ab'anan, naq jwal kaw neke'rahob'tesiik, q'axal chik neke'pukank ut neke'k'ihank; jo'kan naq eb' laj Ejiipt k'ajo' naq ke'xxiwa ruheb' laj Israel.

¹³ Ke'numtaak sa' xb'eeneb' laj Israel ut ke'xtaqlaheb' chi k'anjelak cho'q aj mun,

¹⁴ ut ke'xrahob'tesiheb' rik'in kawil k'anjel chi b'eelank seb', yiib'ank xan ut rik'in yalaq k'a' chi k'anjelil na'uxmank sa' k'aleb'aal. Chixjunil li k'anjel a'in ke'xb'aanu eb' laj Israel chi q'axal rahob'tesinb'ileb' ut minb'ileb' ru.

¹⁵ Li awab'ej re Ejiipt kiraatinaheb' ajwi' li ixq aj xokol xk'uula'aleb' laj Hebreo: xSifrá xk'ab'a' li jun ut li jun chik xPuhá.

¹⁶ Kixye reheb': “Naq teerileb' li ixq aj hebreo, chek'e reetal chi us ma teelom malaj ixq li k'uula'al: wi teelom li k'uula'al taayo'laaq, chekamsi; wi ch'ina ixqa'al, chekanab'aq chi yo'yo”, chan.

¹⁷ Ab'an eb' laj xokol k'uula'al neke'xxiwa ru li Yos ut ink'a' ke'xb'aanu li ke'taqlaak wi' xb'aan li awab'ej re Ejiipt, ke'xkanab' b'an chi yo'yo eb' li kok' teelom.

¹⁸ Jo'kan naq li awab'ej re Ejiipt kixtaqla xb'oqb'aleb' laj xokol k'uula'al ut kixpatz' reheb': “K'a'ut naq xeb'aanu chi jo'kan ut nekekanab' chi yo'yo eb' li kok' teelom?”, chan.

¹⁹ Ke'chaq'ok eb' laj xokol k'uula'al ut ke'xye re laj Parahón: “Xb'aan naq eb' li ixq aj hebreo moko jo'keb' ta laj Ejiipt: a'aneb' q'axal kaweb' rib' ut, maji' nawulak laj xokol k'uula'al rik'ineb', ak xe'k'iraak chik”, chankeb'.

^20-21 Li Yos kirusilaheb' laj xokol k'uula'al ut kixk'e naab'al li ralal xk'ajoleb', xb'aan naq ke'xxiwa ru li Qaawa'. Ut eb' laj Israel ke'naab'alo'k ut ke'xtaw xwankilaleb';

²² jo'kan naq laj Parahón kixk'e li chaq'rab' a'in re chixjunil li tenamit: “Chixjunileb' li kok' teelom li te'yo'laaq kutumaqeb' sa' nima'; a'ut eb' li kok' ixqa'al chekanab'eb' chi yo'yo”.