Esdras 9 - Q'eqchi Bible

Li xmaakeb' li tenamit ut li xtij laj Esdras

¹ Chirix chik a'an ke'k'ulunk wik'in eb' laj k'amol b'e ut ke'xye we: “Eb' laj Israel, eb' laj tij ut eb' laj Leví ink'a' xe'xjek' rib' rik'in li jalaneb' xtenamit, a'eb' laj Kanahán, eb' laj Hit, eb' laj Perés, eb' laj Jebús, eb' laj Amón, eb' laj Ejiipt ut eb' laj Amor, ut a' ajwi' li xmaa'usilaleb' li tenamit a'an xe'xb'aanu.

² Xe'sumlaak rik'ineb' li xrab'in li tenamit a'an, ut jo'kan ajwi' xe'xb'aanu eb' li ralal. Li xtenamit li Yos xe'xmux rib' rik'ineb' li jalaneb' xtenamit. Ut eb' laj k'amol b'e jo'wi' eb' laj jolominel, a'aneb' xb'een chi q'etok aatin”, chankeb'.

³ Naq kiwab'i a'in, kinq'ich li waq' ut linb'aatal, kinmich' rismal linjolom ut linmach, ut kink'ojlaak chi q'axal ra sa' inch'ool.

⁴ Chixjunileb' li neke'roxloq'i li raatin li xYos laj Israel ke'xch'utub' rib' wik'in naq ke'rab'i resil li xmaakeb' li ke'chalk chaq Babilonia. Ab'an laa'in k'ajo' xrahil linch'ool: kinkanaak chi k'ojk'o toj sa' xhonalil li ewuukil mayej.

⁵ Sa' li honal a'an kik'ulunk wi' chik linch'ool, ut chi q'ichilkeb' li waq' ut linb'aatal kinwiq'ib' wib', kintaqsiheb' li wuq' chi elajink chiru li Qaawa' linYos

⁶ ut kinye: “At inYos, sachso linch'ool ut q'axal ninxutaanak chi xtaqsinkil li wilob'aal chawu, at inYos. Xikenaq xb'een li qamaa'usilal ut jwal naab'al li qamaak: xwulak toj sa' choxa.

⁷ Chalen chaq sa' xkutankileb' li qana' qayuwa' toj anaqwan wanko sa' maak. Xb'aan li qamaa'usilal laa'o ut xmaakeb' li awab'ej ut eb' laj tij xooq'axtesiik sa' ruq'eb' li awab'ej li jalanq xtenamiteb'. Xootiq'e'k, xook'ehe'k sa' tz'alam, xoohob'e'k ut xe'relq'a li k'aru wank qe, ut toj yo a'in anaqwan.

⁸ Ab'an anaqwan, at Qaawa', at qaYos, xawil xtoq'ob'aal qu chiru li jun k'amok a'in ut xak'e qe naq toj wanq jun rela' laatenamit chi ach'ab'anb'il, a'ano laa'o li toj wanko. Xasi qe naq tqak'ojob' qamuheb'aal sa' santil ch'och'. Jo'ka'in naq xakutanob'resi li qab'e ut xak'e b'ayaq xkawub' qach'ool naq xoowank chi munil.

⁹ Us ta xoowank chaq chi munil, ab'an li qaYos ink'a' xooxkanab' qajunes, xril b'an xtoq'ob'aal qu ut xoorusila chiruheb' li awab'ej re Persia; xk'e xkawub' qach'ool re xkab'lankil wi' chik li rochoch li qaYos ut xyiib'ankil chi us li k'aru xkanaak chi po'lemil. Wanko wi' chik rub'el xkupuhom arin Judá ut Jerusalén.

¹⁰ “Ab'an anaqwan, at qaYos, k'aru truuq tqaye chirix chixjunil a'in? Xqatz'eqtaana laachaq'rab'

¹¹ aak'ehom chaq qe chi xtz'uumal reheb' laapropeet aj k'anjeleb' chawu naq xaye chi kama'in: «Li ch'och' li toxeereechani, a'an muxb'il ch'och', nujenaq chi xmaa'usilaleb' li tenamit wankeb' aran, xb'aan li tz'i'b'eetalil xe'xb'aanu yalaq b'ar.

¹² Jo'kan utan, meek'e leerab'in reheb' li ralaleb', chi moko teesumub' leeralal rik'ineb' li xrab'ineb' a'an. Maajun wa teesik' tuqtuukilal ut sahilal cho'q reheb' li poyanam a'an, re naq kawaq eerib' laa'ex, teetzeka linchaab'il eechej na'elk sa' li ch'och' ut teekanab' leeralal eek'ajol chi reechaninkil li na'ajej chi junelik».

¹³ “Chirix naq xqak'ul chixjunil a'in xb'aan li qamaak ut li qamaa'usilal (us ta laa'at, at qaYos, ink'a' xoohaak'e chi xtojb'al rix li qamaak jo' qak'ulub' raj xk'ulb'al, xoohaak'e b'an chi wank chi ach'ab'anb'il),

¹⁴ ma truuq tab'i' too'ok wi' chik chi xq'etb'al laachaq'rab' ut xlaq'ab'ankil qib' rik'ineb' li poyanam a'in li neke'xb'aanu li maa'usilal? Ma ink'a' raj tchalq laajosq'il sa' qab'een ut toohaasach chi maajun junaq taakole'q?

¹⁵ “At Qaawa', xYos laj Israel, laa'at tiik aach'ool. Jo'kan naq toj yo'yooko anaqwan jarub'o li xookole'k. Wanko rub'el laawoq rub'el laawuq' laa'o aj maak, us ta maajun xnimal aj maak naxkuy wank chawu”.