Esdras 5 - Q'eqchi Bible

Ke'ok wi' chik chi xwaklesinkil li rochoch li Yos

¹ Eb' li propeet Hageo ut Sakarías, ralal laj Idó, ke'xtikib' xyeeb'al reheb' laj Judiiy aj Judá ut aj Jerusalén li k'aru yeeb'il reheb' xb'aan li xYos laj Israel aj k'aak'alehom reheb'.

² Toja' naq laj Sorobabel, ralal laj Sehaltiel, ut laj Josué, ralal laj Josadak, ke'xkawu xch'ooleb' chi k'anjelak re xwaklesinkil li rochoch li Yos aran Jerusalén; ut eb' li xpropeet li Yos wankeb' rik'ineb', yookeb' chi xtenq'ankileb'.

³ Sa'eb' li kutan a'an laj Tatenay, li nataqlank sa' xb'eeneb' li tenamit wankeb' junpak'al li nima' Éwfrates, laj Setar-Bosnay ut eb' li rochb'een ke'chalk rik'ineb' ut ke'xpatz' reheb': “Ani xyehok eere naq teekab'la li ochoch a'in ut teewaklesi eb' li tz'ak a'in?

⁴ Ani xk'ab'a'eb' li winq li yookeb' chi yiib'ank re?”, chankeb'.

⁵ Ab'anan li Yos yo chi ilok reheb' laj k'amol xb'eheb' laj Judiiy, ut ink'a' kixaqliik li xk'anjeleb' re royb'eninkil naq taataqlaaq resil chixjunil a'an rik'in laj Darío ut taachalq xsumenkil li hu.

⁶ A'an a'in li tz'iib'anb'il sa' li hu kitaqlaak rik'in li awab'ej Darío xb'aan laj Tatenay, li nataqlank sa' xb'eeneb' li tenamit wankeb' junpak'al li nima' Éwfrates, jo' ajwi' xb'aan laj Setar-Bosnay ut eb' li rochb'een, a'eb' laj jolominel li wankeb' sa'eb' li tenamit junpak'al li nima' Éwfrates.

⁷ Jo'ka'in ke'xye sa' li hu: “At awab'ej Darío, naqataqla naab'al xsahil aach'ool.

⁸ Tqaj xyeeb'al aawe, at awab'ej, naq laa'o xoowulak Judá, chi rilb'al li rochoch li Nimajwal Yos. Ut xqak'e reetal naq yookeb' chi xkab'lankil rik'in ninqi pek, neke'xtz'alamche'i ru li xtz'akil, ut li k'anjel yo chi yaalo'k sa' junpaat ut us yo chi elk chiruheb'.

⁹ Xqapatz' reheb' laj k'amol xb'eheb' laj Judiiy ani xyehok reheb' naq te'xkab'la li ochoch a'an ut te'xwaklesi li tz'ak.

¹⁰ Xqapatz' ajwi' reheb' li xk'ab'a'eb' re xyeeb'al aawe ut xq'axtesinkil chi tz'iib'anb'il li xk'ab'a'eb' li yookeb' chi jolomink reheb'.

¹¹ “A'an a'in li xoohe'xsume wi': «Laa'o aj k'anjelo chiru li xYos li choxa. Yooko chi xkab'lankil wi' chik li loq'laj ochoch li kiyiib'aak junxil xb'aan jun xnimal ru awab'ej re Israel.

¹² Ab'anan eb' li qana' qayuwa' ke'xchiq' xjosq'il li xYos li choxa; jo'kan naq ke'q'axtesiik sa' ruq' laj Nabukodonosor aj Kaldeha, awab'ej re Babilonia, li kijuk'uk re li ochoch a'in ut kixk'ameb' li tenamit aran Babilonia.

¹³ Moqon chik laj Siro, sa' li xb'een chihab' rokik cho'q awab'ej re Babilonia, kixtaqla xkab'lankil wi' chik li rochoch li Yos a'in.

¹⁴ Kixtaqla ajwi' risinkil sa' xna'ajeb' li xyoseb' laj Babilonia chixjunileb' li k'anjelob'aal yiib'anb'ileb' rik'in plaat ut oor li ke'maq'e'k xb'aan laj Nabukodonosor sa' rochoch li Yos arin Jerusalén ut ke'k'ame'k toj Babilonia. Chirix chik a'an ke'q'axtesiik re jun li winq, aj Sesbasar xk'ab'a', li kixaqab'aak cho'q aj jolominel.

¹⁵ Laj Siro kixtaqla ajwi' laj Sesbasar chi xxokb'aleb' li k'anjelob'aal a'an re naq tixq'ajsiheb' re li rochoch li Yos arin Jerusalén; ut kixchaq'rab'i ajwi' naq chikab'lamanq wi' chik li rochoch li Qaawa' sa' ajwi' li na'ajej kiwank wi' junxil.

¹⁶ Jo'kan naq kik'ulunk laj Sesbasar ut kixk'e li rub'elankil li rochoch li Yos arin Jerusalén. Ut chalen toj anaqwan yo xkab'lankil, ab'an maji' nayaalo'k».

¹⁷ “Jo'kan utan, wi naxk'ul aawu, at awab'ej, naqatz'aama chawu naq chataqla xtz'ilinkil rix a'in sa'eb' li tasb'il hu reheb' li awab'ej re Babilonia, ma yaal naq li awab'ej Siro kixtaqla xkab'lankil wi' chik li rochoch li Yos arin Jerusalén malaj ut ink'a'. Ut chakuy qamaak, chataqla chaq resil li k'aru xak'uub' xb'aanunkil chirix li na'leb' a'in”.