Ester 2 - Q'eqchi Bible

Lix Ester kisik'e'k ru cho'q xna'eb' li tenamit

¹ Chirix chik a'in, naq ak xnume'k xjosq'il laj Asuero, ki'ok chi xk'oxlankil chixjunil li kixb'aanu lix Vasti ut li kiyeemank chirix a'an.

² Toja' naq eb' laj k'anjel chiru ke'xye re: “Aajel ru naq te'sik'manq saaj ixq, toj maji' wanjenaqeb' rik'in winq ut jwal ch'ina'useb', cho'q re li awab'ej.

³ Li awab'ej xxaqab'aqeb' li te'xb'eeni chixjunileb' li tenamit li wankeb' rub'el xwankil, re te'xk'ameb' chaq arin Susa, sa' rochocheb' li ixq, chixjunileb' li tuq'ixq jwal ch'ina'useb' ut toj maji' muxb'ileb', ut te'ch'oolaniiq xb'aan li winq aj k'anjel chiru laj Asuero ut aj k'aak'alenel reheb' li ixq. Ut a'an taak'ehoq reheb' li k'aru aajel ru re te'xtiqib' rib' chi chaab'il.

⁴ Li ch'ina ixq li taawulaq chiru li awab'ej, a'an taakanaaq cho'q reeqaj lix Vasti”, chankeb'. Kiwulak chiru li awab'ej eb' li aatin a'in, ut jo'kan ki'uxmank.

⁵ Sa' li tenamit Susa wank jun li winq aj Judá, aj Mardokeo xk'ab'a', ralal laj Yaír, ralal laj Semehí, ralal laj Kis, xkomoneb' laj Benjamín.

⁶ A'an xkomoneb' li k'iila tenamit li ke'isiik Jerusalén xb'aan laj Nabukodonosor, li awab'ej re Babilonia, ut ke'k'ame'k aran Babilonia, rochb'eeneb' laj Jekonías, awab'ej re Judá.

⁷ Sa' rochoch laj Mardokeo wank li xrab'in li rikan, li maak'a' chik xna' xyuwa', xHadasá xk'ab'a', x'Ester ajwi' nayeemank re. K'ajo' xch'ina'usal li ixqa'al a'an ut chaab'il na'ilok. Naq kikamk li xna' xyuwa', laj Mardokeo kixxok ut kixk'iiresi jo' jun tz'aqal xrab'in.

⁸ Naq kipuktesimank resil li chaq'rab' kixk'e li awab'ej, naab'aleb' li tuq'ixq ke'ch'utub'aak aran Susa, b'arwi' wank laj Hegay, laj ilol reheb' li ixq, ut lix Ester wank sa' xyanqeb'.

⁹ Laj Hegay q'axal kiwulak chiru lix Ester ut kisaho'k xch'ool rik'in. Jo'kan naq kixseeb'a xch'oolaninkil chi us ut kixk'e re li aajel ru re tixtiqib' rib' chi chaab'il. Kixk'e ajwi' wuqub'eb' chi tuq'ixq cho'q aj ilol re ut kixkanab'eb' sa' jun li na'ajej jwal chaab'il li wank sa' rochoch li awab'ej.

¹⁰ Lix Ester ink'a' kixye xk'ab'a' li xtenamit chi moko li xpoyanamil, xb'aan naq a'an kichaq'rab'iik wi' xb'aan laj Mardokeo.

¹¹ Rajlal kutan nanume'k laj Mardokeo chiru xneb'aalil rochocheb' li ixq, re xnawb'al ma sa sa' xch'ool lix Ester ut chanru wank.

¹² Chiru junq chihab' eb' li tuq'ixq neke'xyiib' rib' jo' chanru yeeb'il sa' xchaq'rab'il eb' li ixq: waqib' po neke'xyul rib' rik'in aseeyt ut miir, ut waqib' po neke'xb'on ut neke'xb'an rib' rik'in li sununkil b'an xkomon li neke'roksiheb' li ixq. Naq naraqe'k xb'aanunkil a'an, eb' li tuq'ixq neke'k'ame'k rik'in li awab'ej.

