Eclesiastés 11 - Q'eqchi Bible

¹ Chatsihinq chi anchal aach'ool, ut sa' junaq kutan taak'ul reeqaj.

² Chawotz li k'aru wank aawe rik'in wuqub' malaj waqxaqib' laawamiiw, xb'aan naq ink'a' nakanaw jo'q'e taachalq rahilal sa' xb'een li tenamit.

³ Wi q'eqmoyink ru li choql, nachalk li hab' sa' xb'een li ch'och'. Naq nat'ane'k junaq che', juntaq'eet wi nat'ane'k sa' xjayal releb'l iq' malaj junpak'al: li na'ajej taat'ane'q wi', aran tkanaaq.

⁴ Li ani yo xk'a'uxl chirix li iq', ink'a' taa'awq, ut li naka'yank choql, ink'a' taaq'oloq.

⁵ Laa'at ink'a' nakanaw b'ar naxik li iq', chi moko chanru nak'ub'laak li k'uula'al rik'in li xna'. Jo'kan ajwi' ink'a' nakanaw k'aru naxb'aanu li Yos, laj Winqob'resihom re choxach'och'.

⁶ Aw laawiyaj eq'la, ut aw wi' chik ewu, xb'aan naq ink'a' nakanaw b'arwan li taa'elq chi us, ma li xawaw xb'enwa malaj li moqon, malaj us taa'elq xkab'ichal.

⁷ K'ajo' xsahil rilb'al li kutan saqenk.

⁸ Ab'anan us ta najtaq roq li qayu'am ut sahaq qach'ool chiruheb' li chihab' a'in, tento xjultikankil naq taachalq li aak'ab' sa' qab'een, ut naab'alaqeb' li aak'ab'il kutan. Ut chixjunil li chalk re sa' qab'een, maak'a' rajb'al.

Cho'q reheb' li toj saajeb'

⁹ Laa'ex li toj saajex, cheyal xsahil leesaajilal; sahaq taxaq eech'ool anaqwan. B'aanuhomaq li k'aru nekerahi ut nawulak cheru. Ab'anan misachk sa' eech'ool naq sa' jun kutan li Yos tixraq aatin sa' eeb'een chirix chixjunil leeb'aanuhom.

¹⁰ Najtob'resihomaq eerib' rik'in li ookel k'a'uxl ut isihomaq li rahilal sa' leech'ool, xb'aan naq eb' li sahil kutan sa' leesaajilal te'raqe'q sa' junpaat chi maak'a' rajb'al.