Eclesiastés 6 - Q'eqchi Bible

¹ Wank jun chik li ch'a'ajkilal xwil laa'in sa' ruuchich'och' ut jwal ra cho'q qe chiqajunilo:

² wankeb' li neke'k'ehe'k xb'ihomal ut xloq'al xb'aan li Yos. Chixjunil wank reheb' ut maak'a' namajelo'k chiruheb'; ab'anan li Yos ink'a' naxk'eheb' chi xyalb'al xsahil li xb'ihomaleb': jalan chik taayaloq xsahil. Ma ink'a' tab'i' nimla rahilal a'in ut maak'a' xyaalal?

³ Wi junaq najt roq li xyu'am ut o'k'aal ralal taawanq, ab'anan wi ink'a' naxyal xsahil li k'aru wank re chi moko namuqe'k sa' xyaalal, laa'in ninye naq q'axal chik us junaq k'uula'al li xyo'laak chi kamenaq chiru li winq a'an.

^4-5 Xb'aan naq li k'uula'al a'an ink'a' ki'ilok kutan, chi moko kixnaw li k'aru wank sa' ruuchich'och'; ink'a' kinawe'k ru xb'aan anihaq chi moko kinawe'k li xk'ab'a'. Ab'anan q'axal us kixk'ul li k'uula'al a'an

⁶ chiru junaq winq li kiyo'yook wiib' mil chihab' ut ink'a' kixyal xsahil li k'aru wank re. Chiqajunilo junaj toxooraqe'q wi'.

⁷ Chiqajunilo naqatawasi qib' yal re naq tqataw qawa quk'a', ab'anan ink'a' nak'ojlaak li qach'ool rik'in a'an.

⁸ Li winq li wank xna'leb' k'aru naxq'ax wi' ru li jip? Ma ink'a' tab'i' rik'in naq naxnaw elk chi us sa' li ch'a'ajkilal junjunq?

⁹ Jwal us xyalb'al xsahil li k'aru wank qe chiru naq junelik yooqo xrahinkil xtz'aqob' a'an. Ab'anan a'in ajwi' maak'a' xyaalal ut chanchan li chapok iq'.

¹⁰ Li k'aru nak'ulmank anaqwan, ak yeeb'il chaq junxilaj xb'aan li Yos naq taak'ulmanq. Ut laa'o naqanaw naq maa'ani naru xsumenkil li ani jwal nim chik xwankil chiru a'an.

¹¹ B'arwi' naab'al li aatin nayeemank, aran numtajenaq ajwi' li memil na'leb'. Ut maak'a' naxra li winq naq naxye naab'al.

¹² Ma wank tab'i' junaq nanawok re k'aru tz'aqal li us cho'q re li winq naq wank arin sa' ruuchich'och'? Li xyu'am nanume'k sa' junpaat kama' junaq mu. Maa'ani naru chi xyeeb'al qe k'aru taak'ulmanq moqon, chirix li qakamik.