Eclesiastés 7 - Q'eqchi Bible

Qasik' xb'enwa li q'axal aajel ru

¹ Q'axal us naq chaab'il te'aatinaq chawix chiru naq taab'on aawib' sa' k'iila sununkil b'an. Jwal us li xkutankil li kamk chiru li xkutankil li yo'laak.

² Q'axal us xik sa' rochochil li kamenaq chiru li xik sa' rochoch li ninq'e. Xb'aan naq li kamk, a'an li nokooraqe'k wi' chiqajunilo, ut us raj naq a'in wanq sa' xch'ooleb' li yo'yookeb'.

³ Q'axal us li yaab'ak chiru li se'ek, xb'aan naq li rahil ch'oolej nokooxtenq'a chi xtawb'al qana'leb'.

⁴ Sa' rochochil li rahil ch'oolej, aran natawmank li winq wank xna'leb'; ut sa' li na'ajej yo wi' li ninq'e, aran wank li maak'a' xna'leb'.

⁵ Jwal us naq tooq'use'q xb'aaneb' li wankeb' xna'leb' chiru naq taak'ehe'q qaloq'al xb'aaneb' li jip.

⁶ Li xsahil xch'ooleb' li maak'a'eb' xna'leb', a'an kama' naq napaq'lok chi k'atk li k'ix sa' xam. Ut a'in ajwi' maak'a' rajb'al.

⁷ Li wank xna'leb' namemob'resiik xch'ool naq nanumtaak sa' xb'eeneb' li ras riitz'in. Ut wi naxk'e rib' chi tuminaak ru, timil timil taapo'q li xna'leb'.

⁸ Q'axal us xchoyb'al junaq k'anjel chiru li yal xtikib'ankil. Ut q'axal us li kuyuk chiru li nimob'resink ib'.

⁹ Matjosq'o'k sa' junpaat, xb'aan naq li josq'il wank sa' xch'ooleb' li jipeb'.

¹⁰ Maaye: “K'a' naq q'axal useb' li kutan ak xe'nume'k, chiruheb' li kutan anaqwan?”. Maaye a'an, xb'aan naq ka'ajwi' li maak'a' xna'leb' napatz'ok chirix a'an.

¹¹ Li chaab'il na'leb', a'an us cho'q reheb' li wankeb' sa' ruuchich'och'. Ab'an q'axal wi' chik us naq wank qana'leb' ut b'ihomo ajwi'.

¹² Li chaab'il na'leb' natenq'ank qe; jo'kan ajwi' li tumin. Ab'anan najtaq roq li qayu'am wi wank qachoxahil na'leb'.

¹³ K'e reetal li xb'aanuhom li Yos: maa'ani taatiikob'resinq re li k'aru xk'onob' rix A'an.

¹⁴ Chisaho'q sa' laach'ool sa' xq'ehil li sahilal. Ab'an wi taachalq li rahilal sa' aab'een, chak'oxla naq chixjunil nachalk rik'in li Yos, ut maa'ani naxnaw li k'aru chalk re sa' xb'een.

¹⁵ Yal numelin arin sa' ruuchich'och', ut xink'e reetal chixjunil a'in: wankeb' chaab'ileb' xch'ool li neke'kamk, us ta chaab'il li xna'leb'eb'; ut wankeb' li ink'a' useb' xch'ool najt neke'wank sa' ruuchich'och', us ta k'ajo' xmaa'usilaleb'.

¹⁶ Mixik xb'een li xtiikilal laach'ool, chi moko chinumtaaq laachaab'il na'leb'. K'a' aj e naq taakamsi aawib' aajunes?

¹⁷ Mixik xb'een laamaa'usilal, chi moko chinumtaaq li memil sa' aab'een. K'a' naq tatkamq chi maji'aq xq'ehil?

¹⁸ Wanqat sa' xyi li b'e. Chawoxloq'i li Yos; chi jo'kan us tat-elq sa' chixjunil laak'anjel.

¹⁹ Li chaab'il na'leb' q'axal chik naxk'e xkawilal li ani wank xna'leb' chiru lajeeb' chi winq li wankeb' xwankil sa' li tenamit.

²⁰ Ab'anan moko wank ta junaq tiik xch'ool sa' ruuchich'och' li tixb'aanu li us chi junelik, chi ink'a' ta taamaakob'q.

²¹ Maapaab' chixjunil li nayeemank; chi jo'kan ink'a' taawab'i naq laj k'anjel chawu yooq chi aatinak chawix.

²² Xb'aan naq laa'at ajwi' k'iila sut xat-aatinak chirix xjolomeb' laawas aawiitz'in.

Xsik'b'al li choxahil na'leb'

²³ Chixjunil a'in xintz'il rix rik'in linna'leb', xb'aan naq inyehom sa' inch'ool: “Tintaw li choxahil na'leb'”, chankin. Ab'an a'an q'axal najt wank wik'in!

²⁴ Najt ut cham wank chixjunil li k'a'aq re ru: ani taatawoq re?

²⁵ Toja' naq xink'e inch'ool chi xtzolb'al jo'ch'inal jo'nimal naxk'e rib' chiwu, re naq twanq b'ayaq inna'leb'. Ut xink'e reetal naq moko us ta li memil, ut li memil a'an kama' li jipil.

²⁶ Xink'e ajwi' reetal naq li ixq ink'a' us xna'leb' naab'al chik li rahilal naxk'am chaq chiru li kamk. Li ixq a'an chanchan jun ra'al, naxyal xq'e chi q'unb'esink rik'in li xch'ool ut eb' li xtel. Wi laa'at nakapaab' li Yos, taakol aawib' chiru li ixq a'an; ab'an wi ink'a' nakapaab' li Yos, tatt'ane'q sa' li xra'al.

²⁷ Naq yookin chi xtz'ilb'al rix chixjunil a'in, laa'in laj Ch'olob'anel xoxintaw ru a'in:

²⁸ naq maji' nintaw li yookin chi xsik'b'al! Xintaw jun li winq chaab'il xch'ool sa' xyanqeb' li jun mil, ab'an maajun li ixq chaab'il xna'leb' xintaw sa' xyanqeb' chixjunil li ixq.

²⁹ Ka'ajwi' li na'leb' a'in xintaw ru: naq li Yos xk'e qayu'am chi tz'aqal re ru, ab'an laa'o wank qe naq naqara'le chixjunil.