Efesios 2 - Q'eqchi Bible

Li qakolb'al xb'aan li Kriist a'an qamaatan

¹ Junxil laa'ex kamenaqex chaq sa' leemaa'usilal ut sa' leemaak.

² Xexwanje'k chaq jo' chanru xna'leb' li ruuchich'och' a'in ut xetaaqe laj taqlanel li wank xwankil sa' li iq', a' li musiq'ej li yo chi k'anjelak rik'ineb' laj q'etol aatin.

³ Sa' xyanqeb' a'an xoowank ajwi' chiqajunilo junxil: nawulak chiqu li naxrahi li qatz'ejwal, naqab'aanu li naraj li tz'ejwalej ut li ink'a' usil na'leb'; jo'kan naq xoowank chaq rub'el xjosq'il li Yos kama'eb' li junch'ol.

⁴ A'ut li Yos q'axal nim li ruxtaan. Xooxra chaq rik'in xnimal xrahom

⁵ ut xk'e qayu'am qochb'een li Kriist naq toj kamenaqo chaq xb'aan li qamaak. A'an jun eemaatan naq kolb'ilex.

⁶ Li Yos xoxwaklesi chi yo'yo qochb'een li Kriist ut xooxk'e chi k'ojlaak sa' li choxa sa' xk'ab'a' li Kristo Jesus,

⁷ re xk'utb'al xnimal li rusilal sa'eb' li kutan chaalel: naq numtajenaq nim li qaraab'al rik'in li Kristo Jesus!

⁸ Chek'e reetal, kolb'ilex xb'aan li rusilal li Yos, sa' xk'ab'a' li paab'aal; ut a'in moko eena'leb' ta laa'ex, yal eemaatan xb'aan li Yos.

⁹ Moko xb'aan ta leeb'aanuhom naq kolb'ilex, re naq maa'ani tixnimob'resi rib'.

¹⁰ Relik chi yaal naq laa'o xb'aanuhomo li Yos, yoob'tesinb'ilo sa' xk'ab'a' li Kristo Jesus, re naq tqab'aanu li chaab'il k'anjel teneb'anb'il sa' qab'een, jo' chanru kixk'uub' li Yos chi junxilaj.

Maak'a' chik xik'il uuchink sa' xyanqeb' laj Judiiy ut eb' li junch'ol chik

¹¹ Jo'kan utan, chijultiko'q eere chanru naq xexwank chaq junxil. Laa'ex maawa'ex aj Judiiy. “Ink'a' xk'ulumeb' li sirkunsisyon”, chu'uxkex xb'aaneb' li neke'xk'ab'a'in “aj sirkunsisyon”, yal sa' xk'ab'a' li eetalil uxb'il chaq sa' li xtz'ejwaleb'.

¹² Chijultiko'q eere naq junxil wankex chaq chi maak'a' li Kriist eerik'in, maawa'ex chaq xkomoneb' laj Israel, ab'lex b'an chiru li xyeechi'om li Yos ut chiru li Sumwank, maak'a' eeroyb'enihom ut maak'a' leeYos sa' li ruuchich'och' a'in.

¹³ A'ut anaqwan sa' xk'ab'a' li Kristo Jesus laa'ex li najt wankex chaq junxil, nach' chik wankex sa' xk'ab'a' xkik'el li Kriist.

¹⁴ Xb'aan naq li Kriist a'an li qatuqtuukilal: A'an kijunajink re li wiib' chi tenamit ut kixjuk' li tz'ak najachok reheb', a' li xik'il uuchink.

¹⁵ Li Kriist kixsach xwankil li Najter Chaq'rab' rik'in chixjunileb' li xtaqlahom ut xyehom, ut rik'in li wiib' chi tenamit kixk'uub' ru sa' li xjunxaqalil jun Ak' Winqilal. Chi jo'kan kiroksi li tuqtuukilal.

¹⁶ Kixjuk' xwankil li xik'il uuchink sa' xk'ab'a' li xkamik chiru krus ut kixk'ameb' wi' chik sa' usilal rik'in li Yos eb' laj Judiiy ut eb' li junch'ol, re naq junajaqeb' aj chik chi tenamit te'kanaaq chi xkab'ichaleb'.

¹⁷ Kichalk chi xyeeb'al resil li tuqtuukil usilal eerik'in laa'ex li najt wankex chaq jo' ajwi' rik'ineb' li nach' wankeb'.

¹⁸ Xb'aan naq sa' xk'ab'a' li Kriist laa'o li wiib' chi tenamit wank li qokeb'aal rik'in li Yuwa'b'ej, sa' junaj chi Musiq'ej.

¹⁹ Jo'kan utan, moko ab'lex ta chik chi moko yal aj numelex ta, laa'ex b'an chik rech tenamitilex eb' laj santil paab'anel, wankex anaqwan sa' rochoch li Yos,

²⁰ kab'lanb'ilex sa' xb'een rub'elahomeb' li apóstol ut eb' li propeet, ut li Kriist a'an li xnimal ru pek sa' li kab'l.

²¹ Rik'in li Kriist chixjunil li kab'l, xchapom rib' chi kaw, nataqe'k xteram, re naq a'anaq santil ochoch q'axtesinb'il re li Qaawa'.

²² Rik'in A'an laa'ex ajwi' kab'lanb'ilex re naq laa'exaq xmuheb'aal li Yos sa' li Musiq'ej.