Ester 3 - Q'eqchi Bible

Laj Mardokeo ut laj Amán

¹ Chirix naq ak xk'ulmank a'in, laj Asuero li awab'ej kixtaqsi xwankil laj Amán, ralal laj Hamdatá, aj Agag, ut kixxaqab' cho'q xjolomil chixjunileb' li ninqeb' xwankil.

² Chixjunileb' laj k'anjel chiru li awab'ej neke'xwiq'ib' rib' ut neke'xxulub' li xjolomeb' chiru laj Amán naq nanume'k malaj naq xaqxo chiruheb', xb'aan naq jo'kan xyehom li awab'ej; ab'an laj Mardokeo ink'a' kiraj xpaab'ankil li chaq'rab' a'in.

³ Toja' naq eb' laj k'anjel chiru li awab'ej ke'xye re laj Mardokeo: “K'a'ut naq ink'a' nakapaab' li raatin li awab'ej?”, chankeb'.

⁴ Ut rajlal kutan neke'xye re li aatin a'in, ab'an laj Mardokeo ink'a' naxpaab'eb'. Toja' naq koxe'xseeraq'i re laj Amán, re rilb'al laj Mardokeo ma toj xaqxo sa' li raatin, xb'aan naq ak xyehom reheb' naq a'an aj Judiiy.

⁵ Naq laj Amán kixk'e reetal naq laj Mardokeo ink'a' nawiq'laak chi moko naxhupub' rib' chiru, k'ajo' naq kichalk xjosq'il.

⁶ Ut naq ke'xye re li xtenamitul laj Mardokeo, kixk'oxla naq moko tz'aqal ta xrahob'tesinkil xjunes laj Mardokeo, tento aj b'an wi' xsachb'aleb' chixjunileb' laj Judiiy li wankeb' sa' x'awab'ejihom laj Asuero.

Li chaq'rab' re xsachb'aleb' laj Judiiy

⁷ Sa' xb'een li po re xkab'laju chihab'il chi awab'ejink laj Asuero, naraj naxye sa' li po Nisán, ke'xb'uuli rix li po, chiru laj Amán, re xxaqab'ankil xkutankil xkamsinkileb' laj Judiiy, ut ki'elk li oxlaju kutan xb'e li po Adar.

⁸ Toja' naq laj Amán kixye re laj Asuero li awab'ej: “Sa' xyanqeb' chixjunil li tenamit li wankeb' sa' laa'awab'ejihom, wank jun tenamit li jalan wi' chiruheb' li junch'oleb' chik, jalan wi' li xchaq'rab'eb', ut ink'a' neke'xpaab' laachaq'rab' laa'at, at awab'ej. Moko us ta cho'q aawe naq wanqeb' li tenamit a'an sa' laa'awab'ejihom.

⁹ Jo'kan utan, wi nawulak chawu, at awab'ej, xtz'iib'aaq junaq chaq'rab' re xsachb'aleb' chixjunil li tenamit a'an, ut laa'in tinq'axtesi reheb' laj k'anjel chawu wuqub' mil rik'in oxlajuk'aal (7,260) kintal chi plaat, re te'xk'uula sa' xk'uuleb'aal li awab'ej”, chan.

¹⁰ Toja' naq li awab'ej kirisi li xmatq'ab' chi ru'uj ruq' ut kixq'axtesi re laj Amán, li xik' narileb' laj Judiiy,

¹¹ ut kixye re: “Kanaaq cho'q aawe li plaat. Sa' laawuq' tinkanab' li tenamit a'an re taab'aanu reheb' li k'aru taawaj xb'aanunkil”, chan.

¹² Sa' li kab'laju xb'e li xb'een po re xtiklajik li chihab' ke'b'oqmank eb' laj tz'iib' neke'k'anjelak chiru li awab'ej, ut eb' a'in ke'xtz'iib'a li aatin kixye laj Amán reheb' li ruuchileb' li awab'ej jo'wi' reheb' laj jolominel li wankatqeb' sa'eb' li ninq ut kok' tenamit. Li esilal ke'tz'iib'amank sa' raatinob'aaleb' ut xtz'iib'eb' li junjunq chi tenamit, ut kaaxtinb'ileb' sa' xk'ab'a' laj Asuero li awab'ej;

¹³ ut ke'taqlaje'k chirixeb' li taql sa' chixjunil li tenamit wankeb' sa' li awab'ejihom. Sa' li hu tz'iib'anb'il reetalil naq te'sache'q chixjunileb' laj Judiiy, a' yaal ma saajeb', malaj cheekel poyanameb', kok'al malaj ixqeb'; ut taa'eechanimanq li k'a'aq re ru reheb' sa' jun chi kutan, sa' li kab'laju xb'e li xkab'laju pohil li chihab', a'an li po Adar.

¹⁴ Li hu a'in kik'eemank jo' chaq'rab' ut kik'eemank chi nawe'k sa' chixjunileb' li ninq ut kok' tenamit, re naq sa' li kutan a'an ak yo'oon wanqeb' chixjunileb'.

¹⁵ Eb' li xtaql li awab'ej koheb' chi junpaat jo' taqlanb'ileb' wi', ut li esil kipukank ajwi' sa' li tenamit Susa. Naq li awab'ej ut laj Amán yookeb' chi uk'ak chi saheb' sa' xch'ool, k'ajo' li rahil ch'oolej sa' li tenamit Susa.