Eclesiastés 2 - Q'eqchi Bible

¹ Xinye ajwi' sa' inch'ool: “Inyalaq xsahil li ruuchich'och' re naq sahaq li waanm”. Ab'anan xink'e reetal naq a'in maak'a' ajwi' rajb'al.

² Li se'ek, a'an yal memil na'leb'; ut li sahilal maak'a' na'ok wi'.

³ Toja' naq xwaj xq'axtesinkil wib' chi xyalb'al li b'iin ut xb'aanunkil li k'aru neke'xb'aanu li maak'a'eb' xna'leb', re rilb'al k'aru tz'aqal nasaho'k wi' xch'ool li winq jo' najtil twanq sa' ruuchich'och'. Ut xinb'aanu a'an chi ink'a' sachso inch'ool chi junajwa.

⁴ Xinyoob' inninqal b'aanuhom: xinkab'la naab'aleb' li wochoch ut xink'e wawimq uub'.

⁵ Xinyiib' xna'ajeb' li wawimq ut xna'ajeb' li wuutz'u'uj; ut yalaq k'a' chi che'ul li na'uuchink xwaw aran.

⁶ Xinyiib' ajwi' inpumleb'aal ha' re xt'aqresinkil li xchaq'alil ru awimq.

⁷ Xe'wank naab'aleb' inmoos winq ut ixq. Xe'wank ajwi' inketomq: naab'aleb' linwakax ut linkarneer, numtajenaq tz'aqal chiru li xe'wank reheb' li xe'awab'ejink Jerusalén xb'enwa chiwu.

⁸ Xintam li oor ut li plaat, jo'wi' naab'al inb'ihomal chalenaq rik'in xk'ihaleb' li awab'ej, sa' najtil tenamit. Xe'wanje'k aj b'ichanel jo' winq jo' ixq; xoxintaw chixjunil li k'aru wank xsahil sa' ruuchich'och', jo' ajwi' naab'aleb' li ixq.

⁹ Rik'in linna'leb' xoxintaw q'axal numtajenaq chik nim linwankil chiruheb' chixjunileb' li awab'ej xe'wank xb'enwa chiwu arin Jerusalén.

¹⁰ Jo'nimal naxpatz' linch'ool, maak'a' xinram chiru. Maajun sut ink'a' ta xinb'aanu li k'aru xinrahi ru, xb'aan naq nintaw xsahil li waanm rik'in li nintawasi wi' wib'; ut li sahil ch'oolej a'in, a'an reeqaj li k'iila k'anjel xinb'aanu.

¹¹ Moqon xin'ok chi k'oxlak chirix link'anjel ut li tawasij ib' li xkoho inch'ool xb'aanunkil, ut xink'e reetal naq maak'a' rajb'al ut chanchan li chapok iq': maak'a' naqara chirix li k'anjelak arin sa' ruuchich'och'.

¹² Xin'ok ajwi' chi k'oxlak chirix chixjunil li chaab'il na'leb', jo'wi' chirix li memil ut li jipil. K'a' chik ru tixb'aanu li awab'ej tkanaaq sa' linna'aj? Ma ink'a' tab'i' a' li ak xinb'aanu laa'in?

¹³ Toja' naq xwil naq li choxahil na'leb' naxq'ax ru li jipul, jo' li saqenk naxq'ax ru li aak'ab'.

¹⁴ Li ani wank xna'leb' naxnaw b'ar yo chi xik, a'ut li jip nab'eek sa' aak'ab'. Ab'anan xintaw ru naq juntaq'eet toxe'raqe'q wi' chi xkab'ichaleb'.

¹⁵ Jo'kan naq xinye sa' inch'ool: “Li k'aru toxraqe'q wi' li ani maak'a' xna'leb' juntaq'eet ajwi' rik'in li tink'ul laa'in. Jo'kan naq maak'a' aj e naq wank inna'leb'. Relik chi yaal naq maak'a' rajb'al chixjunil a'in!”, chankin sa' inch'ool.

¹⁶ Ink'a' patz'b'ilaq li wank xna'leb' chi moko li jip, ut xkab'ichaleb' te'kamq. Naq yooqeb' chi xik li kutan, nasachmank sa' qach'ool chixjunil.

¹⁷ Jo'kan naq xik' chik nawil linyu'am, xb'aan naq ink'a' naxk'ul wu jo'nimal na'uxmank sa' ruuchich'och'. Chixjunil a'an, maak'a' rajb'al ut chanchan li chapok iq'.

¹⁸ Xik' ajwi' nawil jo'ch'inal jo'nimal xintawasi wi' wib' chiru linyu'am, xb'aan naq a'an tkanaaq cho'q re li taa'ok sa' linna'aj.

¹⁹ Ani ta nanawok re, ma wanq xna'leb' malaj ut ink'a'? Ut rehaq a'an chixjunil li xintawasi wi' wib', a' li xinb'aanu rik'in xseeb'al ink'a'uxl. Relik chi yaal naq a'in ajwi' maak'a' rajb'al.

²⁰ Naq xwil chixjunil li k'anjel xlajinb'aanu, ra xweek'a rik'in naq xintawasi wib' chiru linyu'am,

²¹ xb'aan naq jo'ka'in li k'anjelak sa' ruuchich'och': li ani nak'anjelak rik'in chaab'il na'leb', xseeb'al xk'a'uxl ut anchal xch'ool, tento tixkanab' li k'aru wank re cho'q re jalan chik li ink'a' xtawasi rib' chi k'anjelak. A'in ajwi' moko us ta ut maak'a' rajb'al.

²² Rik'in a'in nak'utunk naq maak'a' aj e naq naqatawasi qib' ut naqayal qaq'e chi k'anjelak arin sa' ruuchich'och'.

²³ Nujenaq li qayu'am chi rahil k'a'uxl ut ch'a'ajkilal. Chi moko chiru q'oqyink nahilank li qach'ool! A'in ajwi' maak'a' rajb'al!

²⁴ Li k'aru us tqab'aanu, a'an wa'ak uk'ak ut xyalb'al xsahil li k'aru tqak'anjela. Xink'e reetal naq a'in ajwi' qamaatan li nachalk rik'in li Yos.

²⁵ Xb'aan naq ani taawa'aq ut taa'uk'aq wi ta li Yos ink'a' nak'ehok re?

²⁶ Naq junaq narahe'k xb'aan li Qaawa', nak'eemank xna'leb', xseeb'al xk'a'uxl ut xsahil xch'ool; a'ut laj maak, li Yos naxk'e chi k'anjelak ut chi tamok b'ihomal yal re xkanab'ankil moqon chixjunil a'an re li ani raaro xb'aan. A'in ajwi' maak'a' rajb'al ut chanchan li chapok iq'!