Esdras 7 - Q'eqchi Bible

II. LI XK'ANJEL LAJ ESDRAS SA' XYANQEB' LAJ ISRAEL (7-10) Laj Esdras ut eb' li rochb'een ke'wulak Jerusalén

¹ Moqon chik, naq wank laj Artajerjes cho'q awab'ej re Persia, ki'elk Babilonia jun li winq, aj Esdras xk'ab'a', ralal laj Seraías, ralal laj Asarías, ralal laj Jilkías,

² ralal laj Salún, ralal laj Sadok, ralal laj Ajitub,

³ ralal laj Amarías, ralal laj Asarías, ralal laj Merayot,

⁴ ralal laj Serajías, ralal laj Usí, ralal laj Bukí,

⁵ ralal laj Abisúa, ralal laj Pinjás, ralal laj Elehasar, ralal laj Aharón li xyuwa'il aj tij.

⁶ Laj Esdras a'an jun li winq tzolb'il chi us sa' li Chaq'rab' li kik'ehe'k re laj Moisés xb'aan li Qaawa', xYos laj Israel. Li ruq' li Qaawa' li xYos wank sa' xb'een; jo'kan naq chixjunil li k'aru naxpatz', nak'ehe'k re xb'aan li awab'ej. Laj Esdras ki'elk Babilonia ut koho Jerusalén.

⁷ Ut naab'aleb' laj Israel koheb' Jerusalén rochb'een, sa' li xwuq chihab' rokik chi awab'ejil laj Artajerjes. Wankeb' aj tij, aj Leví, aj b'ichanel, aj k'aak'alenel okeb'aal ut aj k'anjel sa' rochoch li Yos.

⁸ Laj Esdras kiwulak Jerusalén sa' li ro' po, sa' li xwuq chihab' rokik chi awab'ejil laj Artajerjes.

⁹ Kixxaqab' xkutankil li relik aran Babilonia sa' li xb'een kutan re li xb'een po, ut kiwulak Jerusalén sa' li xb'een kutan re li ro' po. Relik chi yaal naq li ruq' li Yos wank sa' xb'een.

¹⁰ Xb'aan naq laj Esdras kixk'e xch'ool chi xtzolb'al li xChaq'rab' li Qaawa', chi xk'anjelankil ut chi xk'utb'al chixjunil li raatin ut li xtaqlahom chiruheb' laj Israel.

¹¹ A'an a'in li tz'iib'anb'il sa' li hu kixq'axtesi li awab'ej Artajerjes re laj Esdras, aj tij ut aj tz'iib' tzolb'il chi us sa' chixjunileb' li xchaq'rab' ut raatin li Qaawa' cho'q re laj Israel:

¹² “Laj Artajerjes, xnimal ru awab'ej, naxtaqla naab'al xsahil xch'ool laj Esdras, aj tij ut aj k'utul re li xChaq'rab' li xYos li choxa.

¹³ “A'an a'in linchaq'rab': jo'k'ihaleb' laj Israel li wankeb' rub'el linwankil, chixjunileb' laj tij ut laj Leví li te'raj sutq'iik Jerusalén, naru te'xik chawix, a Esdras,

¹⁴ xb'aan naq li awab'ej ut eb' li wuqub' aj k'ehol xna'leb' nakate'xtaqla chi rilb'al chanru wankeb' aran Judá ut Jerusalén, ma yookeb' xpaab'ankil li xChaq'rab' laaYos, li wank sa' laawuq' malaj ut ink'a'.

¹⁵ Chak'am chawix li plaat ut oor li neke'xyeechi'i chi anchaleb' xch'ool li awab'ej ut eb' laj k'ehol xna'leb', cho'q re li xYos laj Israel li wank xmuheb'aal aran Jerusalén.

¹⁶ Chak'am ajwi' chawix chixjunil li plaat ut oor li xach'utub' sa' xteepal Babilonia, jo'wi' chixjunil li x'alaak sa' xch'ooleb' li tenamit ut eb' laj tij xyeechi'inkil cho'q re li rochoch li Yos aran Jerusalén.

