Esdras 6 - Q'eqchi Bible

¹ Toja' naq li awab'ej Darío kixtaqla xsik'b'al sa'eb' li tasb'il hu k'uulanb'ileb' Babilonia;

² ut aran Ekbátana, sa' li kawub'resinb'il ochoch, sa' xteepal Media, kitawmank jun li hu naxye chi kama'in:

³ “Sa' li xb'een chihab' rokik cho'q awab'ej laj Siro kixk'e li chaq'rab' a'in chirix li rochoch li Yos re Jerusalén: «Chikab'lamanq li rochoch li Yos ut chik'eemanq li rub'elankil, re naq twanq mayejak aran. Waqlaju moqoj li xteram te'xk'e ut waqlaju moqoj li ru.

⁴ Twanq oxib' tzol li ninqi pek ut jun tzol li che'. Ut li awab'ej, a'an li taatojoq re chixjunil li taasachmanq.

⁵ Eb' li k'anjelob'aal yiib'anb'ileb' rik'in plaat ut oor re li rochoch li Yos, li kirisi laj Nabukodonosor aran Jerusalén ut kixk'am Babilonia, tento te'q'ajsimanq re naq wanq chixjunil sa' xna'aj Jerusalén ut taak'eemanq wi' chik sa' rochoch li Yos»”.

⁶ Toja' naq li awab'ej Darío kixsumeheb' laj Tatenay, li nataqlank sa' xb'eeneb' li tenamit wankeb' junpak'al li nima' Éwfrates, laj Setar-Bosnay ut eb' li rochb'een li ninqeb' xwankil aran; kixye reheb' chi jo'ka'in: “Elenqex aran Jerusalén

⁷ ut kanab'omaq li xjolomileb' laj Judá ut eb' laj k'amol xb'eheb' chi k'anjelak re naq te'xkab'la wi' chik li rochoch li Yos sa' li xna'aj.

⁸ A'an a'in linchaq'rab' chirix xtenq'ankileb' laj k'amol xb'eheb' laj Judiiy chi xkab'lankil wi' chik li rochoch li Yos: Rik'in li toj li nak'eemank chaq junpak'al li nima' Éwfrates cho'q re li awab'ej, taatojmanq jo'nimal taasachmanq ut taak'ehe'q li tumin a'in reheb' li winq a'an chi tz'aqal re ru, re naq ink'a' taaxaqliiq li k'anjel.

⁹ Rajlal kutan ut chi tz'aqal re ru chiq'axtesimanq reheb' laj tij li wankeb' Jerusalén jo'ch'inal jo'nimal te'raj, jo' li saaj wakax, li chib'aat malaj li karneer cho'q re li k'atb'il mayej chiru li xYos li choxa, jo' ajwi' li triiw, li atz'am, li b'iin ut li aseeyt, a' yaal chanru te'xye,

¹⁰ re naq te'yeechi'inq sununkil mayej chiru li xYos li choxa ut te'tijoq chirix xyu'am li awab'ej ut eb' li ralal xk'ajol.

¹¹ “Wi wanq junaq taaq'etoq re li chaq'rab' a'in, chi'isiiq junaq xtz'amb'ahil li rochoch ut chiru ajwi' li che' a'an chikamsiiq li winq. Ut li ochoch taakanaaq chi po'lemil.

¹² Li Qaawa' Yos li kisik'ok re Jerusalén cho'q xmuheb'aal li xk'ab'a', chisachoq taxaq ruheb' chixjunileb' li awab'ej malaj ut li tenamit te'raj xq'etb'al li chaq'rab' a'in ut te'raj xjuk'b'al li rochoch li Yos aran Jerusalén. Laa'in laj Darío xink'e li chaq'rab' a'in. Chi'uxmanq chi tz'aqal re ru jo' xinye”.

Ke'raqe'k xkab'lankil rochoch li Yos ut ke'xq'axtesi sa' ruq' li Qaawa'

¹³ Toja' naq laj Tatenay, li nataqlank sa' xb'eeneb' li tenamit wankeb' junpak'al li nima' Éwfrates, laj Setar-Bosnay ut eb' li rochb'eeneb' ke'xb'aanu tz'aqal jo' kixye li awab'ej Darío.

¹⁴ Jo'kan naq eb' laj k'amol xb'eheb' laj Judiiy ke'ok wi' chik chi kab'lak ut us ki'elk li xk'anjeleb', jo' chanru xyehom li propeet Hageo ut laj Sakarías, ralal laj Idó. Ut ke'xchoy li kab'lak jo' chanru kixtaqla li xYos laj Israel jo' ajwi' laj Siro ut laj Darío.

¹⁵ Li ochoch a'in kichoymank sa' li oxib' xka'k'aal xb'e li po re Adar, sa' li xwaq chihab' rokik laj Darío cho'q awab'ej.

¹⁶ Eb' laj Israel, eb' laj tij, eb' laj Leví ut li junch'ol chik li ke'sutq'iik wi' chik Jerusalén ke'xninq'ehi chi saheb' sa' xch'ool li xq'axtesinkil sa' ruq' li Yos li loq'laj ochoch a'in.

¹⁷ Sa' li kutan a'an ke'xmayeja o'k'aal (100) chi teelom wakax, lajeek'aal (200) chi chib'aat, jun o'q'ob' (400) chi karneer, jo'wi' kab'laju teelom chib'aat cho'q loq'laj mayej chirix xmaakeb' chixjunileb' laj Israel, jo' chanru xk'ihal li xteepaleb'.

¹⁸ Chirix chik a'an ke'xxaqab' xkutankil li junjunq chi aj tij, re taa'ok chi k'anjelak. Jo'kan ajwi' eb' laj Leví, ak xk'anjel xk'anjel li junjunq, re te'k'anjelaq sa' rochoch li Yos aran Jerusalén, jo' tz'iib'anb'il sa' xHu laj Moisés.

¹⁹ Li ke'sutq'iik wi' chik Jerusalén ke'xninq'ehi li Paswa sa' li kaalaju xb'e li xb'een po.

²⁰ Ak kawresinb'ileb' chi us laj tij jo'wi' eb' laj Leví sa' junajil, jo'kan naq ch'ajob'resinb'ileb' chixjunileb'. Toja' naq ke'xmayeja li Paswa sa' xk'ab'a' chixjunileb' li ke'sutq'iik wi' chik Jerusalén, sa' xk'ab'a'eb' laj tij ut sa' xk'ab'a'eb' ajwi' eb' a'an.

²¹ Chixjunileb' laj Israel li ke'sutq'iik wi' chik Jerusalén ke'xtzeka li karneer re li Paswa, rochb'eeneb' jo'k'ihaleb' li ke'xkanab' xb'aanunkil li xmaa'usilaleb' li tenamit maak'a'eb' xpaab'aal re xloq'oninkil ru li Qaawa', xYos laj Israel.

²² Chiru wuqub' kutan ke'xninq'ehi li xKutankil li wa ink'a' yuub'il, chi sa sa' xch'ooleb', xb'aan naq li Qaawa' kixnujob'resiheb' rik'in sahil ch'oolej naq kixjal xk'a'uxl li awab'ej re Asiria re xtenq'ankileb' chi xyiib'ankil wi' chik li rochoch li Qaawa', li xYos laj Israel.