¹³ Naq junaq tuq'ixq nab'oqe'k sa' rochoch li awab'ej, nak'ehe'k re chixk'am li jo'k'ihal tixpatz' sa' rochocheb' li ixq.

¹⁴ Chiru q'oqyink nawulak sa' rochoch li awab'ej, ut eq'la re li kutan jun chik naq'axonk sa' jalan chik ochoch li na'ilmank xb'aan laj Sahaskás, li k'ojk'o wi' xch'ool laj Asuero ut aj ilol reheb' li ixq; chirix chik a'an ink'a' chik toxk'ut rib' chiru li awab'ej wi ink'a' taab'oqe'q malaj taarahiiq ru xb'aan li awab'ej.

¹⁵ Naq lix Ester, xrab'in laj Abijahil, rikan laj Mardokeo, kiwulak xkutankil naq kixk'ut rib' chiru li awab'ej, ka'ajwi' kixk'am li jo'k'ihal kiyehe'k re xb'aan laj Hegay, li k'ojk'o wi' xch'ool li awab'ej ut aj ilol reheb' li ixq. Chixjunileb' li neke'ilok re lix Ester, k'ajo' naq neke'saho'k xch'ool rik'in.

¹⁶ Kik'ame'k lix Ester wan wi' laj Asuero li awab'ej, chiru li xlaje po, Tébet nayeemank re, ak wuqub' chihab' chik rokik chi awab'ejink.

¹⁷ Laj Asuero koho xch'ool chirix lix Ester jo' maajun wa kixk'ul xb'aan junaq chik ixq. Jo'kan naq k'ajo' naq kirusila ru ut q'axal kixra chiru chixjunileb' li ixq ak xnawom ruheb'. Kixk'e li koroon chi xjolom ut kixxaqab' cho'q reeqaj lix Vasti.

¹⁸ Tikto kixk'uub' jun nimla ninq'e sa' xk'ab'a' lix Ester ut kixb'oqeb' chixjunileb' li xjolomileb' li tenamit jo'wi' eb' laj tenq'ahom re. Kixk'eheb' xhilaal kutan chixjunileb' li poyanam ut kijek'ink maatan reheb' chixjunil jo' xk'ulub' xb'aanunkil junaq awab'ej.

Ke'raj xkamsinkil li awab'ej

¹⁹ Naq ke'ch'utub'aak wi' chik xka' sut eb' li tuq'ixq, chunchu laj Mardokeo aran chire rokeb'aal li rochoch li awab'ej.

²⁰ Lix Ester ink'a' xyehom li xpoyanamil chi moko li xtenamit jo' yeeb'il xb'aan laj Mardokeo, xb'aan naq lix Ester toj naxpaab' chixjunil li naxye laj Mardokeo kama' naq xwank chaq sa' rochoch.

²¹ Naq chunchu laj Mardokeo chire rokeb'aal li rochoch li awab'ej chiruheb' li kutan a'an, kixk'e reetal naq laj Biktán ut laj Teres, aj k'aak'aleneleb' re li okeb'aal ut aj tenq'ahom re li awab'ej, k'ajo'eb' xjosq'il ut yookeb' xk'uub'ankil chanru naq te'xkamsi laj Asuero.

²² Naq kirab'i a'in laj Mardokeo, kixye re lix Ester ut a'in koxye re li awab'ej sa' xk'ab'a' laj Mardokeo.

²³ Li aatin a'in kitz'ilmank rix chi us ut koxtawmanq naq yaal li kiyeemank. Jo'kan naq eb' li wiib' aj k'anjel a'n ke't'uyub'aak chiru che' re xkamsinkileb'. Ut chixjunil a'in kitz'iib'aak chiru ajwi' li awab'ej sa' xhuhil xyehom ut xb'aanuhom eb' li awab'ej re Persia.