¹⁷ Chiru li tumin a'an taaloq' li saaj wakax, li chib'aat, li karneer, rochb'een li ru awimq ut li b'iin li na'ajmank ru re xyeechi'inkil chixjunil sa' xb'een x'artalil li rochoch leeYos aran Jerusalén.

¹⁸ Li plaat ut oor li taa'ela'anq, oksi jo' chanru naxk'ul aawu laa'at ut eb' laawas aawiitz'in. Teeb'aanu jo' naraj li Qaawa' leeYos.

¹⁹ Ab'anan eb' li k'anjelob'aal li taak'eemanq aawe cho'q re li rochoch laaYos, q'axtesi re li Yos laa'at aran Jerusalén.

²⁰ “Li k'aru chik toj taa'ajmanq cho'q re li rochoch laaYos, naru xloq'b'al rik'in lintumin.

²¹ Laa'in, li awab'ej Artajerjes, nink'e li chaq'rab' a'in reheb' chixjunileb' laj k'uulanel tumin li wankeb' junpak'al li nima' Éwfrates: Jo'ch'inal jo'nimal tixpatz' eere laj Esdras, aj tij ut aj k'utul re li xChaq'rab' li xYos li choxa, teek'e re chi junpaat,

²² us ta kab'laju xkaak'aal kintal chi plaat, o'k'aal iiq chi triiw, o'k'aal b'iis chi b'iin ut o'k'aal b'iis chi aseeyt. Li atz'am taak'eemanq chi ink'a' b'isb'ilaq.

²³ “Chixjunil li taaraj li xYos li choxa tento xk'eeb'al chi tz'aqal re ru cho'q re li Loq'laj Ochoch, re naq ink'a' taachalq xjosq'il li xYos li choxa sa' xb'een li awab'ej, chi moko sa' xb'eeneb' li ralal xk'ajol ut li x'awab'ejihom.

²⁴ Naqak'e ajwi' chenaw naq ink'a' naru teepatz' toj, kub'siil chi moko xtojb'al li xnumikeb' laj tij, laj Leví, laj b'ichanel, laj k'aak'alenel okeb'aal, laj k'anjel sa' rochoch li Yos chi moko reheb' li neke'k'anjelak aran. Ink'a' teepatz' reheb'.

²⁵ “Ut laa'at, Esdras, jo' chanru li choxahil na'leb' k'eeb'il aawe xb'aan laaYos, chaxaqab'eb' aj raqol aatin ut aj tz'iib' li te'taqlanq sa' xb'eeneb' chixjunileb' li tenamit li wankeb' junpak'al li nima' Éwfrates, ut sa' xb'eeneb' chixjunileb' li neke'nawok re li xChaq'rab' laaYos. Ut eb' li ink'a' neke'xnaw li Chaq'rab', taak'ut chiruheb'.

²⁶ Jo'kan ajwi' yalaq ani ink'a' tixpaab' li xChaq'rab' laaYos ut li xtaqlahom li awab'ej, chiraqmanq aatin sa' xb'een chi junpaat: tento tixtoj rix li xmaak rik'in kamk, tumin, tz'alam malaj isiik sa' li tenamit wan wi'”.

Li xtij laj Esdras

²⁷ Toja' naq laj Esdras kitijok chi kama'in: “Usilaatinanb'il taxaq li Qaawa', xYos eb' li qana' qayuwa', li xtoch'ok xch'ool li awab'ej re naq tixk'e xloq'al li rochoch li Qaawa' aran Jerusalén.

²⁸ Rik'in xnimal ruxtaan xinrusila chiru li awab'ej, chiruheb' laj k'ehol xna'leb' ut eb' li ninqeb' xwankil, ut kixk'e xkawub' inch'ool, xb'aan naq rik'in xtenq'aal li Qaawa' linYos xinch'utub'eb' laj k'amol xb'eheb' laj Israel re naq te'xik Jerusalén wochb'een”.